Read daasanach Kí Edhesiny 10 Bible Online

Kí Edhesiny 10 - daasanach bible

Kí Edhesiny 10

¹Aalé yú máá éíy taaka-, ˈgasso-, urru-, fargogo-, úr gáá leledho-, nyáˈdow hí buanne-, chala hí mé ˈdug ˈdú taal-, innumle hát aadho, tá ˈgasle hát ˈbíl aarlé ˈjiet hí gaa boloonnoká ki égká arge.

²Mu warˈgat ninni-, gaalí fuoreká gíl ká ˈgaa. Aalé mu ˈgáslé ˈdaa naanietká bás ˈdú koy, ˈgáslé ˈdaa ˈjíbachká les koy.

³Mu af ˈdér-, hát luoch yaaritle ki égká ki yaare. Mu af ˈdérká ki yaareká ˈgeˈget đo a tiiya ki yaaˈde.

⁴Aalé ˈgeˈget a tiiya ki yaaˈdeká, ˈgeˈget ˈdéé hótle onnônyka warˈgát ha yú gaa verene, kor yú ˈdéé hót úr gaa maale, ˈdéé hót kieye, ˈGeˈget a tiiya ki yaaˈdééllá ˈdéé hótle káaw, ha warˈgát gaa véérinyo ye chie.

⁵Aalé đo máá giri ˈgasso-, urru-, yú arge-, bás ubaa les ˈgas ˈdú koyká gíllé ˈdaa naanietká úr ki eey,

⁶Máá taalle bííyyo ali ijo-, úr ubaa héllé hí gaa ijoká, les ubaa héllé hí gaa ijoká, tá bás ubaa héllé hí gaa ijoká ka kuoneká ˈdodhdhe, kieye, Waag hé geđi el geđ ma kokony.

⁷Af giri máá ˈgasso-, urru-, ki tiiyaká faˈdle ˈdaraanká, hé geer geđi-, Waaˈgietká hai ká ˈduuwaa. He hát giri Waag hí gállé géde-, ˈdeem ka shigicheká geeycheká hai ˈdeeme, muí yie.

⁸Aalé ˈdéé hót giri yú úr gaa maaleká geđi ye geeyche, kieye, Sí, warˈgat ninni-, gaalí fuore-, gíl máá ˈgasso-, urru-, bás ubaa les ˈgas ˈdú koyká gaa iđóóllá éew, chie.

⁹Aalé yú đo máá ˈgasso-, urru kinaallá ˈdú sedhe, mú geey, giri mu ye warˈgat ninni kinaal ka shiguoká. Mu đo ye geey, kieye, Warˈgát éew, kom. Warˈgatééllá geerkú hai gaa heeđesicha, kor a geerkúka miinyle hát dhaanite, ye yie.

¹⁰In aalé yú warˈgat giri ninniká máá ˈgasso-, urruká gíl gaa eedhdhe, warˈgát koey. Warˈgát a geerchúka miinyle hát dhaanite, kor ye geer ki đuyyeká, geer ye gaa heđey.

¹¹Aalé gaal ye geey, kieye, Kuun aalé gon geđi kidhano ubaa émeeto, tá gáláát afano hí hol ká eiyyeká ubaa kansimano burnayká ˈdeemlé Waag hí ko shigichoká gálaat geđicha, ye yie.