Read daasanach Bétiro Erká 3 Bible Online

Bétiro Erká 3 - daasanach bible

Bétiro Erká 3

¹ˈDége, hát tikiˈdééllá beelemkícho met gaa keekemíe, giri min bélle Fayam Midhaballá iiy ma yéenká, úba bélle ma geenyka, húgúmlé midhab he ˈgayyoká bélle Waag ˈdu gáá egewká.

²Hé kinaallá har húgúm kíchia midhaballá ubaa yaalmit kíchia hí Waag kian ka ˈgayyáállá beelemkícho hí argeka.

³Verekícho hai mé gamar gasankícho ubaa huraam faankícho, tá geleem hisankícho, héétí he lullé éíy taaka-, hatallo-, hí gónkícho ki buukaychaká yé gáá ˈdíiny.

⁴Verekícho hí vere hí hodhinaam ká ˈgayyaká onnoyyo, úba hí vere hugumiet ma ˈdeđenen-, abuniyyo-, sáaká onnoyyo. Vere hat kinaallóóllá innum Waaˈgietka hé ˈdúwa.

⁵Vere kinaallá in ˈdeg héle Waag hát ˈdabaanká el gaa igiˈde-, hé giri Waag hí gáál af iđicheká hát Waag hí ˈduuwasichoká onnoyyeká hí buukusate. ˈDeg kinaallá hé beelemle met gaa kekeenne.

⁶Hé kinaallá hát káána Sáára, giri béllé Abirááyam met gaa kekeenne-, mú máá chia guđoká chegieká. Har itín hí hé midhabká ekemeycho-, hí hol sierm ma fiinyka, af kinaalka itín hí Sáára hadallé.

⁷Beelem, ˈdaa giri ˈdegkícho đalimle hí ógká, ˈdég gálaam aargisía. Gaal íín ubaa itín shíícho Waaˈgiet luolmitiká ˈgarro hí hol aargiˈda. Aaléka, ˈdég gál ˈdúwaká ka dhaayyíe, giri Waag visankícho hé níínní hí ka momoyo mánká.

⁸Aaléka, lulkícho kas tikiˈde-, naannaká ki yíéđía. Ger kurshám ubaa gielmit gál hol nyaaramká hí hol ka ˈguoká ˈgáa. Héétí ger guurá ˈgany ubaa hol ˈdúúw rím ˈgáa.

⁹Haí hé ˈdeewká héllé ˈdeewká akaˈd madîny, muuninyka, chaarim haí chaarimle akaˈd madîny. Hé ˈdeewká Waag ki vím akaˈd madía. Hééllá ˈdugaka in Waag hí ká viiyye, giri hí ˈdú ˈguunnuminy Waaˈgiet aargiˈdaká.

¹⁰Hát Warˈgat Waaˈgiet hí hote-, warˈgát kieye, Máá iđiny midhab-, mé ˈdérká fedoká hí erelle hé ˈdeđewká ká riat, hí afle úba hé hođomká ká riat.

¹¹Muí hé ˈdeđewká gíl sug ki hayo, hí hé midhabká eekemeyo, hí naanná hol gaa ˈgieˈgedho, hí ˈgar aayaˈgo.

¹²Hééllá ˈdaa giri Máá kúnnaa Guđoká gál hí aadh lulle héllé fedoká ekemeyoká ˈdeˈdeen-, gáál Waag visanle nee kokuo-, tá inle gál hé ˈdeđewká ekemeyoká điidheká,[10] warˈgát hí chieká.

¹³Hé midhab-, hí ekemeychoká feditle hí ˈgayyaka, mááya hí he il ká aargisia?

¹⁴Har káána úba hé ˈdúwaká hí ˈdú manyjayyeka, Waag hé hí ˈdú ˈguunnuanne. Haí suurˈgany gálaat kikían, hí biirgisîny.[11]

¹⁵Tá ger kíchoka, Kirísto Máá Guđoká hotíe. Aadh lulle tagano ˈgée, giri gálaat hí iiy yeenkícho héllé hí met egeteká hí heeteka, hé hí gáál hol ˈdú nanniyyaká hí ˈgayyaká.

¹⁶Tá ˈdeenyééllá ere midhab-, sáaká ki hoogodhóo. Hé innum Waaˈgietka midhab-, hí ógká tákámle eekemeyyíe. Hát kinaallá in gál hé kíchia ˈdabaan-, ˈdaa Kiristoka hí ekemeychoká ˈdeentle hí ˈdú hogodhoká fichilitlé kinaal gálle dhúrle kern ˈgiidhicha.

¹⁷Waag har máádhat manyjany ki feˈdoka, kalat mu hí hé ˈdúwaká ˈdú manyjaw. Mu hai hé ˈdeewká ekêny, ˈdú manyjâny!

¹⁸Gálaat héllé ˈdeđewká ađaabanolle lulle ˈdugaka, Kirísto af tikiˈde hí ˈdú kufe. Máá saas níínní-, ˈguo-, mán kinaallá gál saas ˈguoká he ˈdú kufe, giri gáál Waag ˈdú egewká. Mú gonno gaalí gáá yies, tá Hím Naasan Waaˈgiet hé mú loolnoyche.

¹⁹Aalé mu Hím Naasan fargogintle ki sedhe, in gál Waag hí hiigiteká ki ˈdiiyime.

²⁰Gál Waag hí hiigitééllá he gál bár giri Nówa kádích guđoká tág nannieká Waag hol tatiyye-, Waag hí egete-, kor íín Waag af đuˈduseká. Kadich gál iraam mán-, síet-, hí gaa ijeká, bie hí ká taarsie, in ká bie.

²¹Yaalmit kinaallá héllé ke hol ki ekemeyoká he bie gim naan ubaa hát Waag hí rubach shiicheká. Bie gim naanééllá hé bíé hí hol símis ki dhidhiˈdaká muuniny. Bíéllá he yaalmit máádhat hí kasle hát Waag hí feˈdoká gaa iđimuoká. Máádhat af giri Yíésu iiy yie-, mú uushich yé gáá ˈdímle úba iiy yieká in Waag hí rubach shiiche.

²²Aalé Kirísto tikiˈde kinaallá in úr mé nie, káána Waag gíl ˈdaa naaniet ija, gál urru-, ˈgasso-, Waaˈgietká ubaa kansimano lullé met hí hol ká eiyyeká hí hemuumuritle gim gaa ija.