Read daasanach Héberew 12 Bible Online

Héberew 12 - daasanach bible

Héberew 12

¹Aaléka, gál burnay-, Waag iiy yeen ká ˈgie-, hát nyáˈdowka gáál ki madééllá ˈdaalle ˈdugaka, he lullé giri iđiny Waag hí gáál ki feˈdoká gáál gáá momoyóóllá ubaa hé kúnnaa ˈdeđew-, ke ekemeyo-, gáál ki ˈdaˈdananallá kí hayo. Kí mé ki chirsat, kí đuul kúnnaa ke gaa igiro-, ke ma béésenallá beeset.

²Máá iiy yeenkúnno mé gáá kodhdhe-, iiy yeenkúnno ˈduuwasuo-, Yíésu lééllá kí taalle in gaa kuokuo. Geer gaa meen ka chiimet-, muí onnoy kinaallá ˈdaalle ˈdugaka in mu ˈgór đarám yaalká kúfáchle gaa nadhe, manyjany il hí argiyyeká ubaa eesheny gaalí egesheyká ma đíin. Mú kúfáchlé kinaallá el ˈdaal in mu kara guchi-, Waaˈgietká ˈdaa naaniet yíéđie.

³Máá kúnnaa gál ađaabano ˈgieká hí eeshey-, hí he ki ekeyká hát hé ˈdeew kinaal ma đíin-, he gaa nadheká taawúa, mé ka ˈgáa, giri hí gúóf ma ˈdaabiny-, hí ma giinanyká.

⁴Har káána gál ađaabano ubaa nyuogim hílléká hí maanyjasuoka, laatééllá it fás hí gaa okodicheká mán.

⁵Góf it um Waaˈgiet Waag hí gogofsichééllá inno hí ká bađay? Góf giri kieye, Inychú, af giri Máá Guđo Waag ˈgúllé atím ˈgayyóóllá ko tutunnoká, ˈgúl kinaallá ha hé ˈdúúw mánká ka dhaˈgáminy. Héétí mu ko a tatuoka, ha ginnâny.

⁶Hééllá he ˈdaa giri Máá Guđoká gál he giel-, umle hoteká tutuno-, a tatuoká,[37] yieká.

⁷ˈGúl Waag hí tutunóóllá, he hát mú umléká muí ká dhaˈgama. Iny máre ˈjaalle hí ma tutuniny?

⁸Waag hát umle tutunno-, af tatiyyóóllá hí af ma tiinyka, af kinaalka it mú umle muuniny, itín hí um éíy.

⁹Muun lulkúnno af giri ke ká guguđandheká hé idhaam lésalláka gáál af tatieká ke ˈgie. Atim kinaallá ˈdaalle ˈdugaka in ke idhaamkúnno giel, gáál ke gál ˈdúwaká ká dhaˈgama. Aaléka, ˈdaab máre ke ˈJaa kúnnaa uratiká met gaa kekeme, ke mú luolmít gaa aargira?

¹⁰Idhaamkúnno bár gáá gaaw-, múún gáál af gaa tatieká, gaal hát he taawueká in gáál af ki tatie. Tá Waag íín hé gáál ki midhabká ˈdaalle ˈdugaka in gáál af tatiyya, giri hát íín saas mánnallá muun ke gálle yegetká.

¹¹Atim giri gon hí gáál gaa boloonká hé gáál ger ma gaa memesiny. Tá atim kinaal héllé hí yé gáá ˈdeˈdeenká he naanná, giri gál atim kinaallá he gaa onodheká iđiny ˈdúwa-, Waaˈgietká gaa yíéđianká.

¹²Aaléka, gil kíchia hí gáá okoˈdééllá ubaa kurram kíchia đuurayyallá fargogonoyyíe.

¹³ˈGierim hí gaa seseenneká hí ˈgierim lođuđaataká onnow, giri ˈgas kíchia hélchóóllá ma ˈdeđenen-, farguogowká.[38]

¹⁴Itín gálaat lulle hol naanná ki yíéđinyle ˈdú laađamíe. Héétí iđiny ˈdúwa-, Waag hí ki feˈdeká ˈdú laađamíe. Har máádhat iđiny ˈdúwa-, Waaˈgiet kinaal manítaka, hé Máá Guđo Waag ma aargiriny.

¹⁵Tagkícho ˈdée! Máádhat hai Waag el af gaa táminy, ˈdúˈjím Waaˈgiet ˈdábiny. Hurtkícho hai ˈgór heđeʼ-, gáál shalal fafuo-, gál burnayká ˈdeđeneyoká hí gáá ˈdíiny.

¹⁶Máádhat hai hol buraa gaa seséminy. Héétí hai máá hát Ésawka Waag el ma gaa igirinyká onnôny. Ésáwallá he máá guchlé inyi erká haam kóony hí tikiˈdeká hidhdheká.

¹⁷Hát káána hí ógallá, hé kinaal el ˈdaal Ésaw hát he fedeká, ˈjaalle ˈdú ˈguunuminy urgúaka baabá hí inylé guđoká ˈdú ˈgunnuanká hí ˈdú ˈgunnuanká he fede. Har úba Ésaw buoy-, gil efe-, ˈdú ˈguunuminy kinaal aargireká fedeka, hé ˈdú ˈguunuminy kinaal ma árginy. Hé kinaallá he ˈdaa giri mu guchlé iny guđoká marte-, hát níínní geđi hol ka naasatká mánká.

¹⁸It gúm ke đig yeget-, ˈjiet hí gaa boloonno-, álle gaa ongʼoˈde-, nyáˈdow chúgká ˈgayyo-, waanim guguđoká hí gaa ˈdaraanká ma ˈdú gáá chímen.

¹⁹It ál faˈd shímle ubaa ˈdéé hót hí yé gáá ˈdeˈdeennoká ma ˈdú gáá chímen. Af giri gál Yisirayel Waag ˈdeenyle Gúm Sanai yé gáá ˈdeˈdemeká maaleká, gáál sierm hí faanne, gaal Móshe gil ki efe, giri Waag geđi gáál ma ká geđinyká.

²⁰Hemurit Waag hí gáál ki muˈde-, kieye, har máádhat yíekaʼ, any yíekaʼ gúm đig yieka, đo gaalí waar ki tuno, gaalí yies,[39] chieká hé hát níínní gaalí met ki ˈdeˈdemeká mán.

²¹ˈDaa giri gúm yaalmitlééllá gáál sierm fafiyyeká in Móshe kieye, Yáá tág sierm ye faanne, fađane, yie.

²²Gúm kinaal afleka, it aalé Gúm Siyon álle Waag ali iđóóllá ˈjienlé Yerusalem urietallá hí gaa ˈgíéllá ˈdú gáá chimie. It gál ˈgasso-, urru-, Waaˈgiet-, giri shíí shíí-, nyésébíchle ger hí gaa meedheká úba ˈdú gáá chimie.

²³It Waag gállé guch um erká aargiro-, meetle Waag hí úr gaa veeˈdeká hol ˈdú faanne. It Waag gálaat lulle hol eiy gaa nanniyyo-, ubaa sidham gál Waag hí ˈduwayche-, ur Waaˈgiet hileká ˈdú gáá chimie.

²⁴It he hol af iđiny kaanáállá máállé múún ubaa Waag gáál hol higilsuo-, Yíésu lééllá ubaa mú fáslé muí gáál ki ˈdaraanká úba ˈdú gáá chimie. Yíésu fásle rúbách he hogodhóóllá hé hala fás Abel hí hogodhóóllá ˈdú ˈdúwa.

²⁵Hol ˈdeeˈdemíe. Haí Waag ˈdéé hogotóóllá af đíiny. Gaal af giri máá hí Waag ˈdeenyle lésallá gaa shigieká af điidheká hé he il hí argiyye. Tá muun har ke Waag úr ˈdéé gáá hogoto-, gáál geđichóóllá ke el af gaa tameka, af kinaalka he ˈdaab máre il hí gáál aargiˈda?

²⁶Af giri Waag Gúm Sanai ˈdéé gáá hogoteká les motiyye. Tá káána mu hé gáál ˈdéé af iđie, kieye, Yáá aalé geđi les tákámle ma muotisiny, úr úba ha yú muotisia,[40] he yie.

²⁷ˈDéé hót giri kieye, Aalé geđi, chíéllá, hélle kieye, he met lullé Waag hí ká kuonnééllá Waag haí muotosicha, ali haí gaa egeyye, giri hé biiyo-, ma motominyká tákámle ka ˈgiisatká.

²⁸Aaléka, ˈdaa giri muun ke guch biiyo-, ma motominyká higiloká, kí Waag gielmít hol ˈdú naanuo, hát mú kian ubaa mú ˈduuwle ónyiká kí mú hújíchle naanuo.

²⁹Hééllá he ˈdaa giri Waagkúnno he hát ˈjiet he af ki shugunatoká.[41]