Read daasanach Yuána ki Naamaká 1 Bible Online

Yuána ki Naamaká 1 - daasanach bible

Yuána ki Naamaká 1

¹Minnééllo, yáá karsichallá warˈgatééllá kó Waag ko ká viiyyééllá ubaa um kua yú hí ˈdu gáá verene. Yáá tág kuun ubaa umkú hí giel, kor yáá tákámchú hí ma geelneny, it úba gál lulle ˈdeeny ˈdúwa-, Waaˈgietallá ógká hí giel.

²Itín ke hí gielallá, he ˈdaa giri ˈdeeny ˈdúwa-, Waaˈgietallá muun gáál gaa ijo-, kor taalle bííyyo muun gáál gaa ijoká.

³Múúni ke ˈdeeny ˈdúwáállá ubaa ke gielmít ki ijóóllá ˈJaa kúnnaa Waag ubaa Inylé Yiesu Kirísto taalle bííyyo hai gáál ˈdú ˈjeˈjeme, geer guurá hai gáál aargisia, tá naanná hai gáál gaa iđimia.

⁴Yáá tág geer ye gaa meedhe, giri um kua yú argeká ˈdeeny ˈdúwáállá ki ijoká. Hééllá he hát ˈJaa kúnnaa Waag hí muun gáál kí mureká.

⁵Aaléka, minnééllo, gillo yú ko ki efe, kí hol geelnet. Hemurit yú ko ˈdu gáá veerééllá hé hemurit kaanallo muuniny, he hemurit kis ki maale-, hol geelnedhíe, chieká.

⁶Gielmít hélle he Waag hemuumuritle el gaa igiríti. Hemurit hol geelnedhíe chíéllá, he hemurit kis hí maalle-, onnônyka hí ki iđaká.

⁷Yú hí hatallá geđúóllá he ˈdaa giri gál burnay-, gálaat baađisuo-, Yiesu Kirísto hát gon kaadhdhe-, ka ˈdalidheká iiy ma yegenká les gaa seseenká. Gál hatallóóllá máálle he máá gálaat baađisuo-, Kirísto ka kidhichká.

⁸Aaléka, hol ˈdeeˈdeemíe, giri hújích hí niiyyééllá[1] hélle hí ma ˈdaabiny-, símísle alulle hí aargiˈdaká.

⁹Ameeny máá he onisiny Kiristóóllá ma ki yaaliny-, he onisiny hol gaa lalaanká hé Waag hí ma gaa iđiny. Tá máá he onisiny Kiristóóllá ki yaalká hé ˈJaa kúnnaa Waag ubaa Inyle hí gaa ijo.

¹⁰Aaléka, máádhat har ál hí gaa iđaká ká yimie-, kor he onisinyle he onisiny Kiristóóllá gaa taak kátaka, máá kinaallá haí af nee kôny, ubaa hí énykícho ˈdú éen.

¹¹Máá hat kinaallóóllá máá hí af nee kuoká hé ˈdeđew-, muí ekemeyóóllá úba hé gaa ijo.

¹²Yáá hé guđo-, hí ka geđuoká ˈguo. Tá ˈdéé hót yú ˈgúóllá yáá warˈgatééllá geerle ˈgalaamééllá kí verenoká ma fediny. Hé kinaallá afleka, yú onnônyka ká yiimet-, ke hol af ká yíéđian-, ke hol geđuoká fede, giri ger muun gáál hát ˈdabaanká gaa memeetká.

¹³Aaléka, nyaar kua Waag hí ka viiyyééllá[2] umle hé ko naa ká yie.