Read daasanach Kí Edhesiny 12 Bible Online

Kí Edhesiny 12 - daasanach bible

Kí Edhesiny 12

¹Aalé hé guđo-, ke aˈdaˈdabo-, úr yé gáá ˈdieká yú arge. Min aadh hát đafarká kaate-, ˈguiy hí ˈgas gim gaa ijo-, tá shóte horki-, hidhino tomon tikiˈd a naam-, hí gaa ˈgieká mé ká ˈgayyoká yú arge.

²Min kinaallá geere ˈgayye, ˈdal hí ká chirate, geer veerít kulle hí ˈdany gaa koyye.

³Tá hé éíy taaka-, ke aˈdaˈdaboká geđi yú úr gaa arge. Áních guđo-, búr-, met hí tiiya-, metlé tiiya kinaal shotam kansimoká taat met eiy ká ˈguo-, gaas hí tomonká yú arge.

⁴Áních kinaal wásle waanieká hidhino met seđ mé tikiˈd úr gáá okoˈde, les ˈdane. Anich min ˈdal hí ka chirateká bala ki ˈdie, giri min veellé ka ˈdalloká kokuoká.

⁵Aalé min veel yab ˈdalle. Veel kinaallá he veel kidhano lulle ˈgúl síbilká aadh ˈdaatika ki ˈdeˈdeenká. Aalé min veellé kinaal đo Waag hí saˈde, Waag hí karallé guchiká ˈdú eete.

⁶Aalé min đo ˈbakat ál Waag hí tág ki koyye-, Waag hí ram shíí tikiˈd-, kúˈd eiy naama-, tómón eiy leká gaa wawaychoká kar ˈdú ˈdoyye.

⁷Aalé oos úr gaa shiiyye. Mikáyel ubaa gállé ˈgasso-, urruká áních giriká ubaa anich gállé ˈgassoká hol yies.

⁸Anich đo gaalí ká adhdhe, ubaa gállé ˈgassoká gaalí úr gáá arie.

⁹Aalé áních guđo-, giri chár hele-, gaalí Waag kídhíchle ubaa Sátan yeget-, les gálle lulle nyiimisatallá gaalí les kí lay, mú gállé ˈgassoká úba gaalí les kí laalame.

¹⁰Aaléka, yú ˈdéé hót af ˈdérká ˈdéé ki hoteká úr gaa maale, kieye, Aalé káána Waagkúnno rúbáchlé ubaa fargogintlé tá guchlé, héétí máállé Kirísto kansimle hé ali kí ˈdiiyye! Hééllá he ˈdaa giri máá nyaaram kúnnaa Kiristoká ˈdeentle kulich ubaa chúúrélle Waag met gaa hogodheká gaalí úr gáá layyeká.

¹¹Nyaaram kúnnaallá hé mú ka adhdhe. Mú gaalí ka adhdhééllá he ˈdaa giri Eliny gáál ˈdaalleka fásle okodieká. Héétí gaal hé kúfach ma đíin, hé Élíny ˈduuwle huogodhe.

¹²Úrru, kuun ubaa gál ko gaa ijóóllá lulkícho ger hí gaa meet! Les ubaa basso, hoba! ˈDaa giri Sátan hí ˈdu gáá leete-, hát bárle hol kí chalnateká óg-, idhanneká, héél ebá itín hí ki ˈdéen! ˈdéé hót hí chie.

¹³Aalé áních giriká hát gaalí úr gáá layká argeká min veel yábká ˈdalleká manyjasie.

¹⁴Aalé min giriká Waag hí kuol guguđo-, kodichká shiiche, giri úr ki kiisato-, char[17] kinaal met kar gaa ˈdaraanno-, ál ˈbakate Waag hí warram seđe tá war tikiˈd mé ˈdáá gaa waaychoká.

¹⁵Aalé chár kinaal đo bíé guđo-, hát wár fafaanká ki égká af gáá okodie, giri bie min egeetká.

¹⁶Tá les min ˈdú gáá riebiyye, af eiy ˈdeeyche, bíé giri war ki egeney-, áních giriká hí af gáá okodieká ˈgudisate.

¹⁷Aalé anich đo min ˈdú idhane, kie, giri min umlé les ki ˈgite-, Waag hemuumuritle ki ˈgie-, Yíésu ˈduuwle hogodhoká ˈdú ruruanká.

¹⁸Anich aalé bás ílung ki ˈdie.