Read daasanach Títo 3 Bible Online

Títo 3 - daasanach bible

Títo 3

¹Aaléka gáál géesh, gaal hí gál kansím ˈguo-, les met ki ˈgieká guguchle onnow, hí gáál met gaa keekeen. Gaal hí hé ˈdabaan-, ekemeyoká uritle ˈguo.

²Gaal hai máádhat méé ˈdeenêny, hí gál af ka fálaam mán-, sáa-, gálaat lulle ki midhabká onnow.

³Muun úba héle kíssóótí he gál đées-, metle ki seseme-, hé lesalloká hí nyiimite-, bált met lulle ˈgar kirmite-, hé ˈdeđewká gaa seseme-, hinááf ˈgie-, gálaat hí nebeney-, íín úba hol nebeneyká.

⁴Tá Waag Rúbách kúnnaallá af giri geer gaa midhantle ubaa gielmitle gálaat argisicheká, hé muun gáál riiyye.

⁵Rúbáchallá hé hé kúnnaa midhab-, ki eekemeyká ke ˈdaalle ma ki árginy. Rúbáchallá mú geer guurallé ke ki arge, in mú Hím Naasanle gáál ˈdalmaat kaanaká shiiche, gáál dhiiˈde, ke luolmit kaanaká arge.

⁶Waag Hím Naasanle muun gáál ˈdú ookodmichééllá, ˈdaa Yiesu Kiristo Rúbách kúnnaallá he muun gáál kí shiiche,

⁷giri ˈdúˈjímallá ˈdaalle Waag muun gáál iiy cheget-, ke luolmit biiyo-, muí gálle af iđie-, ke met egessóóllá ke aargiroká.

⁸ˈDeeny yú hí ka geeyallá hé ˈdúwa. ˈDeenyééllá kuun hí af ki googonoychoká yú fede, giri gál Waag iiy yieká hé midhab he ekemeyoká hí mé les gaa ˈdaraanká. ˈDeenyééllá he ˈdeeny ˈdúwa-, gálaat ki midhabká.

⁹Aaléka, ˈdeem đeemo-, met mán-, gálaat hí hol ˈdú nannuoká, ubaa hol đuuram ˈdaakany shalalaamlé, héétí nyatalaam hol ki fálaam, mé af ˈgísso. Yaalmisanóóllá hé níínní ˈdiefo-, hí yé gáá ˈdeˈdeenká mán.

¹⁰Máá gálaat hol eiy gaa ˈgiˈgidhuoká il gíl gaa hélish, he naam hoyka, geđ il gíl gaa hélish. Gil seđ hoyka, mé gaa ˈdéesh.

¹¹Máá hatallóóllá hát kas hí ˈdeenete-, ađaable hí he il ká aargisichoká, kó óg.

¹²Yú Artéma, muuninyka, Túkiko, ali ha ko ˈdu gáá kakaa. Gálallá máádhat ko af kí ˈdieka, đo ká keʼ, kí Nikóbolis hol gaa argo. Ál kinaallá he ál giri af ˈdeenyietká yú gaa yíéđianká.

¹³Hát lulle ˈdé, Dhénas hemuumurít eiy ním ógallá ubaa Abóllos ál kinaal gaa kekeenká gaal héllé he ˈgierich ki nannaat-, he biiy ki higiloká ki ebísso.

¹⁴Gálkúnno hé midhab he ekemeyoká hí hol onisuo, hí húgúmle hosot, giri hát ˈguo-, gálaat héllé hí ki ˈgierˈgereká he gaa shiguoká.

¹⁵Gál nyí hol af iđáállá lulle hé ko naa ká yie. Gál fayam Kiristo ki yaal-, nyí giel-, hí hol af iđa kinaallá nyí naa kí áat. Lulkícho Waag hí ˈdú ˈjeeˈjeen.