Read daasanach Héberew 4 Bible Online

Héberew 4 - daasanach bible

Héberew 4

¹Waag he af iđinylé giri gálaat mú állé him ki nimiká higiloká hátle hé ali taal. Aaléka, kí sierm ˈguo, giri itín mú tikiˈd úba ál him ki nimííllá hilitle ma gaa ˈdaabinyká.

²Hát káána gaal íín ál him ki nimiká fayamlé midhabká maalééllá, in muun úba ke Fayam Midhaballá maale. Tá ˈdaa giri gaal fayám maale-, kor fayám iiy ma yéenká in gaal ál him ki nimi kinaallá ma híliny.

³Tá múúni ke Fayam Midhaballá iiy yegetallá hé ke ál him ki nimííllá higilo. Tá gál Waag iiy ma yéenká ˈdaalleka, Waag kieye, Yú idhane, hol ˈdodhdhe, Gálallá hé ál chia him ki nimííllá ma higilinyo yú yie,[16] Waag hí chie. Tá ál him ki nimííllá af giri les ká kuoniny hújíchle Waag gaa đuyyeká hé ali iđe.

⁴Warˈgat Waaˈgiet ali tikiˈd kúlích ki tiiyaká ˈdaalleka ˈdeenyééllá he hote, kieye, Waag he lullé tág nanniyyeká hújíchle hí gaa đue, kúlích ki tiiyaká héf ˈgisate,[17] he chie.

⁵Tá állá Waag hé geđi kieye, Gálallá hé ál chia him ki nimííllá ma higilinyo he chie.

⁶Aaléka, ˈdaa giri ál him ki nimi-, gálaat hí higiloká ali iđo-, tá gál héle ál kinaal fayamle maaleká Waag af đuˈduse-, ali ma hílinyká,

⁷Waag hé geđi kúlích gálaat hí ál him ki nimííllá gaa higiloká gáál ki muˈde. Kúlích kinaallá he kúlíchallá, hát káána Waag hí biiy el ˈdaal ár ˈDawuˈd gaa hote-, kieye, Kúlíchallá har hí Waag afle maalleka, haí met googonôny,[18] chieká.

⁸Lés Yóshua hí héle gál Yisirayel hilsieká hé ál him ki nimííllá muuniny. Har lés kinaal he ál him ki nimííl kátaka, af kinaalka Waag háteka geđi kúlích éíy taaka-, him gaa nimiká ˈdeenyle hotéel?

⁹Aaléka, biiy hé héf ˈgisan ˈdúwa-, gál Waaˈgiet hí higiloká hí gaa iđo.

¹⁰Hát tikiˈde Waag hújíchle héf gaa ˈgisatééllá, máádhat Waag állé him ki nimííllá hileka, in hújíchle úba héf gaa ˈgiita.

¹¹Aaléka, kí laađaan, kí Waag állé him ki nimííllá hilo, giri muun mú tikiˈd hát gál héle Waag af đuˈdusekáka ˈboy ma ˈdeeminy-, ma baađanyká.

¹²Aalé ˈdeeny Waaˈgiet he ˈdeeny luolmiti-, fargogínt ˈguo-, faaˈd ˈdinnam hullaalle gáá alléká ˈdú alléká. Hát faaˈd laf hol af eiy gaa okodmicho-, ubaa hát faaˈd lafit muˈdeka ˈdiiny ˈdú ˈjeˈjeennokáka, ˈdeeny Waaˈgiet máádháto geer higila, mú tawunyle ubaa mu héllé geer ka ˈguoká og. Héétí mu héllé he geer ka ˈguo-, fedoká har hé Hím Naasan Waaˈgiet hí fedoká kátaka he eiy nannaa.

¹³He met lullé Waag hí ka kuonnééllá hé níínní Waag metleka kaany gaa ijoká mán. Waag hé he lulle argiyyo, innumleka he met lulle hé gaa édhká tákáma. Mu íínííllá he Máá ke hékúnno met gaa hogodhoká.

¹⁴Aaléka, ˈdaa giri ke Máá Guđo-, méte suoryo-, úr mé nie-, Iny Waaˈgiet Yíésu lééllá ke ˈgúóllá, iiy yeen ke mú ka ˈgúóllá kí tág chirat.

¹⁵Muun hé ke máá méte suoryo-, đalimkúnno geer kurshamle mánká mán, tá Máá ki ˈguoká he Máá hát múúnka Sátan hí hát lulle ki ekesete-, kor íín dhúrle ađááb ma hílinyká.

¹⁶Aaléka, kí Waag karallé kansimo-, álle ke ˈdúˈjím gaa aargiroká hát sierm mantiká ˈdú siet, giri muun ke Waag geer guurá ubaa ˈdúˈjím gaa aargiro-, tá Waag aleđugul giri tagléká muun gáál gíl kí helmichoká.