Read daasanach Bétiro Erká 4 Bible Online

Bétiro Erká 4 - daasanach bible

Bétiro Erká 4

¹Aaléka, hát Kirísto gon hí boloyyééllá, kas tikiˈde muí ˈgúóllá far ki googóo, máá gon hí boloonká hé ˈdeđewká haađuoká.

²Máá gon hí hatallá boloyyeká iđinylé lésallá ˈdú ijoká hé hát gálaat hí fedoká ma enniminy, mu hát Waag hí feˈdoká he yíéđima.

³It kíssóótí hé gál Waag muogká hí eekemey-, gálle kern mannay-, babát hí faanne-, bersham hí fafame-, hol hursam ki hergime-, ubaa waagam hódhoká viviteká úba it álle gaa seseenne, warram ki beesete.

⁴Gál hé ˈdeđewallá gaa seseenallá hé hí af ˈdaˈdabsuoká he gaal héllé fedo-, hol gáá mony mánnallá itín hí ma gaa seseminyká, in itle gaalí chaarim ˈdú mumura hállá!

⁵Tá gaal Waag gál luogolká ubaa gál kufeká ˈdéé ki iđimichoká metle héllé eekemeyká hai gaa hogodho.

⁶Hééllá ˈdaalle ˈdugaka in gál kufeká Fayam Midhaballá Kirísto hí ki ˈdiiyime, giri gaal har úba káána kúfách gonniet-, Waag hí gálaat lulle met iđicheká kufeka, gaal luolmit biiyo-, Waag hí ˈgayyoká kárle Hím Naasan Waaˈgiet gaa aargiroká.

⁷He lulle el mé ˈginle hé ká ˈjobondhe. Aaléka, tagano ˈdée, kas hí Waag ki vivisatoká ˈgáa.

⁸Hé súm ˈdúwaká hééllá: Hát ˈdabaanká hol geelnedhíe. Hééllá he ˈdaa giri gielmít hé burnay-, ˈdeđewká gíl sug ki haađichoká.

⁹Af giri hí hol dheegam ˈdú seseenneká, hol mé guđáan yiegedhíe, haí yiirsam fafáan.

¹⁰Máádhat hé shiicho-, Hím Naasan Waaˈgiet gaa argeká hí héllé shiicho kinaallá hújích Waaˈgiet gálaat ki naannuo, hí ˈdúˈjím Waaˈgiet hát ˈdabaanká hát lulle gálaat aargisuo.

¹¹Har máádhat héllé shiichoká ˈdeeny Waaˈgiet ˈdiiyiminy kátaka, hí ˈdéé hát ˈdabaan-, lođuđugulleká ˈdiiyeen. Mu har héllé shiichoká gálaat hát lulle kuol gaa chiran kátaka, hí fargogint Waag hí shigichoká hujich ki naannuo, giri he lulle ˈdaa Yiesu Kiristoka, Waag hí ˈdúúw gaa aargiˈdoká. ˈDuuw ubaa fargogínt taalle bííyyó biiyo hí Waag hélle yeet. Iiy-hí, he hí hát kinaallá yeet.

¹²Sheel chia yú gielallo, manyjasiny farguogiyyo-, hí he af kí dhaˈgasannoká il hí argiyyeka haí af ˈdábiny, hát hé aađaká ka dhaayyíe.

¹³Manyjany hát manyjasiny Kiristóóllá ka taalká il hí argiyyeka, taalle ger hí gaa meet, giri mú ˈduuwle ká edhdheyyeka súm ger hí gaa memeet-, hí geyyeenneká.

¹⁴ˈDaa giri Hím Naasan Waaˈgiet ˈdúúw ˈgayyoká hí buanneká, har gaalí meeny Kiristo ˈdaalle ki chaachareka, it Waag hí ˈdú ˈguunuanne.

¹⁵Har hí maanyjayyoka, manyjanykícho hai manyjany gálle gál gálaat yeges-, muuninyka, buruan-, tá gál hé ˈdeđewká gaa seseenká onnôny. Héétí hai manyjany gálle gál hé ma lilenyká ílle ˈguoká onnôny.

¹⁶Tá máádhat har Kirísto ˈdaalle ki manyjay-, he il hí argiyyeka, hai kern hí ˈgîn, ˈdaa giri mú Kirísto hílléká muí Waag meeyo.

¹⁷Aaléka, Waag aleđuđugul ˈbíl geerle ˈdéé ki iđimichoká ˈjóbo ali kí ˈdeenne. Tá he har múún Waag hí gáál mé kí kooteka, gál fayam Waaˈgiet met ma gaa kekeminyká, kor me hí ále?

¹⁸Hát káána Warˈgat Waaˈgiet hí hote-, giri kieye, Har máá hát Waag hí feˈdoká el gaa igiroká rúbáchlé aargiroká fargogíntaka, máá Waag ma kikianká ubaa máá hé ˈdeđewká gaa seseenká, kor hát hí háteeye?[12] chieká.

¹⁹Aaléka, gál Waag hát feˈdoká el gaa igiritle ˈdú maanyjawká hí Máállé ˈdúwa-, hí ka kuonnééllá hol gíl geer gaa kaaw, hí taalle hé midhabká eekemeyo.