Read daasanach Bétiro Erká 2 Bible Online

Bétiro Erká 2 - daasanach bible

Bétiro Erká 2

¹Aaléka, he lullé ˈdeđew-, hát káána điđám, nyiimisan, hódho, ubaa hinááf, tá kolkól hí gaa iđoká lulle hol ka ridhdhíe.

²Hát káána um nigini-, ˈbáˈdká ot eelle eenamle maralle ˈgúóllá, itín úba ˈdeeny Waaˈgiet maralle ˈgáa, giri ˈdeeny kinaal ˈdaalleka, hí rúbáchkícho ki higirayyoká.

³Hééllá he ˈdaa giri Waag hát midhabká hí kimisateká. [4]

⁴Aaléka, taalle hí Kirísto halúg wár luolmiti-, gálaat hí điidhe-, kor íín Waag hí galayche-, Waag ki ˈdúúwáállá hí enniannoka,

⁵itín úba hát hí waar luogol-, Waag hí ˈbílle ki ˈdiˈdisatoká. Itín úba hí Waag gállé suoryo-, Waag hí taak koote-, suor kíchia hodhinne-, hí Waag shigichoká ˈdaa Yiesu Kiristoka Waag hí met gaa egeetoká.

⁶Hát káána Warˈgat Waaˈgiet hí hote-, Waag kieye, Bá dhaayyíe, wár ˈdúwa-, ˈbíl guogoyo-, yú galayká Síyon[5] ha yú gaa iđimia. Wár kinaallá máá hí iiy yeetká hé máá hí kern ˈgiidhuoká mán,[6] chieká.

⁷Aaléka, it giri hí Yíésu iiy chíéllá, Yíésu ˈdaakíchoka he wár ˈdúwáállá. Tá gál Yíésu iiy ma yegenká ˈdeenyle hé Warˈgat Waaˈgiet hí hote-, giri kieye, Wár gál é ˈdiˈdisoká hí điidheká hé ˈbíl wárlé hí guogoyoká yie,[7] chieká.

⁸Héétí warˈgát hé úba kieye, Mu hé wár gálaat ˈgas met ki ˈdaraan-, gáál riigirsuoká ubaa nyátáábá gáál les ki ˈdaraanká yie,[8] chie. Gaal riigiróóllá he ˈdaa giri gaal fayám el ma gaa igirinyká, in Waag hí gáál ˈdú hayche.

⁹Tá itín he gál Waag hí galayche-, Waag ííni kansidhééllá hí mé tikiˈd hoyche-, hí gállé suoryoká hosote-, hí hol taak ki kooteká. Hé ˈduwa, itín he gál Waag híllé-, muí bííy gaa ongʼoˈdeká gáá vie-, muí édhúmlé ˈdúwaká hurt gaa iđite-, giri hí mú ˈduuwle memeychoká.

¹⁰Itín érléká it é méé muuniny, kor káána it Waag é meenyle chie. Waag hé érléká hí geer guurá ma aargisîny, kor káána hé hí geer guurá argisiche.

¹¹Sheel chia yú gielallo, gillo yú hí ki efe, ˈdaa giri itín hí lésal ma lileny-, égetkícho úratíká, balt gaa nyakaridhe-, sidhamkícho baađisichoká hol ka ridhdhíe.

¹²Gál Waag muogká yaalmisam ˈdúwaká hursam ki yíéđía. Har úba gaalí hé ˈdeđewká af kakaw-, gaalí ˈdeđensetka, hé ˈdúwa-, hí ekemeychoká gaalí argo, gaal hé kúlích Waag hí gáá ˈjeennoká Waag gaa meeyo.

¹³ˈDaa Máá Guđokáka, hemuumurit lesiet lulle gim gaa yíéđía, met gaa keekemíe. Hát káána máá les mé ki yaalká hemuumuritle yíekaʼ,

¹⁴héétí mú gállé hí ello-, muí alb fafuo-, gál hé ˈdeđewká ekemeyoká he il ká aargisuo-, gál hé ˈdúwaká ekemeyoká memeyoká hemuumuritle yíekaʼ, úba met gaa keekemíe.

¹⁵Waag hát he feˈdoká hééllá: Hé kíchia ˈdúwa-, hí ekemeychoká in ˈdeem hódho-, gál đéeská hí ˈdú hogodhoká shab hođia.

¹⁶Hát gál Waag hí mé fuˈdeká ka yíéđía, tá mé furit kíchia kinaallá hai mé furit hé ˈdeđewká met yuyuyyoká onnôny, gede Waaˈgiet ka yíéđía.

¹⁷Gálaat lulle gál ˈdúwaká ka dhaayyíe, nyaaram kíchia Kiristoká geelnedhíe. Waag kiikiadhíe, máá les mé ki yaalká úba máá ˈdúwaká ka dhaayyíe.

¹⁸Géde, gál kíchia hílléká hát lullé kian hí gaa iđoká met gaa keekemíe. Haí gál midhab-, abunaká tákámle met gaa kekéminy, gál hugum hí ˈdeew-, gálaat ugufoká úba met gaa keekemíe.

¹⁹Máádhat manyjasiny onnônyka il hí ma aargirinyká il hí taalle aargiˈdo-, tá ˈdaa giri mu Waag kikiatká mu mé ki chichirsatka, húgúm hat kinaallóóllá innum Waaˈgietka taglé.

²⁰Har káána hé ˈdeđew-, hí ekeycheká gaalí gaa tutuno-, kor hí mé ki chirsataka, gálaat kín haí meeye? Tá hé ˈdúwaká hí ekemeycho-, he il hí gaa aargiˈdo-, hí mé ki chichirsataka, húgúm hát kinaallóóllá innum Waaˈgietka taglé.

²¹ˈDaa giri Kirísto hí ˈdú manyjayká, in Waag hí yaalmitééllá kí viiyye, giri hí yaalmit Kiristóóllá enniannoká.

²²Mu hé Waag hí feˈdeká hé níínní gaa ˈdeeneyká mán, hé úba hodho hí af yé gáá ˈdieká mán.[9]

²³Mú gaalí chaachareká, mu hé chaarim chaarim agim nieká mán, mú he il hí argiyyeká, mu hé gáál ma suurˈgâny. Hé kinaallá lulle hé muí Waag gáál ˈdéé ki iđimicho-, gáál ˈdéé hát ˈdabaanká eiy kí nanniyyóóllá ˈdú hay.

²⁴Hé múún ki Waag ki ˈdeeđeneyká ˈdeentle mu ííni hí luut kaadhdhe, hí ˈgór đarám yaalká ˈdú eedhdhe, giri múún ki ađaabanokúnno ma gaa iđiny-, ke hát Waag hí feˈdoká yíéđianká. Aaléka, mú lilolle hé hí fayansie.

²⁵Itín érléká hát hí wala eiy bađayká, kor káána it Máá sidhamkícho ˈdeˈdeen-, sidham in gaa yaalká hol ˈdu gáá naate.