Read daasanach Bétiro ki Naamaká 2 Bible Online

Bétiro ki Naamaká 2 - daasanach bible

Bétiro ki Naamaká 2

¹Kíssóótíka, lés Yisirayel hé gál hođomlé-, hol gál Waag hí ˈdeem ka shigicheká ka hođieká hé gálaat hursam gaa ije. Hát tikiˈdééllá itín úba gál hé hođomká gálaat oonisuoká hursam yiem haí gáá ˈdeeme. Gaal hát điđamoká gál hí el gaa igiroká hé hođom-, gáál ˈdeđeneyoká hai oonisia. Gaal úba Máállé Guđo hí sídhle ˈdú sillie-, Kirísto lééllá hai điidhma. Hééllá ˈdaalle ˈdugaka, gaal hé ˈdeew-, il hí aargiˈdoká ál ˈjob hollo hol ˈdú egee, hai gaa bebee.

²Gál burnayká gáál yaalmitlé gaa nyakaridhe-, kern mantííllá hai ennime. Gáál he onisinylééllá ˈdaalleka gálaat ˈbaal ˈgíérích ˈdúwa-, Waaˈgietallá hai eesheye.

³Gaal ˈdaa he hol ki feditleka in ˈdeem hol af tagano ki kokoo, hí nyiimita, hí he ki nannata. Tá Máá gáál ˈdéé ki iđimuo-, gáál af ki beđisatká íín kisso gáál met tág ˈdie, hé in bano.

⁴Kíssóótíka, Waag hé gállé urru-, ˈgasso-, hí el af gaa tammeká ma hâny, hé gáál ál gaa dhát-, gaa ˈdér-, kúlích ˈdéé ki iđinyká hátlé ali ma kí ˈdíinyká gálaat hí ki maanyjawká ki hiigite.

⁵Hát tikiˈdééllá bár héle giri gálaat Waag af điidheká Waag hé gáál ma hâny, hé gáál bie ˈdú gáá rusiche, gáál bie hí yies. Tá Nówa giri ˈgíérích Waag met gaa kimiká gálaat ki ˈdiiyimeká ubaa gállé éíy taaka tiiya hé Waag hí riiyye.

⁶Waag úba hé kíssóótí ˈjien Soˈdom ubaa ˈjien Gomora gálle héllé ˈdeđew-, eekemeyká ˈdaalle ˈdugaka, hé ˈjien kinaal ubaa gálle ˈjiet gaa veeˈde, ég hoyche. Hééllá he gál Waag af điđidhanká il gíl gaa helitlé.

⁷Waag erkob hátlé ˈjien kinaal ˈjiet ma gaa véérinyká, hé Lóot giri máá ˈdúwa-, gál ˈjien kinaalloká yaalmitlé gaa nyakaridhe-, nyátál mannayyeká hí geer gaa ˈdeeneycheká riiyye.

⁸Máá ˈdúwa-, Waag met gaa kekemééllá, aadh lulle gál nyátál mannayallá hurt gaa ije-, gáál héllé ˈdeđewká aargire-, tá mamaleká, đo hé kinaal hí súm idhansie, geer hí gaa ˈdeenedhe.

⁹Har hééllá hatal kátaka, Waag hé gál ˈgíérích ˈdúwaká el gaa igiroká hé hí ki ˈgierˈgereká hé hát gaa ririannoká ˈgayyo. Héétí Waag hé gál saas ˈguoká ˈdaab kúlích ˈdéé ki iđinyká ali ma kí ˈdíinyká hé hát gáál higito-, gáál he il ka aargisichoká ˈgayyo.

¹⁰He il ka argisinyééllá súm ˈdaa gál balt gónlé-, kern mantiká el gaa igiro-, gál hí met ki ˈgieká egesheyoká he ki taalla. Gál hođomlééllá hé Waag ubaa gálaat kianka mán, gaal gálaato egesheye. Gaal hé úba aryaan farguogoká[2] eeshenylé he egesheyoká hí ma biirgisiny.

¹¹Waag gállé ˈgasso-, urruká har úba gál hođomlééllá fargogínt ˈdú ˈguoka, hé aryaan farguogóóllá Máá Guđoká metle ma gaa egesheny.

¹²Gál hođomlééllá he hát bine-, kás mán-, gaalí ˈdú hagasat-, gaalí yegesallá. Gáál yaalmitlé kinaallá ˈdugaka in gaal hé muogká egesheye, chachara. Gaal hát bine-, gaalí yegesalláka íín úba Waag haí beđisata.

¹³Gaal ˈdeentlé gálaat ˈdeeney kinaallá ˈdaalle ˈdugaka, Waag manyjasiny súm ˈdeewká akaˈd haí maadicha. Gál kinaallá kulich úba kátaka, hé hé níínní hol gáá momoyoká mán. Af giri gáál hí hol ˈgar ˈgolmosotoká, nyimisan gaal hí itín nyimisatallá in gaalí ki geyyime. Gaal itín hí lilo ubaa alb ki yie.

¹⁴Gaal aadh lulle ˈgál ˈdíét af ˈgoˈgorot-, hergisanká hol gaa ˈgeˈgedhe, gaal hé hé ˈdeđewká ekenyle ma haađiny. Gaal gál Kiristo ma hirânyká he baađisia, nyuogim ubaa ađaabano met ki kokoo. Gáál gerle he hol ki fedít gaalí onodheká hí koch. Gálallá idho Waaˈgieto he gim gaa ija.

¹⁵Gaal hé ˈgíérích ˈdúwaká hay, ˈboy ˈdie, hé ˈgíérích Balam giri iny Beyor-,[3] hí hújích saas ˈgieká gúsáchle ki geelnedheká nadhe.

¹⁶Tá Bálam ólle hát máádhat ˈdéé ká huogodhe, hí geey. ˈGuol mu héllé gaa sesemeká ˈdeentle mú geey, mú đeemle gáá moy.

¹⁷Gál hođomlééllá he hát haˈd bie mánká ubaa hát nyáˈdow guđo-, wááních fargogoká hí el mé gaa chichirat-, ír hí gáá tutuno mánká. Gálallá ál súm gaa ongʼoˈdeká hí met egete.

¹⁸Gaal ˈdeem churshamo-, ˈdúúw mánká he hogodho. Gaal gál ˈjobintéél hé gaa nyakarichká kar gáá ˈdaneká he laladhdha, balt gónlé gaa nyakaridheká he gáál af ki ˈgoˈgoˈdo.

¹⁹Gaal gáál geđuoká kieye, Yaalmisano kínyaallá mé ha hí fuuˈda, he yegedhe. Tá ˈdaa giri máádhat héllé hol gon oonisieká gédéchle yegetká, in gaal íín dhúrle yaalmisanollé gaa nyakaridhééllá gedelle yie.

²⁰Gál Máá kúnnaa Guđo-, Rubachiet-, Yiesu Kirísto iiy yeenle ubaa eiy naasanle hí riiyye-, les héllé gaa nyakarichká kar gáá ˈdaneká, har geđi héllé ˈdeđew kinaal hol ˈdú nadhe-, hí ˈgaaˈgadhdheka, gáál yaalmitlé kaanallóóllá hé gáál yaalmitlé kissoká súm ˈdú ˈdeew.

²¹Gálallá ˈgíérích ˈdúwa-, Waaˈgietallá meeny gíri moonnônyka kalat. Hát gaalí hemurit Waaˈgiet onisie-, ˈdee hí ger hile-, tá káána geđi ˈdéé el af gaa tammééllá ˈdeew.

²²Atim giri kieye, Cher dhiidhlé dhiidhimeká hollo hol ˈdú naadha, hai kokoo, chieká, ubaa atim giri kieye, Golch gaalí sháˈd gaa ˈjieká sháˈd hollo hol ˈdú naata, hai gaa gaalgalata, chieká, gálallá héllé hogoto.[4]