Read daasanach Héberew 5 Bible Online

Héberew 5 - daasanach bible

Héberew 5

¹Ameeny máá méte suoryoká Waago hí gálaat gáá waarate, gálaat ˈdaalle ˈdugaka in Waag hí hujich mé ki koyye, giri mu hé shiicho gálaatká Waag shiguo-, Waag metle ađaabano ubaa nyuogim gálaat suoryamle ˈgaˈgaloká.[19]

²Mu gál he hol eiy ma gaa nannasan-, gaalí bađisieká hé nog ki seseen, ˈdaa giri đalim gálaat hí ˈgúóllá mu íín úba hí ˈguoká.

³Hééllá ˈdaalle ˈdugaka in mu gálaat ađaabanolle suoryamle tákámle Waag met ma gaa ˈgaˈgaliny, mu úba ađaabanolle suoryamle Waag met gaa ˈgaˈgala.

⁴Hé máá níínní hol egew-, hol ˈduwasuo-, hol máá méte suoryoká hođuoká mán. Hát tikiˈde Ááron Waag hí hújích suoryóóllá kí viiyyééllá, in máádhat Waag hí ká veenne, Waag hí hújíchallá mé ki kokoyyo.

⁵Hát tikiˈdééllá Kirísto úba hé hol ma ˈduwasîny, hol máá méte suoryoká ma ka hôny. He Waago mú ˈduwasiche, mú geeyche, kieye, Kuun he Inychú, kúlíchallá yáá ˈJaakú yie,[20] mú chie.

⁶Warˈgat Waaˈgiet ali tikiˈd Waag úba hí gaa kieye, Kuun hát Melkíseˈdegka taalle bííyyo máá suoryo,[21] he mú chie.

⁷Bár giri Yíésu les ˈdug ˈdú ijeká mu hé Máá fargogint gálaat kúfach gáá bibisichoká ˈguoká gil ki egefe, hé mú af gaa guđoká ki vivite, imiro ˈjiibie. Tá ˈdaa giri mu Waag kian ka ˈguoká mú hé Waag hí af maalle.

⁸Har káána mu úba Iny Waaˈgiet kátaka, mu hé manyjanyléélláka Waag met gaa kím gaa onodhe.

⁹Aalé mu hújích Waag hí ali ˈdu gáá kaayyeká beeteká, mu hé gál lullé hí af ˈduwasuoká hí máállé rubachiet-, gaal íín hí luolmit biiyoká gaa aargiroká yie.

¹⁰Mu hát Melkíseˈdegka hé Waag hí Máá méte suoryoká hoyche.

¹¹ˈDeenyééllá hé guđo nyí gaa hogotoká nyáá nyí ˈgayya, tá ˈdaa giri itín hí nee gaa guogoká in hééllá ke hí eiy kí nannuoká fargogo.

¹²Itín onnônyka aféél it gál gálaat ˈdeeny Waaˈgiet oonisuoká chie, kor káána hátle geđi máá hí ˈdeeny Waaˈgiet onisinyle mé kí kokootká hí hegesete. Itín hát hí um nigini-, een tákámle igian-, ˈguom gogiyyoká kóony aleđuđugulle ma ka ˈdônyká.

¹³Ameeny máá hátle ˈdeeny Waaˈgiet ˈdúwáállá ma ónnonká he hát veel ninni-, een tákámle igianká.

¹⁴Tá ˈguom gogiyyoká gálle íín he gál ˈdeeny Waaˈgiet ki hiray-, kás kaadhdhe-, hé midhabká ubaa hé ˈdeewká hol eiy gaa nannasatká.