Read daasanach Yuána Erká 3 Bible Online

Yuána Erká 3 - daasanach bible

Yuána Erká 3

¹ˈJaa kúnnaa Waag gielmitlé guđo-, he muun gáál gielallá, ebá dhaayyíe! Gielmitééllá ˈdaalle ˈdugaka in Waag muun gáál umle chie. Tá hé kinaallá hé ˈdúwa, muun ke um Waaˈgiet. ˈDaa giri les gálle mú moonnoyká, in úba káána gálaat muun gáál muog.

²Sheel chia yú gielallo, muun káána ki um Waaˈgiet. Bár ka chiimetóótíá yaalmit kúnnaa ke kakaatká hátle hé ke muog. Tá Kirísto he hol ká nadheka, hát ke Kirísto yaalmitle kaatká hé ke óg, ˈdaa giri yaalmit muí yaal kinaallá ke il ki argoká.

³Ameeny máá he met esinyééllá Kirísto ka ˈguoká, hát tikiˈde Kirísto saas mánnallá, íín úba hé hí saas mé ki kokuoká hol ká riiriat.

⁴Ameeny máá hé ˈdeđewká ekemeyoká úba hemuumurit Waaˈgieto he ˈdeđeneye. Hé ˈdeđewká eekemeny, he hemuumurit Waaˈgiet ˈdeeneny.

⁵Kirísto ka yimíéllá, hát nyuogim ubaa ađaabano gálaat gaa egewká it óg. Tá mu íín hé nyúógích ubaa ađaab níínní ˈguoká mán.

⁶Ameeny máá mú gaa ijoká, hé hé ˈdeđewká ma gaa seseminy. Tá ameeny máá hé ˈdeđewká gaa seseenká hé mú ma árginy, héétí hé mú muog.

⁷Umééllo, ha máádhat hí bađisîny. Hát Kirísto íín ˈdúwáállá, máá hé ˈdúwaká ekemeyoká úba hé ˈdúwa.

⁸Máá hé ˈdeđewká gaa seseenká íín máá Satan. Hé kinaallá he ˈdaa giri ameeny les mé gáá koonle, ˈjíig káána ke gaa ijóóllá, Sátan hé ˈdeđewká gaa seseenká. ˈDaa kinaallá ˈdugaka in Iny Waaˈgietallá ká yimie, giri hújích Satan eiy fufumuoká.

⁹Hé máá níínní ˈdalmaat Waag yé gáá ˈdiiyyeká ˈdalidhe-, kor hé ˈdeđewká gaa seseenká mán, ˈdaa giri mú luolmit Waaˈgiet hí gaa iđoká. Máá ˈdalmaat Waag yé gáá ˈdiiyyeká ˈdalidheká, hé hé ˈdeđewká gaa seseenká ma uriny.

¹⁰Yaalmit giri ke um Waaˈgiet ubaa um Satan hol eiy gaa nannasatká hééllá: Ameeny máá hé ˈdúwaká ma ekemenyká hé veel Waaˈgiet muuniny, héétí máá nyaaramlé Kiristoká ma geelnenyká hé úba veel Waaˈgiet muuniny.

¹¹Atim héle af giri Fayam Midhaballá erkob hí maalleká hí ˈgayyeká kieye, kí hol geelneto, he chie.

¹²Ha ke hát máá Satan Káyinlé-, nyárle yieská yéen. Tá mu íín háteka nyárle yiesal? Mu nyárle yiesallá he ˈdaa giri mu íín he eekemenyle ˈdeew-, mú nyárle íín he eekemenyle ˈdúwaká.

¹³Nyaaramchú, har les gálle hí nebedheka, haí hé kinaallá af ˈdábiny.

¹⁴ˈDaa giri muun ki gál nyaaramallá gielká, in hát ki kúfach el ki naate-, ki luolmít yé ˈdú ˈdieká ki og. Máá gál nyaaramallá ma geelnenyká hátle kúfacho he gaa ija.

¹⁵Máá nyárle nébká, he hát máá nyárle yies. Tá hát máá níínní gálaat yeges-, nyuogich ˈguo-, kor luolmit biiyoká hí gaa iđo-, mánká, it óg.

¹⁶Gielmít yaalmitééllá ke eiy ki naate: He hát káána Yiesu Kirísto sídhle sillie-, gáál ˈdú kufééllá. Muun onnônyka sidhamkúnno úba gál nyaaramallá ke ˈdú silmia.

¹⁷Har máádhat he ˈguo-, tá nyárlé he hí ki ˈgereká geer hí shâw ma ˈdú yeenka, máá kinaallá háteeye gielmit Waaˈgiet hí gaa iđa?

¹⁸Umééllo, ha ki gálaat af tákámle ki geelnêny, gálaat kí hát ˈduwantiká geelnew, gálaat kí ˈdú ˈjeeˈjeen.

¹⁹Muun ke hát kinaallá ˈdieka, in hát muun ke ˈdeeny ˈdúwa-, Kiristóóllá gálléká ke hol og, Waag metle hé ki geer ˈdéént mán.

²⁰Muun har úba ke geer ˈdéént ˈguoka, Waag geer guuralle ííni geer ˈdeentkúnno ˈdú guđo, he lulle og.

²¹Sheel chia yú gielallo, har ke hol óíyta-, ke ˈgíérích ˈdúwa-, Waag hí feˈdoká el gaa igiroka, af kinaalka Waag metle hé ke sierm gaa mán.

²²Héétí, hé mákárta-, ki mú rogononká ha ke mú gaa aargira. Hé kinaallá he ˈdaa giri ke mú hemuumuritle ki met gaa kekeen-, ke hé mú geer gaa memeyoká ekemeyoká.

²³Aalé Waag hemuritle hééllá, giri ki mú Inylé Yiesu Kirísto iiy yegetká, héétí hát giri muí gáál kí mure-, hol geelnedhíe, muí yieká ki hol geelnetká.

²⁴Ameeny máá hemuumurit Waaˈgiet met gaa kekeenká, hé Waag gaa ijo, tá íín úba hé Waag hí gaa iđo. Waag hát muun gáál gaa iđo-, ki ógká hééllá: Mu Hím Naasanlé gáál ká shíéllá ke ki og.