Read daasanach Héberew 7 Bible Online

Héberew 7 - daasanach bible

Héberew 7

¹Máá Melkíseˈdeg lééllá he máá kánsích Salem ubaa Waag Úr Iđoká máállé suoryo-, onnoyká. Máállá he máá Abirááyam af giri gál kaansúoká hol yies-, mu gáál ka adhdhe-, tá ka gagalleká mú hol met kí ˈdoy-, mú ˈdú ˈguunumeká.

²Aalé Abirááyam héllé lulle ká uuneká met tomon eiy ká mumure, mé tikiˈd mú shie. Meeny Melkíseˈdeg lééllá hélle er kieye, Kánsích hé ˈdúwaká ekemeyoká. Héétí Kánsích Salem gaalí mú yíéllá, hélle kieye, Naanná Kánsíchlé.

³Máállá hé ˈjaalle ubaa ˈjielle, héétí hídh he yé gáá ˈdieká hé ke muog. Mu kúlích gaa ˈdalidheká ubaa kúlích gaa kufeká hé úba ke muog. Tá mu hát Iny Waaˈgiet máá suoryo-, biiyóóllá he ká yaalla.

⁴Ebá, Melkíseˈdeg guchle dhaayyíe! Eshim eshimkúnno máállé er-, Abirááyamlééllá héllé ka uune-, he met tomon eiy ka mumureká hé meeny súm midhabká Melkíseˈdeg shie.

⁵Hemurit Waaˈgiet Móshe hí ˈbíl íl Levi shieká he giri gálaat héllé ˈguoká met tomon eiy ká mumuro-, met taat gál Levi suoryoká ˈdú sisidhoká. Gál gál suoryoká hé shiichóóllá ˈdú sisidhoká he gáál nyaaramlé Yisirayel-, hát káána gaal íínka úba Abirááyam yé gáá ˈdíéllá.

⁶Tá Melkíseˈdeg har úba ˈbíl íl Levi yé ma gáá ˈdíinyka, hé Abirááyam hí met tomon eiy ka mumureká hé mé tikiˈd arge, mu hé Abirááyam Waag hí he af iđichééllá ˈdú ˈguunume.

⁷Hé fálaam mán-, ke ógká, he kieye, máádhat máá hí ˈdú guđoká in hí ˈdú ˈgunuma.

⁸Gál suoryo-, Levi-, gaalí hé shiichóóllá ˈdú sisidhoká he gál aadh ˈdaatika kufunanká. Tá ˈdaa Melkiseˈdegka warˈgát kieye, mu hé ali ijo, he chie.

⁹Hééllá ke dhaayka, gál suoryo-, Levi-, gaalí hé shiicho ˈdú sisidhóóllá úba hé shiicho he aargire kinaallá eiy mumure, gaal Abirááyam ˈdaalleka he met taat Melkíseˈdeg ki shigie.

¹⁰Hééllá he ˈdaa giri Abirááyam af giri Melkíseˈdeg hol met kí ˈdoyká Lévi íín gón eshi ˈjaallé Abirááyamlééllá gaa ijeká.

¹¹Émeeny Levi hemuumurit Móshe hí shieká he giri gaal gál suoryo-, yeget-, hújích suoryoká lulle nannuoká muunîny? Tá har hújích gál suoryo-, Levi kinaal gálaat ađaabanolle lúl gaa dhidhireka, Waag háteeye geđi máá éíy taaka-, suoryo-, hát Melkíseˈdeg-, hídh máá Levi-, Aaronlééllá yé ma gáá ˈdíinyallá ká eeyye?

¹²ˈDaa giri Waag yaalmit kisso-, suoryoká ali gaa eeyye-, yaalmit éíy taaka-, kaanáállá yé ká ˈdeeycheká in mu úba hemuumurit kissoká taak koyye, ˈgíérích kaanáállá yé ká ˈdeey.

¹³Máá suoryo-, ke ˈdeenyle hogodhóóllá émeenyle émeeny Levi gaa taaka. Máállá émeenyle hé máállé níínní kálta kúb suoryo-, Waaˈgietká álle hujich gaa nieká mán.

¹⁴Múún hé ke ógká he kieye, Máá kúnnaa Guđo Yíésu lééllá he máá émeeny Yuuˈda. Tá Móshe émeeny Yuuˈda kinaallá gálle hát gál suoryoká hé ma hôn.

¹⁵ˈDaa giri máá éíy taaka-, Yíésu lééllá hát Melkíseˈdegka máá suoryo yíéllá in Waag hát ˈgíérích kaanáállá yé ká ˈdeeychééllá ke tág ˈduuwle og.

¹⁶Máá kúnnaa Guđo-, máá suoryo yíéllá hé ˈdaa hemurit giri kieye, máá suoryoká hí émeeny Levi yé gáá ˈdie, chieká ma kí yímen, mu fargogint luolmit biiyoká ˈdaallé he máá suoryo ki yie.

¹⁷Warˈgat Waaˈgiet mú ˈdaalleka kieye, Hát Melkíseˈdegka, kuun taalle bííyyo máá suoryo,[23] he chie.

¹⁸Aaléka, hemuumurit kissoká ˈdaa giri fargogint ˈdúwaká mannayyeká in Waag hí taak koyye.

¹⁹Hemuumurit kinaallá hé hé níínní hát ˈdabaanká đuđusicheká mán. Aalé káánaka, ˈgíérích éíy taaka-, ˈgíérích kisso kinaal súm ˈdú ˈdúwa-, ke iiy yegetká hé Waag hí muun gáál ka shiiche. ˈGíéríchallá in muun gáál Waag kí ˈjoobonoyo.

²⁰ˈGíérích ˈdúwa-, kaanallóóllá Waag hol ˈdoonlé ˈdaalle ki fargogoyye. Gál guđóótíá af giri Waag hí gál suoryo-, hođicheká Waag hé hol ma ˈdóon.

²¹Tá Máá kúnnaa Guđóóllá Waag hí máá suoryo hođicheká Waag hé hol ˈdoote, hát warˈgát hí hote-, kieye, Máá Guđo Waag hé hol ˈdodhdhe, mu hé kasle hol ma gaa laaminy. Mu kieye, Kuun taalle bííyyo máá suoryo, he mú yie,[24] warˈgát hí chieká.

²²Waag hol ˈdoonlééllá ˈdaalleka in ke he hol af iđiny kaana-, Yíésu hí Waag ubaa gálaat hol hilsíéllá hát he hol af idiny kissoká ˈdú ˈdúwaká ke tág og.

²³Meeny gíríítíá gál suoryoká hé burnayká. Gaal ˈdaa giri kufumeká in alblé suoryoká ma chochony.

²⁴Tá Yíésu íín ˈdaa giri bííyyo ali ijoká, mu he taalle bííyyo máá kúnnaa suoryoká.

²⁵ˈDaa kinaallá in mu fargogínt ˈgaa, giri gál mú ˈdaalleka Waag ˈdú gáá yiimetká muí ririanká. Mu íín taalle bííyyo hé ali ijo, giri gál hí gáá nannaatká ˈdaalle ˈdugaka gáál Waag ki ruogononká.

²⁶Mu he Máá méte suoryo-, muun ke hegesetká. Mu íín he máá Waag geer gaa memesuoká. Mu hé hé ˈdeeđeneyká mán, héétí mu hé ađaab níínní úba hileká mán. Waag hé lés gál ađaabano ˈgúóllá hí gaa ijóóllá mú gaa eete, mu hé he met lullé uratiká máállé hí mé ki yaalká yie.

²⁷Mu íín hé hát gál méte suoryo-, aadh lulle suoryam ˈgaˈgalo-, suor ˈgaˈgaloká erkob suor ađaabanolle ˈgaˈgalat-, he đueká gálaat ađaabanolle suor ki ˈgaˈgalóótíá muuniny. Mú íín suorle af hí tikiˈde, giri mu dhúrle ˈdaa ađaabano gálaatka sídhle sillieká.

²⁸Hemuumurit Waaˈgiet Móshe hí gáál shieká gálaat gál méte suoryoká hoyche. Tá gál kinaallá íín hát gáláát aađaká hé đalimle ˈgie. Tá hemuumurit Móshe hí gáál ka shíéllá el ˈdaal Waag hol ˈdoote, in Inyle ˈduwayche, mú Máá méte suoryo-, biiyoká hoyche.