Read daasanach Yákob 5 Bible Online

Yákob 5 - daasanach bible

Yákob 5

¹Aaléka, it kaamúréel, ˈdaa giri hé farguogo-, ˈdeđewká hí kí ˈdeenká buoyyíe, koˈdam ˈdaaˈdía.

²Kamur kíchiallá hé moˈdoyye, geleemkícho hé tabaˈd hí koey.

³Hórkíkícho ubaa birmkícho hé kosoyye. Kósle he ˈdúúw ˈdú ˈdímkícho, héétí hát ˈjietka, gón kíchia kokoo. Bííy barallo-, káána-, el met hí ˈgiˈgidhóóllá kamurkícho it guorchaam ki chie.

⁴Bá dhaayyíe, it gál hí ˈguom kí mureká símísle hol ma ˈdú níiny, símís kinaallá hí ki bebime. Gál ˈguomkícho mureká buonyle hé Máá Guđo-, fargogínt lulle ˈguoká nétle hí maalle.

⁵Iđiny kíchia lesalloká kamurle itle tákám kíchia hí ká kokonye, hí ki geyyeenne. Tá kúlích Waag hí gálaat ˈdéé ki iđimichoká bá ka ˈjobónte! Kor itín hí hát wala gegie-, meeny ˈgalan ˈguoká chíe!

⁶It gál hé konf ká ˈgie-, mán-, hí met il ma gaa ˈgíinyká ˈdeensete, hí ˈdeem ki iiđimiche, hí chiegies.

⁷Aaléka, nyaaramchú, hol táa, ˈjíig Máá Guđoká hí ká ˈjie. Ebá máá les fafuoká hát ˈguomle met egeso-, tá hol tatuo-, ír mísáchle met egesoká dhaayyíe.

⁸Máá Guđoká ˈjímle hé ká ˈjobondhe. Itín úba hol táa, iiy yeenkícho tág chiˈdíe.

⁹Nyaaramchú, horróo! Máá gálaat ˈdéé ki iđimuoká ˈbíl af yaal. Haí hol shalal fafîny, Waag hí ˈdéé ki iđîny.

¹⁰Nyaaramchú, ebá gál Máá Guđo Waag hí ˈdeem ka shigie-, gálaat ki ˈdiiyimeká hát manyjasiny il hí aargiˈde-, tá hol gaa tatieká, táb ˈdodhdhíe.

¹¹Bá dhaayyíe, gál af ˈginnime-, mé ki chichirte-, ma giníminyká gál Waag hí ˈdú ˈguunnuanneká ke yegie. Yôb hát af ˈginnimeká ití maalle, tá Máá Guđoká waaséél hát mú naannasieká it óg. Máá Guđoká hé geer ka shâw ubaa geer ka guurá ˈguo.

¹²Aalé káánaka, hé ˈdúwa-, yú hí geđuoká hééllá: Haí úr ubaa les ˈdoˈdóon, muuninyka, hí hé mákártaká ˈdoˈdóon. Iiy-hí kícho, hí iiy-hí onnoyyo, híʼi kícho, hí híʼi onnoyyo, giri itín Waag hí ma ˈdeđensenká.

¹³Itín mááya hé ˈdeđewká il hí aargiˈde? Máá he il hí aargiˈdeká hí Waag viivisat. Itín mááya geer hí gaa meedhe? Máá geer hí gaa meedheká hí arram gaalí Waag ki memeyoká ˈdaaraan.

¹⁴Itín mááya kúllaʼ? Máá kúllaká hí karu Kiristoká vie, mú gaalí Waag ki visat, gaalí ˈdaa Máá Guđoká meenyle salab ki lio.

¹⁵Gáál Waag visanlé iiy yeen ˈgayyoká máá kúllaká hai rianna. Máá Guđoká máá kúllaká les hai gaa egee, har mu he ađááb hileka, mú ađááb hai gaa egee.

¹⁶Aaléka, hé kíchia ˈdeđewká fayamle hol shía, tá hol Waag ki viivitíe, Waag hí bisicho. Máá Waag hát feˈdoká el gaa igiroká Waag visanle hé fargogínt ˈgayyo, hujich hai nanniyya.

¹⁷Elíya he máádhát, hát muunííllá. Mu héle les ˈdú ijeká Waag geerle lulle ki vite, Ir hai túniny, yie. Ir đo hé warram seđ tá ˈguiyam le ma gaa túniny.

¹⁸Aaléka, mu geđi Waag vite, Waag ír ruogone, Waag đo ír ká hayche, les geđi mite.

¹⁹Nyaaramchú, itín mú tikiˈd ˈgíérích ˈdúwáállá af gaa tamme-, tá máádhat hí af ká tieka,

²⁰hééllá mé ki eedhdhíe: Máá mú ˈgíérích ˈdúwáállá hol ˈdu gáá nannúóllá, mú kúfacho ká riridhdha, tá mú héllé ˈdeđew-, met hí hol ká burnayká ˈdeensenle mú Waag haí gaa egeyye.