Read daasanach Bétiro ki Naamaká 1 Bible Online

Bétiro ki Naamaká 1 - daasanach bible

Bétiro ki Naamaká 1

¹Yú he Símon Bétiro, Yiesu Kirísto máállé gedech-, ali gaa kaanyká. Warˈgatééllá it halúg hí iiy yeen tikiˈde-, ˈdúwa-, nyiin nyí ˈdaa Waag kúnnaa Rubachiet-, Yiesu Kirísto ˈduuwle ki argiyyééllá itín úba hí ki argiyyééllá yú hí ˈdú gáá verene.

²Aalé taalle hí Waag ubaa Máá kúnnaa guđo Yíésu ka oonnootoká, Waag hí ˈdú ˈjeeˈjeen, hí naanna guđoká shiigicho.

³ˈDaa giri Kirísto ki ógká, mú fargogintlé Waaˈgietká hé he lullé luolmitkúnno ki midhab-, gáál hé Waag hí feˈdoká ˈdú heergisatoká gáál ká shiiche. Mu ííni kinaallá in gáál ˈduuwle ubaa midhantle kí vie.

⁴Mú ˈduuwle ubaa midhantlé kinaal ˈdaalleka, mu hé he af iđinylé ˈdúwa-, kamuryoká hélle muun gáál ká shie. Hé muí gáál ka shíéllá ˈdaalleka, it hí he fedit lesallo-, gáál ˈdeđeneychóóllá yíé gáá ˈdiiyye, Waag hé gerkícho gaa iđo.

⁵ˈDaa giri Waag muun gáál hatal ˈdú ˈjiiyyeká, hát ˈdabaanká laađamíe. Iiy yeenkícho midhánt ˈdú chiˈdíe, midhánt kás ˈdú chiˈdíe,

⁶kás hol tím ˈdú chiˈdíe, hol tím mé ki chirsan ˈdú chiˈdíe, mé ki chirsan húgúm Waag hí feˈdoká ˈdú chiˈdíe,

⁷húgúm Waag hí feˈdoká geer gaa midhánt ˈdú chiˈdíe, geer gaa midhánt gielmít ˈdú chiˈdíe.

⁸Yaalmisanóóllá taalle hí ˈgayya-, hí ki higirayyoka, af kinaalka it taalle hí Máá kúnnaa Guđo-, Yiesu Kirísto oonnootallá it hí gál esham maaman-, saano hí gáá higisso-, mánká ma chegen.

⁹Máádhat he yaalmisanóóllá manítaka, he hát máá in gaa dhát-, hol ˈgas mé ma arginyká. Máá hat kinaallóóllá héllé ˈdeđew-, he kis eekemeyká ađaabanolle hát Waag hí gaa eeyyeká hé úba hí in ká bađay.

¹⁰Aaléka, nyaaramchú, laađamíe, hát ˈdabaanká yíéđía, hát itín Waag hí ká viiyye-, hí waarate-, hí gálle hosoteká kiimitíe, gálaat hí argo. Yaalmisano hatallóóllá hí ˈgayyoka, it ma riiteen, les ma ˈdaraminy.

¹¹Tá Máá kúnnaa Guđo-, Rubachiet-, Yiesu Kirísto Guchlé biiyoká hí higilloká, Waag hát ˈdabaanká mé guđáan haí cheedhe.

¹²Aalé har úba káána hí hééllá óíyta-, hí ˈduuwle hát ˈdabaanká iiy chieka, hééllá taalle aadh lulle tábo yú hí kí gagadha.

¹³ˈDaab yú les ˈdug ˈdú ijóóllá, hééllá yú hí táb kí gagadhokáka taglé.

¹⁴Hééllá he ˈdaa giri Máá kúnnaa Guđo Yiesu Kirísto yú lésallá hát ál ˈjob-, guraam hí ye gaa guuranká ye ka geeyká.

¹⁵Aaléka, hééllá ˈdaalle ˈdugaka in yú hátlé les ˈdug ˈdú ijóóllá lađama, hí hééllá oonisia, giri yú guraam ye guureka hí hééllá aadh lulle mé ka ˈgayyaká.

¹⁶Af giri ke hí geey-, Máá kúnnaa Guđo Yiesu Kirísto fargogínt hollo hol kí nanadha-, ki hí yieká, hé kinaallá hé hib điđamo-, gálaat hí hol af tág kí koyká muuniny. Yíésu ˈduuwle íín íl kínyaa nyí ki argiyye.

¹⁷Af giri Waag gúch lulle léká úr ˈdéé gáá hote-, kieye, Hééllá he Iny chia yú gielká. Mu hé tág ye geer gaa meey, chieká, af kinaallá in Yíésu ˈJaa kúnnaa Waag ˈdúúw ubaa meeny gaa arge.

¹⁸Af giri nyíín ubaa Yíésu nyí gúm Waaˈgiet álle gaa iđe-, Waag ˈdéé úr gáá hoteká, nét kínyaa nyí ki maalle.

¹⁹Aaléka, gál Waag hí ˈdeem ká shigicheká héllé ka veereká, ˈduuwle hé ki óg. ˈDeeny gaalí ka veere kinaallá onnônyka hát ˈdabaanká nee haí kooyyo. ˈDeeny kinaallá he hát édhúm bííy gaa ongʼoˈdeká gaa eedhesuo-, bííyle ká biˈdeka, hidh íín gerkícho súm gaa eedhesuoká.[1]

²⁰Hééllá onnóo, gál Waag hí ˈdeem ka shigiche kinaallá hé ˈdeem kasle eiy ma ki nannîny.

²¹ˈDeem Waag hí gáál ka shigicheká hé kálta gálaat kasle yé ma gáá ˈdíiny. Gaal íín Hím Naasan Waaˈgieto hí af tatiyye, in ˈdeeny Waaˈgiet hogodhe.