Read daasanach Tímote ki Naamaká 4 Bible Online

Tímote ki Naamaká 4 - daasanach bible

Tímote ki Naamaká 4

¹Waag metle ubaa Yiesu Kirísto giri gál luogolká ubaa gál kufeká bár ka chiimetóótíá ˈdéé ki iđimuo-, hol ká nadheka, Guchle biiy yé gáá ˈdeđuoká metle hé yú ko ki mureká hééllá:

²ˈDeeny Waaˈgiet ˈdiiyímo, aadh lulle hát lulle tág yáal, giri gálaat af tatiyyo-, il gíl gaa helisanno-, hát ˈdabaan-, geer gaa guchiká gáál ki gogofsicho-, gáál he oonisichoká.

³Bár gál burnayká he onisiny ˈdúwáállá nee ma kokonyká ali hai kí ˈdeenne. Gaal he feditle ˈdaalleka, gál gálaat he oonisuo-, ˈdeenyle hí nee gaa méká hollo hol gaa ˈgeˈgedhe, gáál af nee hai kokoo.

⁴Gaal hé ˈdúwa-, Waaˈgietallá nee konyle hai điidhma, hibano đeemo-, lesietká bala hai ˈdú nannaa.

⁵Tá kúún, he met lulle ˈdaalleka, kas midhabká ˈgab, manyjany mé ki chírso, Fayam Midhaballá gálaat gééđish, hújích Waag hí ko shiichééllá hát ˈdabaanká náánnaʼ.

⁶Yú hát ˈduuny vinnaʼ-, gaalí kúb Waaˈgiet ˈdú okodmuokáka, aleđugul chia yú lésallá gaa haađuoká hé ká ˈjobonte.

⁷Yáá laat ˈdúwaká laađame, đuulchú beete, iiy yeen chia Kirísto ka ˈgúóllá ki yaal.

⁸Aaléka, hé shiicho gál Waag hí gál ˈdúwaká chegetoká hí aargiroká hé úba ye úratíá kí egesso. Hé shiicho kinaallá Máá kúnnaa Guđo-, gálaat hát ˈduwantiká hol eiy gaa nannuoká Kúlích ˈDéé ki Iđiny ka chiimetóótíá ha muí ye gáá shigia. Hé shiicho hat kinaallóóllá hé muí ye tákámchú ma ká shiginy, ameeny gál mú fiiritle ˈguo-, mú hol ká naanle met egesóóllá úba ha muí shigia.

⁹Hát lulle laađámo, ye ál ˈjob gáá hil,

¹⁰ˈdaa giri ˈDémas lésallá hélle giel-, ye hay-, Dhesaloníke mé nieká. Kerékes hé Galátia mé nie, tá Títo íín ˈDalmátia mé nie.

¹¹Lúka tákáma nyí hol af iđa. Af giri ka chiimetoká Márko hol ka eedhdhíe, ˈdaa giri hújích yú nannúólláka mu ye rangʼiteká.

¹²Yáá Túkiko Eféso ali ˈdú kaay.

¹³Af giri ka chiimetoká, đafar chia buan-, yú ˈjien Torowas álle ki hay-, yú Kárbos gíl gaa kaayká, ubaa warˈgasam chiaká ka éew, tá súm issam chia gaalí ˈdéé ˈdug gaa veereká ye ˈdu gáá sit.

¹⁴Alekesánda giri sibilaam tutunoká hé mé ilchú yie, ye hé ˈdeđewká ki eekemey. Máá kúnnaa Guđoká íín hé muí ye ki ˈdeeđeneyká ˈdeentle, he akaˈdo maadia.

¹⁵Tá kúún tuuˈdkú mú ˈdaalleka, hol ˈdeeˈdémo, ˈdaa giri mu súm he onisinykínyo mé ille yieká.

¹⁶ˈDéé hol ˈdú huogon chia erká hé máá níínní ye ˈdéé ˈdú chiˈdeká mán, gaal lulle hé ye hay. Tá hé kinaal ˈdaalleka, Waag hai gáál ˈdéé ki iđîny.

¹⁷Tá Máá kúnnaa Guđoká hé ye ˈdéé yiir kí chiˈde, ye fargogonoy, giri yú Fayamlé Midhaballá hát ˈdabaanká ˈdiiyime-, gál gál Yuuˈdi muuninyká lulle fayám maaleká. Aaléka, Waag hé ye luoch af gáá bisiche.

¹⁸Máá kúnnaa Guđóóllá he met lullé ˈdeđewká ha ye gáá biisia, mu Guchlé Uratiká naanná hai ye egee. Mú taalle bííyyo, gálaat hí meemeyo. Iiy-hí, he hí hát kinaallá yeet.

¹⁹Ye Biríska ubaa Akúla, tá ˈbíl geer Onesiforos naa kí áat.

²⁰Erástos hé Korínto ki ˈgite. Torofímos ˈdaa giri báásh ˈguoká, yáá Milétos ki hay.

²¹Hát lulle laađámo, af ˈdeenyietká met ka ˈjé. Ébulos ubaa Bóúdes, tá Línos ubaa nyaar kúnnaa Kiláúˈdia, héétí gál nyaaram Kiristoká lulle hé ko naa ká yie.

²²Máá kúnnaa Guđóóllá hí ko Hím Naasanle fargogínt ki shiiguo, hí ko ˈdú ˈjeeˈjeen.