Read daasanach Héberew 6 Bible Online

Héberew 6 - daasanach bible

Héberew 6

¹Aaléka, ha ke he onisiny erkob-, Kiristo-, ke onodheká taalle gaa íđiny, kí biiy met ki siet, giri ke mú ˈdeenyle ki higirawká. Hé erkob ke onodhe-, hát káána he ekeny ˈdúúw mánká ke haađuo-, ke Waag iiy yeen ká ˈguoká, hé kinaallá he hé ke ógká muunîny?

²Héétí he onisiny bie gim naan met hí hol ká eiyyeká ubaa gálaat gil ˈdú fímle atimlé, tá gálaat uushim yiem gáá ˈdímle he onisinylé, ubaa Waag ˈdéé ki iđiny gálaat ki iđimichoká hát biiyoká úba he hé ke onodheká.

³Aalé har Waag hí feˈdoka, biiy met ha ke ki seeme, hé éíy taaka úba ˈduuˈdúwaká ha ke oonoodho.

⁴Gál giri Waag hí fayam Kiristóóllá kí edhesiche-, hé shiicho uratiká óg-, Hím Naasan Waaˈgiet hol chiˈde-,

⁵ˈdeeny Waaˈgiet midhantle ubaa bár ka chiimetatíá guchle fargogintle óg-,

⁶tá Waag af gaa tameká, hé hát níínní gaalí hol ká nuo-, Waag makan faanká mán. Gaal íín dhúrle geđi Kirísto he ˈgór đarám yaalká ˈdú ˈdoy, mú gálaat met gaa eeshey.

⁷Lés bíé iriet guđoká igiannoká ˈguom guđoká hí gáá higita. ˈGuomlé kinaal máá hí fafuoká geer gaa memesicha. Lés kinaallá ˈdúˈjím Waaˈgieto aargiˈda.

⁸Lés hii tákámle hí gáá ˈdeˈdeenká hé ˈdúúw mán. Máá hí fieká ál ˈjóbo hí ki waaˈgata, hí jiet gaa verene.

⁹It sheel kínyia ke hí gielallo, hééllá har káána úba nyí hatal hogotoka, hát itín hí ma ki yaalinyká nyáá nyí óg. Nyiin hé ˈduuˈdúwa-, rubachietká hát ˈdaakícho ki yaalká nyáá nyí og.

¹⁰Ta Waag hé máá hé ˈdúwaká ma ekemenyká muuniny. Hújích mú ˈdaalleka hí nanniyyeká ubaa gielmit hí mú argisiche-, giri hí mú gálle yiir gaa chichirate-, tá hátle káána úba hí gáál yiir gaa chichiratóóllá hé hí in ma ká baađany.

¹¹Itín hé ke hí gaa fedoká, he giri ˈdaab hí les ˈdug ˈdú iđáállá yaalmit kíchia gielmitííllá taalle hí ki iđa-, hé biiy meto-, hí súm egeteká hát ˈduuwawká hí met gaa ógká.

¹²Hát kinaallá hí ˈgiiyyaka, it gál he ma urinyká ma chegen, yaalmit gálle Waag iiy yeen ká ˈguo-, he met ki chichirsat-, hé Waag hí af iđicheká aargiroká hí cheedhe.

¹³Waag ˈdaa giri máá níínní hí ˈdú guđanay-, ˈdoˈdoote-, mánká, in af giri Abirááyam he af iđicheká hol ˈdoote,

¹⁴kieye, Kúún gon ha yú ko ˈdú ˈjeeme, ˈbíl íl kuun ko yé gáá ˈdeennoká súmo yú hegersia,[22] chie.

¹⁵Aaléka Abirááyam hé ma ˈgorôny, hé Waag hí hotéél af yíéđie, in el ˈdaal hé Waag hí af iđichééllá arge.

¹⁶ˈDaa gálaatka, máádhat máá hí ˈdú ˈdúwaká he ˈdoˈdodhdho. Mu máá hat kinaallóóllá ˈdodhdheka, hát he ˈduuwasuoká hé gálaat hí óg, shalal đo me haí ˈgidhe.

¹⁷Waag úba hé hol ˈdoote, giri gál mú he af iđinyle hélle aargiroká Waag hát ˈdéé hótle ˈduuwaycho-, hol ma gaa laaminyká ógká.

¹⁸Aalé ˈdaa giri Waag hát níínní hódho hoto-, mánká, in he af iđinyle ubaa hol ˈdoonle hol ma gaa laaminy. Hé naamáállá múúni ke Waag makan famééllá gáál góf guđoká shigia. Múúnííllá he gál rúbách biiyo-, Waag hí gáál af iđichééllá ki yaal-, met egesoká.

¹⁹Rúbách biiyo-, ke met egesóóllá he hé fargogo-, ke ˈduuwle óg-, gáál el mé les ki chichirat-, ke ma wawaminy-, ke Ál Súm ˈDúwa-, Waag hí gaa iđoká higiloká.

²⁰ˈDaakúnno ˈdugaka in Yíésu Ál Súm ˈDúwa kinaallá muun gáál met hile. Mu hát yaalmit Melkiseˈdegkáka hé Máá méte suoryo-, biiyoká yie.