Read daasanach Héberew 13 Bible Online

Héberew 13 - daasanach bible

Héberew 13

¹Hát gál hol ki đalidhekáka hol ka geelnée.

²Dheeg hí mé guđáan chegetoká haí điđídhminy. Gál urru-, ˈgasso-, Waaˈgietká hé bárká hát dheegka ká yiimie-, gál hí mé guđáan yegieká, hát gaal he gál ˈgasso-, urru-, Waaˈgietallá hé moonnoy.

³Gál hiigin gaa ijoká táb ˈduoˈdodhíe, ˈdú reerebée. Gáál hiiginle hát hiiginkícho ka eedhdhíe. Héétí gáál manyjanylé gaalí maanyjasúóllá hát manyjanykícho ka eedhdhíe.

⁴Gálaat lulle hí hol shuunan ˈduuwle onnow, gál hol shuunneká hai hol ˈdú burúminy. Gál herginy ađááb ˈgayyoká gaa seseenká ubaa gál hol buruanká Waag ˈdéé haí ki iđimicha.

⁵Haí gál kamúr ˈgar aayaˈgoká onnôny, hé hí ˈgayyoká hí gaa ˈduo. Waag kieye, Yáá gon hí ma haađiny, yáá hát níínní hí hayoká mán,[42] he chie.

⁶Hát ke hééllá ˈduuwle ógká in ki kieye, Máá Guđo Waag he Máá chia ye ˈdú ˈjeˈjeenká, yáá hé níínní ye sierm fafuoká mán. Máádhat meete ye ki ekemeye?[43] ke yegedhe.

⁷Gál hí met ki ˈgie-, hí ˈdeeny Waaˈgiet oonisúóllá táb ˈduoˈdodhíe. Gaal húgúmlé he ki ijoká héllé midhab hí yé gáá ˈdeˈdeená mé ka gáa. Gaal iiy yeenlé Waag ka ˈguoká úba ennée.

⁸Yiesu Kirísto hé hol ma gaa sorominy. Mu he máá tikiˈde gefere-, ubaa kulichallo-, tá biiyoká.

⁹Ha he onisiny met hí hol ká eiyye-, ˈdeeny ˈdúwa-, hí onotééllá gaa taakaká hí láan. Gerkícho ˈdúˈjím Waaˈgiet hí fargoogonoychoka kalat. Nyatalaam ˈdaa ˈguomietáka gálaat hí hol af tág ki koyallá gíl sug ki hayyíe. Nyatalaam hatallóóllá gál hí el gaa veereká hé ál níínní yé ˈdú ˈdieká mán.

¹⁰Muun hé ke kúb-, gál ˈBíl ˈbaaro Waaˈgietká hujich gaa nannuoká hí fargogintle mán-, hí he ˈdug ma gaa kokonyká ˈguo.

¹¹Máá méte suoryoká wár tikiˈdeká af tikiˈde fás aanyiet ˈdaa ađaabano ubaa nyuogim gálaatáka Al Súm ˈDúwa-, Kiatoká ˈdú egedhe. Aany kinaallá é sugo gaalí ˈjiet ki verene.

¹²Hát tikiˈde kinaallá in Yíésu úba é sug he il hí gaa argiyye, kufe, giri fásle ˈdaalleka gálaat ađaabano ubaa nyuogim gaa dhidhiroká.

¹³Aaléka, kí mú é sug ˈdú siet, eesheny muí arge kinaal úba il hí gáál argiyyo.

¹⁴Lésalláka hé ke ˈjien bííyyoká ka mán, muun ˈjien geđ igiroká ki met egese.

¹⁵Aaléka, Yíésu ˈdaalle ˈdugaka, meeny ke Waag memeyoká hí hé shiicho ke taalle Waag shiguoká yeet. Muuni ke kieye, Muun Yíésu ke el gaa igira, ke yegetallá, meeny ke Waag memeyo kinaallá hí hé agerkúnno yé gáá ˈdeˈdeenká yeet.

¹⁶Hé midhabká hí hol ki ekemeychoká ekenyle haí hâny. He ekeny hatallóóllá he hé shiicho-, ke Waag shiguo-, Waag geer gaa memesuoká.

¹⁷Gál hí met ki ˈgíéllá he gál sidhamkícho ˈdaalle ˈdugaka hí ˈdeˈdeen-, aadh ˈdaatika hújích lééllá ˈdeenyle Waag met gaa hogodhoká. Gáál met gaa keekemíe, gáál atimle el gaa veerée, giri gaal hújích lééllá nannuo-, gaal ma giinany-, gáál ger hí gaa memeetká. Har itín hí gáál ger gaa ˈdeeneycheka, hé kinaallá hé hí ma ki midhanany.

¹⁸Nyí Waag kí viivitíe. Nyiin hát hé ˈdúwaká nyí ekemeychoká nyáá nyí óg. He lulle hát ˈduwantiká nyí gaa iđaká nyí feˈde.

¹⁹Hé yú hí súm net ˈdú gagadhoká he itín hí ye Waag kí vivisat-, giri yú hí ál ˈjob hol ˈdú gáá nannaatká.

²⁰Aaléka, Waag Máá kúnnaa Guđo-, ˈdúwa-, wála ˈdeˈdeen-, Yíésu lé-, ˈdaa fásleka he hol af iđiny biiyóóllá ˈduwayallá uushich yé gáá ˈdeeyche. Waag ííni naanná ˈgayyóóllá hí he lullé ˈduuˈdúwaká gerkícho fiiyyo, giri hé midhab muí itín gaa fedoká hí ekemeychoká. Waag hí ˈdaa Yiesu Kiristoka gerkúnno hujich gaa naanniyyo, hí muun gál mú geer gaa memesuoká hoycho. Aaléka, kí Yiesu Kirístóóllá taalle bííyyo meemeyo. Iiy-hí, he hí hát kinaallá yeet.

²²Nyaaramchú, ˈdéé hót chia gáá gaaw-, yú hí ˈdu gáá veere-, yú hí ki gogofsúóllá ger midhabká ki eedhdhíe.

²³Onnóo, nyár kúnnaa Tímote hé gaalí ká fure. Tá mu har ál ˈjob gáá ˈjieka, mú hollo nyí hol ká egeete, afo ke hí kí ˈdeeme.

²⁴Gál kíchia hí met ki ˈgíéllá ubaa gál Waaˈgiet al kinaalloká lulle ye naa kí yeedhíe. Gál Talyanallá hé hí naa ká yie.

²⁵Lulkícho Waag hí ˈdú ˈjeeˈjeen.