Read daasanach Títo 2 Bible Online

Títo 2 - daasanach bible

Títo 2

¹Tá kúún gálaat he onisiny fayam Kiristo ˈdúwáállá ˈdaalle ki taalká onísish.

²Karu yaabká af táátaʼ, giri gaal hol momoyo-, kás ˈguo-, hol tatuoká, héétí iiy yeenlé Kirísto iiy yíéllá tág chiirat-, gielmít gálaat ká ˈguo-, he lulle ˈdú fafaatká.

³Hát tikiˈdééllá karu ˈdietká úba af táátaʼ, giri gaal húgúmlé ki ijoká húgúm gál Waag kikiatká yeget-, gálaat ma heengʼeen-, hol bersham ma ˈdú haađiny-, ˈgíérích midhabká gállé ˈdietká oonisuoká.

⁴Gaal hí ˈdeg rúóreká af taatuo, giri ˈdég beelemle ubaa umle geelnet-,

⁵ˈdég kás kakaat-, úba muosam mánká. Héétí ˈdég hí ˈdeg é gerleka líles-, ger gaa ˈdabaan-, beelemle met gaa kekeenká onnoyyo, giri ˈdeeny Waaˈgietallá gaalí ma egeshenyká.

⁶Gál yááb rúóreká úba af táátaʼ, gaalí kás kaat.

⁷He lullé ekemeycho-, ubaa hogotoká húgúm midhabká gaa ˈgab, gáál hí ko ká ennuo. Gálaat he oonisichoká, gálaat he onisiny tagléká hát ˈduwantiká oonísish.

⁸ˈDéé hótkú hí ˈdéé hót ˈdúwa-, gálaat hí ma ˈdeđensenká onnoyyo, giri gál he onisinykú egesheyoká kern hí ˈgiidho-, ˈdeem ˈdeđew-, ˈdaa kúnnoka hogodhoká ˈdaaboká.

⁹Gál gédeká af táátaʼ, giri gállé hí hoteká hát lulle met gaa kekeen-, gáál ger gaa memesuo-, gáál ˈdéé af hol ma ki nanninyká.

¹⁰Héétí gaal hai konf ˈgíiny, gaal hí hújíchle hát ˈduwantiká naannuo, giri Waag Rúbách kúnnaallá he onisinyle gálaat hí geelnetká.

¹¹Waag hé gálaat lulle ˈdú ˈjiiyye, hé kár gálaat hí rubach ki aargiroká yé ká ˈdeeyche.

¹²ˈDúˈjím Waaˈgietallá hé gáál oonisichoká he húgúm Waag hí nébká ubaa balt lesalloká ke hol ka ririat-, ki kás kakaat-, ˈgíérích ˈdúwa-, Waag hí feˈdoká ki báral ke ki ijoká.

¹³Taalle ki ali ijóóllá muun Yiesu Kirísto Waag kúnnaa guđo-, Máá kúnnaa Rubachietallá af giri he guchle kí yiimet-, ki aargiroká geyyiny kinaallá ki met egese.

¹⁴Mu íín dhúrlé gáál hol ˈdu gáá sillie, giri mu múúni ke mú iiy yíéllá he met lullé gaa nyakarichká gáál gáá bibisuo-, gáál dhidhiro-, gáál gálle hođisat-, gál hé midhabká ekemeyoká gófle ˈguoká gáál hođuoká.

¹⁵Aaléka, he lullé yú ko kí tuoyallá gáál onísish, gáál guogófsish. Kuun kó fargogint máá he ˈdeđeneyoká il gíl gaa helisanno-, mú af tatiyyoká ˈgayyo. Máádhat hai ko eeshêny.