Read daasanach Yuána Erká 5 Bible Online

Yuána Erká 5 - daasanach bible

Yuána Erká 5

¹Ameeny máá Yíésu hát Messíyaká[3] iiy yegetká, máá kinaallá hé veel Waaˈgiet yie. Tá ameeny máá véel ˈjaalle gielká, hé úba veel muí ˈdaloká giel.

²Ke Waag gielníta-, ubaa ke Waag hemuumuritle el gaa igiroka, in ke hát um Waaˈgiet gielká ke og.

³Waag geelnen he Waag hemuumuritle el gaa igiriny. Mú hemuumuritlééllá hé gáál ílsh ma ˈdú iđiminy.

⁴Ameeny máá ˈdalmaat Waag yé gáá ˈdiiyyeká ˈdalidheká hé lesalloká he ká aađadhdha. Hé lesalloká hé ke kí aađaatká he iiy yeen kúnnaa ke Yiesu Kirísto ka ˈgúóllá.

⁵Mááya hé lesalloká ká aađadhdha? Máá Yíésu hát Iny Waaˈgietká iiy yeetká tákáma hé lesalloká ká aađadhdha.

⁶Yiesu Kirístóóllá he Máá bie ubaa fás kí yimieká.[4] Mu hé bie tákámle ma kí yímen, mu bie ubaa fásso he kí yimie. Hééllá hát ˈdúwaká Hím Naasan Waaˈgiet aadh lulle hé ˈdúwaká hogotóóllá hé hí gáál ká geđicho.

⁷Hé gáál Yíésu ˈduuwle geđuoká seđe.

⁸Hé kinaallá he Hím Naasan Waaˈgiet, ubaa bie, tá fás. Hé seđééllá ˈduuw he hogodhoká tikiˈde.

⁹Hé gálaat hí ˈdúúw ˈdú ˈdieká hé ke iiy yeget. Kor hé Waag hí ˈdúúw ˈdú ˈdiiyyeká súmmo ˈdúwa. Waago in Inyle ˈdúúw ˈdú ˈdiiyye, Inyle ˈduuwle gáál ká geeyche.

¹⁰Máá Iny Waaˈgiet iiy yieká, hé ˈdéé hót ˈdúwáállá hí geer gaa iđo. Tá máá hé Waag hí gáál ka geeychééllá iiy ma yéenká, hé Waag máá hódholléká hoy, ˈdaa giri mu hé Waag hí ˈdaa Inyleka ˈdúúw ˈdú ˈdiiyye-, hí gáál ka geeychééllá iiy ma yéenká.

¹¹Hé Waag hí gáál ˈduuwle ká geeycheká hééllá: Waag hé muun gáál luolmit biiyoká ká shiiche. Luolmit biiyóóllá mú Inylé ke gaa aargira.

¹²Máá Iny Waaˈgiet hí gaa ijoká hé luolmitééllá hí gaa iđo. Tá máá Iny Waaˈgiet hí ma gaa iđinyká hé luolmitééllá úba hí ma gaa iđiny.

¹³It hí Iny Waaˈgiet iiy chíéllá in yú hí hééllá ˈdu gáá veere, giri hát hí luolmit biiyoká ˈgayyoká hí ógká.

¹⁴Aalé Waag ˈdaalleka hé ˈdúwa-, ke tág ógká hééllá: hé muí gáál ki fedoká ke mú ruogoneka, mu af hai gáál maala.

¹⁵ˈDaa giri mu hát gáál af mamaloká ke ógká, mú ke he ruogoneka, hé kinaallá hát ke mú gaa aargiroká hé ke óg.

¹⁶Aalé har máá mákártaká nyárle arge-, mu ađaab hí kúfach mé ma ki kokonyká hileka, muí mú Waag ki viivisat, mú Waag hí luolmít shiicho. Tá biiy hé ađaab gálaat kúfach mé ki kokoyyoká hí gaa ijo.[5] Tá yáá kieye, gál ađaab kinaallá hiloká Waag ki viivitíe, ma yegen.

¹⁷He ˈdeđew-, ki ekemeyoká lulle he ađááb, tá biiy hé ađaabano gálaat kúfach mé ma ki kokonyká hí gaa ijo.

¹⁸Ameeny máá ˈdalmaat Waag yé gáá ˈdiiyyeká ˈdalidheká hát hé ˈdeđewká ma gaa seseminyká hé ke óg, ˈdaa giri mú Waag Inyle hí ki yaal-, máá ˈdeew-, Sátanlééllá hí đig ma yegenká.

¹⁹Muun hát ke um Waaˈgietká hé ke óg, kor lésallá lulle íín Sátano he gíl geer gaa iđa.

²⁰Iny Waaˈgiet hát ka yimie-, ˈdaalim ke Waag ˈdúwaká ke ki kiimisatká gáál ka shieká hé ke óg. Múún Máá ˈdúwa-, Waag Inylé-, Yiesu Kirísto lééllá ke gaa ija. Mu íínííllá he Waag ˈdúwaká ubaa luolmit biiyoká.

²¹Umééllo, hol waagam hódhoká gáá faganayyíe!