Read daasanach Héberew 11 Bible Online

Héberew 11 - daasanach bible

Héberew 11

¹Aaléka, iiy yeen ˈgany he hé ke met egesoká hát he ˈduuwawká ke ógká. Hát tikiˈdééllá iiy yeen ˈgany he hé hátle ke il ma ki árginyká hát he yé ka ˈdeenká ke ógká.

²Gál kúnnaa heleká iiy yeenle ˈdaalle ˈdugaka in gaal Waag geer gaa meey.

³Iiy yeenkúnno ˈdaalleka in Waag hát ˈdéé hótle biiy kí kuonneká ke og. Aaléka, he lullé káána ke argóóllá hé ke il ma ki arginyallá ˈdaallé he yé kí ˈdie.

⁴Ábel iiy yeenle ˈdaalleka in héllé shiicho Waag shieká hé Káyin hí Waag shieká ˈdú ˈdúwa. Tá mú iiy yeenle ˈdaalle ˈdugaka in Waag mú máá ˈdúwaká chie, mú héllé shiicho kinaal iiy chie. Har Ábel úba kis mán yieka, mu hé iiy yeenlé kinaal hátle ˈdéé kí hogodho.

⁵Énok iiy yeenle ˈdaalleka in kúfach il ma ki árginy, hátlé fayyáká Waag hí eete. ˈDaa giri mú Waag hí eeteká in mú gaalí ˈdabe. Hé Warˈgat Waaˈgiet hí gáál ka geeycheká kieye, Mu hátlé les gaa ije-, Waag hí ma éenká, in gálaat mú máá Waag geer gaa meeyká yie.

⁶Aaléka, máádhat he iiy yeen manítaka, hé hát níínní Waag geer gaa meeyoká mán. Máádhat he Waag ˈdú gáá yiimet fedoka, mu Waag hát he ali iđo-, gál hí ˈdú gáá yiimetká hé midhabká shigichoká hí iiy yeet.

⁷Nówa iiy yeenle ˈdaalleka in kádích hí ˈbíl geerle ririanká ˈdisse. Kadich muí ˈdissééllá he ˈdaa giri hé kálta gálaat hí ma árginyká hát ka yiimetká Waag hí mú geeyche-, mu Waag af iiy yie-, Waag hát mú gaa feˈdeká muí el gaa veereká. Hé Nówa hí ekeyallá hé gál lesalloká ˈdeente. Aalé Nówa iiy yeenlééllá ˈdaalleka in Waag mú máá ˈdúwaká chie.

⁸Abirááyam iiy yeenle ˈdaalleka, af giri Waag hí geeyche-, Waag kieye, Keʼ, lés éíy taaka-, yú ko ka shigúóllá mé naʼ, Waag hí mú chieká, in mu Waag af ˈduwasie. Har káána úba ál muí mé nannie kinaal muí moonnoyka, mu hé Waag af ˈduway, kie.

⁹Mú iiy yeenle ˈdaalleka in mu lés Waag hí af iđiche kinaal gaa ˈgudhdhe, ény ˈbaaroká ál kinaal gaa ˈdite, tá mu hát máá les ma lilenyká he ká ije. Mú inylé Yísak ubaa mú iny inylé Yákob iđiny kinaallá úba he lés kinaallá ki ije. Hé Waag hí Abirááyam af iđicheká, in úba Waag hí Yísak ubaa Yákob af iđiche.

¹⁰Abirááyam ˈjien geđ igiro-, el mé ˈguo-, biiyoká he met egese. ˈJien kinaallá máá hí ˈguanle óg-, hí ˈdiˈdisoká he Waag.

¹¹Sáára min Abiraayamká úba iiy yeenle ˈdaalleka, har káána kísóótí ˈdal mannayye-, úba káána súm vinateka, hé Waag hí ˈdal shiiche. Hééllá he ˈdaa giri Waag mu íín ubaa bélle he af iđicheká muí af ˈdúúw hoteká.

¹²In aaléka, har káána úba Abirááyam vinadhe-, ˈdal af yé gaa ˈdieka, hé hídh guđoká hí yé gáá ˈdie. Mú hídhlé kinaallá burnatle hát hidhino urruká, héétí hát yóch ilungo ke ma totonyallá.

¹³Gál Waag iiy yeen ka ˈgíéllá iiy yeenlé he ˈgie, ˈjíig guraam hí guure. Gaal hátlé les ˈdug ˈdú ijeká lés urati-, Waag hí af iđicheká hé ma árginy. Lés Waag hí gáál af iđiche kinaal bííy fágo gaalí ká arge, gáál geer gaa meesie. Gaal hát lésal ma lileny-, lésal el mé ka mánká hé iiy yie.

¹⁴Gál iiy yeen hatallóóllá ˈgúóllá, iiy yeenle héllé gáál ka geđichoká kieye, gaal léslé urati-, ka chiimetoká he met egese, cheedhe.

¹⁵Gaal har lés gáá yimieká fifirînyka, hé onnônyka hol nadhe.

¹⁶Gaal lés lésal ˈdú ˈdúwa-, uratiká hé ˈdú lađame. ˈDaa kinaallá ˈdugaka in Waag gaalí gáál Waagle yegetallá kern hí ma ˈgiˈgin. Gáál Waaglééllá hé gáál ˈjien biiyo-, uratiká ki ˈdite.

¹⁷Abirááyam iiy yeenle ˈdaalleka, af giri Waag hí he af kí dhaaycheká in Waag af ˈduwasie, inylé Yísak kúb suoryoká ˈdú iifie, giri Waag suor ki ˈgaaloká. Har úba Waag mú he af iđiche-, kieye, Hídhkú Yísako yé gáá ˈdeeme,[35] chieka, mu hé inylé ali ka takachallá Waag suor ki hođuoká ma đíin.

¹⁹Abirááyam tawunyleka, inyle yíésinyka, Waag hát fargogínt ˈgayyo-, mú inylé kinaal geđi logolnoychoká hé onnoy. Tá Abirááyam inyle geđi Waag hí hol ˈdú gáá niiyyééllá, hé kinaallá he yaalmit Yíésu Waag hí geđi luolnoyche-, Waag hí uushich yé gáá ˈdeeychééllá he hol ki eg.

²⁰Yísak iiy yeenle ˈdaalleka in Yákob ubaa Ésaw yíéđinylé biiy metoká ˈdaalle ˈdugaka gáál ˈdú ˈguunume.

²¹Yákob iiy yeenle ˈdaalleka, af giri sidh hí ali kí ˈdiiyyeká mu Yúósef helelle hullaalle ˈdú ˈguunume, mu gasar mé veere, Waag vite.

²²Yúósef iiy yeenle ˈdaalleka, giishalle ka ˈjobonteká gál Yisirayel hát bár ˈdaatika lés Misirayam yé gaa ˈdeˈdeenká fayamle gáál shie. Héétí mú lafle ˈdaalleka, mu nyaaramle ˈdéé ki mure.[36]

²³Móshe gál hí ˈdaleká iiy yeenle ˈdaalleka in Móshe ka ˈdalidheká mú ˈguiyam seđ gaa kaay. Hé kinaallá he ˈdaa giri mu hát mant hí midhanayyeká gaalí arge-, gaal hemurit máá kansichká ma kíanká.

²⁴Móshe iiy yeenle ˈdaalleka, ka guđandheká gaalí iny ini Farro yegetká điidhe.

²⁵Mú hé iđiny ađaabano ˈgayyoká điidhe. Har káána iđiny kinaal geyyiny ˈgayyoka, geyyinylé kinaallá hé mé múrká. Mu hé ubaa gál Waaˈgiet gaalí hol ˈgar maanyjasuoká iiy yie.

²⁶Móshe hé shiicho Waag hí shigichoká hé mé ká ˈgie, in aalé eesheny gaalí mú egesheyká ma đíiny. Mu eesheny il hí argiyye-, hát káána eesheny gaalí Kirísto eeshey kinaallá, hé súm kamur lés Misirayim ˈgany ˈdú ˈdúwaká muí ká dhaay.

²⁷Mú iiy yeenle ˈdaalleka in mu lés Misirayim gaa kie. Har káána úba máá giri kansichká mú ˈdú idhaneka, mu hé mú ma kían. Mu hát máá Waag gaalí ma arginyallá il ki argokáka, mu mé ki chirte, sienyle sedhe.

²⁸Mú iiy yeenle ˈdaalleka in mu gál Yisirayel ˈdéé ki mure, giri ˈjila máá ˈgasso-, urru-, Waaˈgietká hí gáál ˈdug gaa nadheká henaasanle gaalí mé gáá kokoot-, fás aiyiet gaalí é af ki lillioká. Fás gaalí é af ki lillíóllá he ˈdaa giri máá ˈgasso-, urru-, kúfach gil ka ˈguo kinaal gáál umlé yaab-, erká ma yegesinyká.

²⁹Gál Yisirayel iiy yeenle ˈdaalleka in bás gaalí Bás Búrká yegetká léslé mé gogiyyo-, yé ka ˈdiiyyeká nadhe, hođoˈd ˈdoy. Tá gál Misirayim gáál ˈgar ká rue-, gáál el gaa igire-, ál kinaal nanadheká bas hí ˈgudite.

³⁰Gál Yisirayel iiy yeenle ˈdaalleka in đír Yeriko kulich tiiya ki made, đir đo les ˈdoy.

³¹Min sharmúut-, gaalí Ráab yegetallá iiy yeenle ˈdaalleka in gál dhéˈgeká hát naannáká mé guđáan chie. ˈDaa kinaallá ˈdugaka in Ráab gál Waag af đuˈduseká hol ˈgar ma kúfiny.

³²Aaléka, meete éíy taaka yú hí ká geđia? Yáá aadh gas ˈguo-, hí Gédion, Bárag, Sámson, Yéfadha, ˈDáwuˈd, ubaa Sámuel tá gál Waag hí ˈdeem ká shigicheká hélle hí ka geeyoká mán.

³³Gálallá iiy yeenle ˈdaalleka in kansimano ká adhdhe, gaal hát ˈduwantiká gálaat he ki mumure. Gaal hé Waag hí af iđicheká hé úba arge. Gaal hé lúa af eiy ˈdeeny ká ridhdhe.

³⁴Gaal hé úba ˈjiet bólo kulle ali koy, hé fado af kar gaa ˈdane. Gáál đalimle hé Waag hí hol gaa layye, gaal fargogoy, oossom úba far ˈdú gogoy, kidh yuoyle arie.

³⁵ˈDég ˈdaa iiy yeenleka, gállé kufeká hé Waag hí luolnoyche, Waag hí hol ˈdú niiyye. Tá gáál ˈbaal hé gaalí manyjasie, gaalí yegies. Mé furit gaalí gáál mé fufuro-, gaal Waag el af gaa tataanká hé gaalí điidhe, giri gaal luolmit ˈdúwa-, biiyoká higiloká.

³⁶Gáál ˈbáál hé gaalí chaachare, gaalí tune, gon hí fuufuate. Gáál ˈbáál hé gaalí nyarugano ki ˈdane, gaalí ˈbíl hiiginká fie.

³⁷Gáál ˈbáál hé gaalí waar ki yies, gáál ˈbáál hé gaalí eiy nanam ká mumure, gáál ˈbáál hé gaalí fado órofká ki yies. Gaal hé issam aiyiet higite, he ˈdaˈdabe, tá gaalí he il ká aargisie, gaalí maanyjasie.

³⁸Gál gál lesalloká ˈdú ˈdúwáállá hé ˈbakasam ubaa gumano gaa gugurme, álká hé ligisham ubaa ˈgodo ki shosholme.

³⁹Gálallá lulle iiy yeenle ˈdaalleka in Waag hí gál ˈdúwaká chie, tá gaal af giri les ˈdug ˈdú ijeká lés urati-, Waag hí gáál af iđicheká hé ma árginy.

⁴⁰Waag hé muun gáál hé ˈdúwaká kí tawuyye, giri muun ubaa gaal íín Waag gáál hol ˈgar ˈduuwasicho-, lulkúnno ke lés uratiká hol ˈgar higiloká.