Read daasanach Yákob 4 Bible Online

Yákob 4 - daasanach bible

Yákob 4

¹Hurt kíchiallá oosom ubaa hol ídho meete hí yé ká ˈdeđia? Hé kinaal hé he fedit gónkícho hí ká lalaanal yé ma gáá ˈdeˈdemîny?

²Itín hí he feˈde, kor hí he má aargiˈda. Itín hí oos ˈgayya, hí gajált kaata, kor hé hí feˈdeká hí má aargiˈda. Hí hol idhansicha, hí hol tunna, kor hí he má aargiˈda. Hééllá ˈdaa giri hí Waag ma hegesenká in hí ma ki aargiriny.

³Hé hí Waag hegesetoká hí ma aargirinyallá he ˈdaa giri hí he yaalmit tagle muuninyká ki hegeseto-, hé onnônyka hí mú gaa aargiˈdoká hí taalle he fedit gónkícho ki nannasatoká.

⁴It Waag af gaa taannéel, hé lesalloká geelnetle hát Waag nebítiká it múog? Máá hé lesalloká geelnetká kídhích Waaˈgieto hol hoy.

⁵ˈDéé hót ˈdaa kúnnoka Warˈgat Waaˈgiet gaa iđoká kieye, Sidham muun gáál gaa ijóóllá hé tág gajált ˈguo, chieká, hálééllo hatal chie?

⁶Tá Waag hé tág súm muun gáál ˈdú ˈjeˈjeen. Héél ˈdugaka in Warˈgat Waaˈgiet kieye, Waag hé gál hol memeyoká điđidhan, tá gál hol ˈdúúw ririanká ˈdú ˈjeˈjeen,[8] chie.

⁷Aaléká, hol Waag gíl geer gaa káa, kídhích kúnnaa Sátan ká adhdhíe, mu met kar haí gaa ˈdarama.

⁸Waag kí ˈjobondhíe, Waag íín úba haí kí ˈjoobonto. It ađaabano ˈgayyáállo, gil ˈjidhdhíe! It ger hí nanamáállo, hol hé ˈdeđewká ka ridhdhíe!

⁹Ger hí gaa ˈdeenet, shiilmitíe, buoyyíe. Kósólkícho hí shiilmisan ki yeet, ger gaa meenkícho hí innum ˈdéént ki cheet.

¹⁰Waag innumle hol ˈdúúw gaa ría, Waag ˈdúúw haí ká shigicha.

¹¹Nyaaramchú, haí hol meet ˈdeđenêny. Máá nyárle ˈdeđenset-, muuninyka, mú ˈdéé ki iđimuoká, af kinaalka ííni Waag hemuumuritle ˈdeente, ˈdéé ki iđie. Kúún har hemuumurít ˈdéé ki iđimichoka, af kinaalka kó máá hemuumurít el gaa igiroká muuniny. Kuun he máá hemuumurít ˈdéé ki iđimuoká chie.

¹²Máá gáál hemuumurít ká shie-, gáál ˈdéé ki iđimuoká tikiˈd tákáma. Máá kinaallá ííni fargogint gáál ki ririanká ubaa fargogint gáál ki beđisatká ˈgaa. Tá kúún mááya, máá olkú ˈdéé ki iđimichóol?

¹³Aaléka, nee kóo, it halúg hí kieye, Kúlíchal yíekaʼ, beríka yíekaʼ, ˈjien mákártaká ki seeme, ki war tikiˈd gaa yíéđima, ki shokodaam gaa mamadia, ki birm aargira, hí chegetal!

¹⁴It hé berikaká muog. Iđinykícho hát meete ki yeedhe? Iđinykícho he hát nés les ˈdaraan-, đo ál ˈjob mán gaa yegetká.

¹⁵Itín, onnônyka, hééllá hí hogoto, Har Waag hí feˈdoka, les ˈdug ha ke ˈdú yíéđima, héél ubaa héétí ha ke nannaa, hí cheedhe.

¹⁶Kor itín káána, hollo hí hol memeyche, gál ˈdúwaká hí hol ká dhaˈgasanna. Tá hol meeny lullé hat kinaallóóllá hé tág ˈdeew.

¹⁷Aaléka, máá hé ˈdabaanká ekemeyoká óg-, kor he ma ekemenyká, máá kinaallá ađáábo he ˈgaa.