Read daasanach Yuána Erká 2 Bible Online

Yuána Erká 2 - daasanach bible

Yuána Erká 2

¹Um chiallo, ˈdeenyééllá yú hí ˈdu gáá verenóóllá he giri hí nyuogim ubaa ađaabano ma higilinyká. Tá máádhat har nyuogich yíekaʼ, ađááb yíekaʼ hileka, af kinaalka muun hé ke Máá ˈJaa kúnnaa Waag hol af ijo-, gáál ˈdéé ˈdú hogodhoká ˈguo. Máá kinaallá he Yiesu Kirísto, giri tikiˈde-, ˈdúwaká.

²Mu he suor ađaabanokúnno ubaa nyuogimkúnno ewle higidhoká. Suorééllá hé ađaabano ubaa nyuogimkúnno tákámle ewle ma higin, gálaat lullé les gaa ijoká nyuogimle ubaa ađaabanollé úba ewle higita.

³Har ke mú hemuumuritle el gaa igiroka, af kinaalka hát ke mú ógká hé ke óg.

⁴Máá kieye, Yáá mú óg, yeget-, kor mú hemuumuritle el ma gaa igirinyká, máá kinaallá he máá hódhollé-, ˈdeeny ˈdúwa-, Kiristóóllá hí ma gaa iđinyká.

⁵Tá máá Kirísto ˈdeenyle el gaa igiroká, máá kinaallá gon gielmitlé Waag ka ˈguoká kisso he hidh ki arie. Yaalmitééllá in hát ke mú gaa ijoká ke og.

⁶Máá kieye, Yáá mú gaa ijo, yegetká, húgúm Yíésu hí ki ijeká, úba hí ki yíéđuo.

⁷Sheel chia yú gielallo, hemurit yú hí ˈdu gáá vereno-, hol geelnedhíe, chegetallá, hé hemurit kaanallo muuniny, he hemurit héle er hí ˈgayye-, hí maalleká.

⁸Tá hemurit yú hí ˈdu gáá vereno-, hol geelnedhíe, chegetallá íín he hemurit kaanaká. Yíésu hé hemuritééllá ˈduuwle ki ijo. Tá káána itín úba it hemuritééllá ki iđa, ˈdaa giri bííy gaa onˈgoˈdeká ká bebeyyo-, bííy ˈdúwa-, gaa édhká ka eedheyyoká.

⁹Máá kieye, yú bííy gaa édhká gaa ija, yeget-, kor nyárle nébká, máá kinaallá hátle bííy gaa ongʼoˈdeká he gaa ija.

¹⁰Máá nyárle gielká hé bííy gaa édhká gaa ijo. Tá bííy gaa édh kinaallá hé níínní hí gaa ijo-, mú riigirsuoká mán.

¹¹Tá máá nyárle nébká bííy gaa ongʼoˈdeká he gaa ija, gaa seseme. ˈDaa giri mú bííy gaa ongʼoˈdeká hí in riiyyeká, mu hé mé ˈdaa he ki seseenká muog.

¹²It umóóllo, hééllá yú hí ˈdu gáá verenóóllá he ˈdaa giri Kirísto ˈdugaka, Waag hí ˈdú ˈjiiyye-, hí nyuogimkícho ubaa ađaabanokícho gaa eeyyeká.

¹³It idhaamallo, hééllá yú hí ˈdu gáá verenóóllá he ˈdaa giri itín Máá erkob-, Waag hátlé hé níínní ka kuonne mánká ali ijeká hí ógká. It rúórééllo, hééllá yú hí ˈdu gáá verenóóllá he ˈdaa giri hí máá ˈdeew-, Sátanlééllá ká adhateká.

¹⁴It đalbááyáállo, hééllá yú hí ˈdu gáá veerééllá he ˈdaa giri itín hí ˈJaa kúnnaa Waag ógká. It idhaamallo, hééllá yú hí ˈdu gáá veerééllá he ˈdaa giri itín Máá erkob-, Waag hátlé hé níínní ka kuonne mánká ali ijeká hí ógká. It rúórééllo, hééllá yú hí ˈdu gáá veerééllá he ˈdaa giri hí fargogínt ˈgayya-, ˈdeeny Waaˈgiet hí ger gaa ijo-, tá hí máá ˈdeew-, Sátanlééllá ká adhateká.

¹⁵Haí les ubaa les héllé hí gaa ijoká géélnen. Máádhat har hé lesalloká geelnedheka, hé gielmit ˈJaa kúnnaa Waag geerka mán.

¹⁶Hééllá he ˈdaa giri he met lullé les gaa ijo-, hát káána balt ˈdeew-, gonietká yíekaʼ, bargaab hé gálaat inle hí fedoká yíekaʼ, héétí hé gálaat hí ˈguo-, ubaa hí ekemeset-, hí hol ki memeyoká yíekaʼ, hééllá lulle hé ˈJaa kúnnaa Waag yé ma gáá ˈdeˈdeminy, lésallá he yé gáá ˈdeˈdeme.

¹⁷Les ubaa balt lesalloká el met haí ˈgiidha, tá máá hé Waag hí feˈdoká ekemeyoká bííyyo hé ali ijo.

¹⁸It đalbááyáállo, les el met ˈdaˈdle hé ká ˈjobonte. It máá Kirísto ka kidhichká hát ka ˈjeˈjeenká maalle. Tá káána ke gaa ijóóllá gál burnay-, Kirísto ka kídhká hé úba biiy ká hile. Hééllá ˈdaalleka in les el met ˈdaˈdle hát he ka ˈjobonteká ke og.

¹⁹Gál muun gáál yé gaa ˈdíéllá hé gálkúnno muuniny. Gaal he gálkúnno onnônyka, hé hátle onnônyka ke hol ˈguo. Yaalmit gaal muun gáál hayallá, in gaal lulle hát gálkúnno muuninyká gáál ká argisie.

²⁰Tá itín it Máá saas mánká hé hí Hím Naasanle shie, lulkícho it hé ˈdúwaká óg.

²¹Hééllá yú hí ˈdu gáá veerééllá hé kieye itín it ˈdeeny ˈdúwa-, Kiristóóllá muog muuniny, he ˈdaa giri itín hí ˈdeeny ˈdúwáállá ógká. Héétí úba ˈdeeny ˈdúwáállá hát hodho-, níínní hí yé gáá ˈdeˈdeen-, mánká hí ógká.

²²Máá hódholléká he mááya? He máá kieye, Yíésu hé Messíya[1] muuniny, yegetká muunîny? Máá hatallóóllá he Kirísto kídhíchlé. Máállá ˈJaa kúnnaa Waag ubaa Inylé Kirísto lééllá he điidhe.

²³Máá Iny Waaˈgietallá điidhoká, hé ˈJaa kúnnaa Waag hí ma lileny. Tá máá Iny Waaˈgietallá ˈdúúw hoteká, hé ˈJaa kúnnaa Waag hí lé.

²⁴Itínííllá, fayamééllá he onisinyle hát erkob hí maalleká hí ger gaa yíéđiyyo. Har he onisinyééllá hát erkob hí maalleká hí ger gaa iđoka, af kinaalka it Íny ubaa ˈJaalle taalle gaa iđa.

²⁵Kirísto hé muun gáál af iđieká he luolmit biiyóóllá.

²⁶Hé yú hí ˈdu gáá veerééllá he ˈdeeny gál hí baađisuoká.

²⁷Tá itín it Hím Naasan Waaˈgiet Kirísto gaa argiyye. Hím Naasanééllá hé hí gaa iđo. ˈDaa kinaallá ˈdugaka in hí máá hí hé ˈdúwaká oonisuoká ma hegesen. Hím Naasanééllá he máá hí he met lulle oonisuoká. Hé Hím Naasanééllá hí oonisichoká hé hé hódhoká muuniny, he hé ˈdúwaká. Hát Hím Naasan Waaˈgietallá hí onisichééllá, Kirísto gaa yíéđía.

²⁸Aaléka, umééllo, mú gaa yíéđía, giri mu hol ká nadhe-, ke mú il ki argeka, ke sierm mán-, mú metle kern hí gáál ma gaa ˈgiˈginká.

²⁹ˈDaa giri mu íín hát ˈdúwaká hí ógká, itín úba gál hé ˈdúwaká ekemeyoká lulle hát ˈdalmaat mú yé gáá ˈdiiyyeká ˈdalidheká it óg.[2]