Read daasanach Yúúa 1 Bible Online

Yúúa 1 - daasanach bible

Yúúa 1

¹Yú he Yúúˈda, gédéch Yiesu Kiristo, nyár Yakob. Warˈgatééllá it Waag hí ká viiyye-, ˈJaa kúnnaa Waag hí giel-, Waag hí ˈdaa Yiesu Kiristo in ki ˈdiiyyeká yú hí ˈdu gáá verene.

²Waag hí súm geer guurá ubaa gielmít aargisicho, hí naanna guđoká shiigicho.

³Sheel chia yú gielallo, yú érléká rúbách kúnnaa áwúlle ke hol ki ˈgúóllá hélle hí ˈdú gáá vereneká súm fede. Kor káánaka, yáá kas yáálle hí warˈgát ˈdu gáá vereno-, hí gil ki egefoká ye ká hille, giri Fayam Midhab ˈdúwa-, Waag hí gálle af tikiˈd kí shiiche-, tá bííyyo hol ma gaa sorominy-, muí gáál ki ógallá taalle laatle kín hí lađaanna-, gál hođomléká hí ma laanká.

⁴Onnóo, gáál mé tikiˈd hé hí hurt kí hure, gálallá hé Waag kian ka mán. Gaal hé Waag ˈdúˈjímlé muun gáál mé fuˈdeká hol gaa lay, ˈdúˈjím héllé ˈdeđew-, gaa seseenká hoy. Héétí, gaal hé Máá kúnnaa Guđo-, gáál mé ki yaal-, Yiesu Kirísto điidhe. Gálallá he gál héle ˈdeenyle warˈgát gaa ije-, giri Waag hí ˈdéé ki iđiche-, hí ˈdeensenteká.

⁵Har káána úba héél lulle hí óíytaka, Máá Guđoká hát gálle lés Misirayim gáá bisieká yú hí táb kí gagadhoká yú fede. Kor el ˈdaal mu hé gál hí iiy ma yéenká af ki beete.

⁶Hééllá onnônyka úba mé hí ká ˈgayya, hát gál ˈgasso-, Waaˈgiet-, urru-, giri állé hemuumuriti-, Waag hí gaa iđicheká ma gaa yíéđîny-, égetlé kinaal gíl sug ki hayká. Tá gaal íínííllá ˈdaab Kúlích Guđo-, Waag hí gálaat ˈdéé ki iđimichoká ali ma kí ˈdíinyká, hé Waag hí bííy gaa ongʼoˈdeká ki chirate, hí nyarugano biiyoká ki ˈdanne.

⁷Hát hatallóóllá, ˈjien Soˈdom ubaa ˈjien Gomora tá ˈjienlé hí lag ijeká gálle herginy goramká ubaa babat giri gál yááble hol hergisanká hol ˈdú hayká in Waag hí ˈjiet ki beesete. Hé kinaallá he il gíl gaa helit-, gál Waag af đuˈdusoká hát hí ˈjiet biiyoká ki maanyjawká.

⁸Hát hatallóóllá, gál amatle el gaa igiroká amatlé kinaallá in hí hé seđééllá mé ki kokoyyo, in gaal gónle ˈdeđeneye, hemuumurít điđidhma, héétí gál ˈgasso-, urruká fiichila.

⁹Ebá táb ˈdodhdhíe, Mikáyel har úba gál ˈgasso-, Waaˈgiet-, urruká máállé méteká kátaka, af giri mu ubaa kídhích kúnnaa Sátanléká gón Moshe ˈdaalleka hol ki fafalmeká, mu hé Sátan ma fichíliny, mu hé Sátan geeyká kieye, Máá Guđoká ííni ko il ki ˈdeđente, yie.

¹⁰Gálallá hé eiy ma náásanká ˈdeentlé he hogodho, fiichila. Gálallá hát bíne, hé kás mán. Gaal hé gónle hí feˈdoká he ekemeye. Tá gaal héllé ekemeyóóllá tuuˈdlé hí mé ˈgiidhia.

¹¹Hóbá! He bá gál kinaal ki ˈdéen! Gaal hé ˈgíérích Kayinká[1] nadhe, gaal hé hol gaa ˈdoˈdodhdhe, ˈgíérích muommo-, Balamká[2] nadhe. Gaal hé hát tikiˈde-, mú Kóra[3] hí Waag af đuˈduse-, Waag hí af ki beeseteká íín úba Waag af haí ki beđisata.

¹²Af giri gólol álle me hí hol gaa aargiroká, in gálallá hí ká higila, hí ˈdeđeneye. Gaal íín dhúrlé hol golmia, kern hí ma ˈgiˈgin. Gaal he hát nyáˈdow ír mán-, waanich hí hol gaa sisidhoká, ubaa hát ˈguor saano hí ma gáá higisiny-, hidh hí les gaa mánká. Gálallá he gál kúfach met naam il hí aargiˈdoká.

¹³Hát tikiˈde húđúm basietká oshony lalaannallá in gálallá kern mantle úba ká eedhesia. Gálallá hát hidhino hol gaa seseen-, Waag hí ál súm gaa ongʼoˈdeká taak ki koyyeká.

¹⁴Áˈdam ˈbíl ílle hátlé hol ka hoycheká, máállé ki tiiyaká he Hénog.[4] Hénog kíssóótí hé yaalmit galallo-, ˈdeenylé Waag hí shiicheká ˈdiiyime, mu kieye, Bá dhaayyíe, Máá Guđoká gállé ˈgasso-, urru-, shíí shííká hollo hol ká egedhdhe.

¹⁵Mu ka yiimetallá he giri mu gálaat lulle ˈdéé ki iđimuo-, gál Waag kian ka mánká lulle héllé ˈdeđew-, eekemeyká ˈdú ˈdeđenset-, gáál he il ká aargisuoká. Héétí mu gál Waag kian ka mán-, ađaabano ˈguo-, ˈdeem lullé kullaʼ-, Waag ki huogodheká úba ˈdeđenset-, gáál he il ká aargisuoká, he yie.

¹⁶Gálallá he gál yiirsam fafaat-, ˈdeđint gálaat ka aargiroká. Gaal úba he gál baltle el gaa igiro-, hol memeyo, gálaat in boodhom bubuo-, gálaat he gaa aargiroká.

¹⁷Tá it sheel chia yú gielallo, Máá kúnnaa Guđo-, Yiesu Kirísto gállé alb fimiká ˈdeem Waag hí ká shigiche-, he ˈdiiyimeká táb ˈduoˈdodhdhíe.

¹⁸Itín hé gaalí geeyká, gaal kieye, Bár biiy el ˈdáˈdle ali kí ˈdeˈdeenká gál af ka fichilít ˈguo-, Waag kian ka mán-, baltle el gaa igiroká biiy yiem hai gáá ˈdeeme, gaalí hí yie.

¹⁹Gálallá he gál giri hí eiy ˈgiˈgidhuo-, hinyamlé gonnietká tákámle el gaa igiro-, Hím Naasan Waaˈgiet mánká.

²⁰Sheel chia yú gielallo, itín he onisiny Waag hí ká shiichééllá tág chiˈdíe, ki hiráa, tá Hím Naasan Waaˈgiet hí fargogint hí Waag ki vivisataká shiigicho.

²¹It Máá kúnnaa Guđo-, Yiesu Kirísto geer guurallé-, hí luolmit biiyoká higilsichoká met egetééllá, hát Waag hí gielká onnóo, kas kinaallá ki yíéđía.

²²Gál ˈdaa Fayam Midhaballáka wawaanká, geer guurá aargisía.

²³Gáál ˈjiet biiyoká af gáá saasaráa. Gáál ˈbaal hí geer guurá aargisichoká hol ˈgas met ˈdeeˈdemíe, gáál ađaabanolle hát sharim muˈgay-, ki ˈdug ma ˈdú chichiranká ka nebedhíe.

²⁴Waagkúnno he Waag fargogínt ˈgayyo-, hí ˈdeˈdeenno-, hí ma riigiriny-, hí metlé gúch ˈgayyo-, geyyiny hí guđoká hát ˈdeensen mantiká hí ˈdú egeetoká.

²⁵Waag tikiˈde-, tákámle Rúbách kúnnaallá, ˈdaa Máá kúnnaa Guđo Yiesu Kirísto léélláka, bár giri hátle les ma ka kúóninyká, ubaa bárallá, tá bííyyó biiyo, ˈdúúw, kansím, fargogínt, tá hemuumurít lulle hí hélle yeet. Iiy-hí, he hí hát kinaallá yeet.