Read daasanach Bétiro ki Naamaká 3 Bible Online

Bétiro ki Naamaká 3 - daasanach bible

Bétiro ki Naamaká 3

¹Sheel chia yú gielallo, hééllá he warˈgat chia ki naama-, yú hí ˈdú gáá veereká. Warˈgasamééllá yú hí ˈdu ˈgáá veerééllá yú haí gogofsia, giri kas ˈdúwa-, Waaˈgiet hí ˈgayyaká yú hí táb kí gagadhoká.

²Hé yú hí gaa fedoká he giri itín hí ˈdeem héle Waag hí gállé taak kooteká ka shigicheká mé ka ˈgayya-, ubaa hemurit Máá kúnnaa Guđo-, Rubachietká hí ka shieká úba hí mé ka ˈgayyaká. Hemurit kinaallá itín Kirísto gállé alb fimiká hí gaa maalle.

³Er hééllá onnóo: Biiy bár el met ˈdáˈdle ka ˈjoobonotoká gál af ka fichilít ˈguo-, baltlé gaa nyakaridheká el gaa igiroká les yiem hai gáá ˈdeeme.

⁴Gaal hatal hai yeedhe, Kirísto ˈdeeny hí af iđieká kieye, Yú hollo hol ká naadha, in hí yie háluke, tá har laa? Tá ameeny giri eshim eshimkúnno guraam hí guureká tá ˈjíig ki gaa ijóóllá đig, he lulle in hátlé aađa-, Waag hí ka kuonneká har ija, hálukia! hai yeedhe.

⁵Gaal hé Waag hát kíssóótí ˈdéé hótle úr kí kuonne-, les mé gogoká bie yé gáá ˈdeeycheká táb ˈdoonle điidhe.

⁶Waag ˈdeenylé hoteká ˈdaalleka in bie les er suosiche, les he lullé hí gaa ijeká af ki beesete.

⁷Waag ˈdéé hótle úba in ur kaanallóóllá ubaa lés kaanallóóllá Waag hí taak ki koyye, giri ˈjiet hí af ki shugunatká. Hé kinaallá hé Waag hí ali koyye, ˈdaab kúlích Waag gálaat ˈdeem ki iđimichoká ubaa gál Waag af điđidhanká af ki beesenle-, ali ma kí ˈdíinyká.

⁸Sheel chia yú gielallo, tá ˈdéé umutééllá haí in ka bađâny: ˈdaa Máá kúnnaa Guđokáka, kulich tikiˈd he hát warram shíí tikiˈde, tá warram shíí tikiˈd he hát kulich tikiˈde.

⁹Waag héllé gáál af iđicheká gáál ˈbaal tala ki manítaka, íín he af iđinylé kinaallá hé tala ma gaa mannany. Waag ˈdaa kíchoka hé geer gaa guđo, gálaat lulle hí makan fafaanká he feˈde, hé máádhat hol eiy gaa ˈgiˈgisatká ma fediny.

¹⁰Máá kúnnaa Guđoká kúlíchlé gáá ˈjeˈjeenká hát kúlích ki met muog-, máá buraalléká hí gáá ˈjeˈjeenká. Ur hai yaarma, mán hai yeedhe. Les ubaa héllé hí gaa ijoká lulle ˈjiet haí ˈjeenne, ˈjiet af haí ki shugunata.

¹¹Aaléka, ˈdaa giri Waag hí he lulle hatal ki beđisatkáka, itín kor it gál hát máre ˈgie? Itín onnônyka hát saas manti-, yaalmitle Waag geer gaa memesichoká hí ká yíéđianna,

¹²giri hí kúlích Yíésu hí hol gáá nannaatká met egeto-, đo hí kúlích Waaˈgiet kinaal ka ˈjoobonsotoká. Kúlích kinaallá úr ˈjiet af haí ki shugunata. Les ubaa héllé hí gaa ijoká lúl kulkul haí ˈgeesia.

¹³Tá hát Waag hí gáál af iđichekáka, muun ur ubaa lés kaana-, geđ igiˈdo-, ény gál Waag geer gaa memesuoká ki met egese.

¹⁴Aaléka, sheel chia yú gielallo, ˈdaa giri hí hééllá met egetoká taalle laađamíe, giri kúlích ka chiimetóótíá hí Waag met ki ˈdeenno-, hí geer ka ˈjakarany mán-, Waag hí gál saas ubaa ˈdeensen mánká ka dhaˈgasannoká.

¹⁵Hééllá mé ka ˈgáa, Máá kúnnaa Guđoká geer guurallé ˈguoká in hol ki momoyo, gál burnayká hí rubach ki aargira. Nyár kúnnaa ki giel-, Báulo lééllá, ˈdaalim Waag hí shiicheká ˈdugaka in hí ˈdéé hót tikiˈdééllá úba ˈdu gáá veere.

¹⁶Yaalmit tikiˈdééllá in mú warˈgasamle lulle ˈdéé hótallá hí gaa iđa. Mú warˈgasamle alb ˈbaal ˈdeem hótlé ki hol eiy gaa nannasatká hé tág farguogo. Gál máá hí hát ˈdabaanká onisie mán-, hátle wawaanká alb farguogo kinaallá ubaa warˈgasam Waaˈgiet éíy taaka ˈdeemle hát éíyyo he eiy nannaa. Gaal hé kinaal ˈdugaka in hol mé il gáá mure, gaa bebee.

¹⁷Aaléka, sheel chia yú gielallo, ˈdaa giri hééllá hí ógká, taganokícho ˈgée, giri gál halúg nyatalaam mánnallá hí ma baađisiny-, iiy yeen kíchia hí tág ki taalallá hí ma gaa riiteenká.

¹⁸Tá Máá kúnnaa Guđo-, Rubachiet-, Yiesu Kirísto lééllá ˈdúˈjímle ubaa onyle ki hiráa. Káána ubaa bííyyo, ˈduuw taalle hí mú hélle yeet. Iiy-hí, he hí hát kinaallá yeet.