Read daasanach Kí Edhesiny 18 Bible Online

Kí Edhesiny 18 - daasanach bible

Kí Edhesiny 18

¹Aalé hééllá yú argeká, yú máá éíy taaka-, urru-, ˈgasso-, úr gáá leledho-, hemuumurit guđoká ˈguoká arge. Máá kinaallá édhúm hí yé gáá ˈdieká biiy gaa edhesie.

²Aalé mu af ˈdérká ˈdéé ki hodhe, kieye, Bábilon Guđoká hé el hí ˈgidhe! Hé el hí ˈgidhe! ˈJien Babilon hé ény aryaan yie. Héétí hé aryaan gaa nyakaridhe-, met hí hol ká eiyyeká ubaa tere dhiginiyyoká tá đányár ˈdeđew-, gálaat hí nébká ífle yie.

³Kidh lulle hé ˈjienééllá baltlé gaa nyakaridheká ˈduunyle ˈjie. Les gállé kaansúoká hé ˈjienééllá hélle baltle ˈgie, Waag gíl sug ki hay, ˈjien bala ˈdú nie. Tá gál les ˈdú ijo-, shokodaam hol gaa mamadioká hé ˈjien kamurlé ki geyieká ki kamuray, muí yie.

⁴Aalé yú ˈdéé hót éíy taakaká geđi úr gaa maale, ˈdéé hót kieye, It chiallo, ˈjienééllá yé gáá ˈdée, haí ˈjien ađaabanolle híliny. ˈJien hé ˈdeđew-, il hí aargiˈdoká itín úba ha il hí árginy.

⁵ˈJien ađaabanolle hé hol ˈdú ˈjie, ˈdernedhe, úr đig yie. Waag hé ˈjien ˈdeentlééllá mé ká ˈgayyo.

⁶Hát ˈjien íín hí gálaat manyjasieká ˈjienééllá manyjasiny úba il hí argiyyo. Hé ˈjien hí gáál ki ekeychééllá ˈjien a naam hol ˈdú naʼ. ˈJien kulullé imi-, gáál ki fieká ˈdaˈdab kinaallá úba ˈjien a naam hol ˈdú naʼ.

⁷Hát tikiˈde ˈjien hol ˈduway-, hol balchá gaa iđíéllá ˈjien a ˈdáb kinaal manyjasiny ubaa geer ˈdeent máálle shiilmisatká ˈdú íđish. ˈDaa giri ˈjien geerle hol ki geđuo-, kieye, Yú hát min kansidheká ká ija, yáá hát min hiyesidheká muuniny, yáá gon geer ˈdéént ma aargiriny, yegetallá,

⁸in ˈjien hé gálaat ki ˈdeew-, basham ubaa geer ˈdéént, tá már ka ˈdeenká lulle ˈjien kulich tikiˈd hai ká higila. ˈJien úba ˈjiet haí koonyo. Máá Guđo Waag ˈjien he il ká aargisúóllá hé fargogínt lulle ˈguo, ˈdéé hót hí chie.

⁹Aalé les gállé giri kaansúo-, ˈjien hélle baltle ˈgie-, Waag gíl sug ki hay-, ˈjien bala ˈdú nie-, ˈjien balchalle gaa ijeká áwúlle hol ˈgar geyyimeká ˈjien ˈdunanylé ˈdunnuanká érle argeka koˈdam hai ˈdaˈdia, ˈjien hai ˈdú beeme.

¹⁰Gaal ˈjien manyjasinyle siermle haí faanna, gaal geđéétí hai ki ˈdeeme, kieye, Hoba! Hoba! Kó ˈjien guđo-, fargogo-, Bábilon lééllo, he il ká argisinykú aadh ˈgas tikiˈde đo ko af kí ˈdííyye? hai yeedhe.

¹¹Tá les gállé shokodaam hol gaa mamadioká ˈdaa giri shokodaamle máá geđi hí higiat-, mánká úba ˈjien hai ˈdú beeme, hai shiilmita.

¹²Gáál shokodaamlé maditi kinaal he hát káána hórkí, sibilaam ííkarská, waar bisso-, ˈdabaanká, bier ˈduuˈdúwaká, đafaraam ˈdabaan-, met hí hol ká eiyye-, eegedh-, ubaa kóórbis-, tá búrká, héétí ˈguor ussa-, met hí hol ka burnayká ubaa shokodaam gaalí arb hido ubaa ˈguor ˈduuˈdúwaká tág gaa nieká, héétí shokodaam gaalí síbíl raarká ubaa síbíl gogoká, tá waar ˈdabaanká tág gaa nieká,

¹³héétí ˈguor boorsom-, ussaká ubaa ˈguor éíy taaka-, gaalí ˈguom fafaatká, héétí éru, salab usiyyoká, henyite, ˈduuny vinna, salab, ˈdúlo nyágítádheká, sííndí, ˈgúó, wála, fara gaalí ˈdú yíéđianká ubaa muulamlé he af chichiratká, tá gáláát gaalí uune-, gaalí mamarsatká.

¹⁴Gaal ˈjien Babilon hai geđia, kieye, Hé ˈdabaan kua-, súm feˈdo-, fiiritle ˈgayyóóllá ubaa kamurkú tá midhantkú lulle hé ko af ˈgisate, kó hát níínní geđi argiyyoká mán, hai yeedhe.

¹⁵Gál shokodaamééllá hol gaa mamadie-, Bábilon ki kamurayká Bábilon manyjasinyle siermle haí faanna, gaal geđéétí hai ki ˈdeeme, af ˈdérká hai ki beeme, hai shiilmita,

¹⁶kieye, Hoba! Hoba! Kó ˈjien guđóóllo, he ebá ko ki ˈdéen! Kuun hát min kamuˈde-, đafaraam kuta-, bis hí kóórbis ubaa búrká faate-, hórkí ubaa waar bisso ˈdabaanká tá bier ˈduuˈdúwaká ki bukusateká onnoyye.

¹⁷Tá kamur kuallá lulle aadh ˈgas tikiˈde me hí gaa ˈgidhe, hai yeedhe. Aalé ameeny gál kadis guguđoká met ki ˈgieká ubaa gál kadís ki seseenká, tá gál kadís hújích gaa nannuoká, ubaa gál kadís ki mamadoká geđéétí ki ˈdie.

¹⁸Gaal ˈjien ˈdunnumeká érle argeká koˈdam ˈdane, kieye, ˈJien ya hát ˈjien guđóóllá ki eg? yie.

¹⁹Gaal hátlé bebime-, shiilmiteká hol edo ˈdú faafie, koˈdam ˈdaaˈdie, kieye, Hoba! Hoba! ˈJien guđo-, gál kadís léká hí ki kamuray-, kor aadh ˈgas tikiˈd me hí gaa ˈgidhéél, ebá he hí ki ˈdéen! gaalí yie.

²⁰Úrru, geer hí ko gaa meet! It gál Waaˈgietallo, it gál alb fimííllo, it Waag hí ˈdeem ka shigichééllo, ger hí gaa meet! ˈDaa giri ˈdéé hót ˈjienééllá hí itín ˈdú iđicheká Waag hí geđi ˈjienééllá ˈdú iđicheká, ger hí gaa meet! ˈdéé hót hí chie.

²¹Aalé máá ˈgasso-, urru-, fargogoká wár guđo hát nyátáábáká eedhdhe, bás ki lay, kieye, Hát tikiˈde-, fargogintííllá Waag ˈjien guđo-, Babilonallá af hai ki beđisata. ˈJienééllá hé geđ máá níínní hí aargiroká mán.

²²Héétí hé gaalí áár ki ˈdaraanká arramle hé geđi máá hí ko gaa mamaloká mán. Fuorisam ubaa faˈdam hé geđi gaalí ko ma gaa ˈdaraminy. Tá gál ˈguor yíekaʼ, waar yíekaʼ, sibilaam mákártaká yíekaʼ he tág gaa nannuo-, gil ony met hí hol ká eiyyeká ˈguoká hé máá hí ko geđi gaa aargiroká mán. Yierim shímle úba hé máá hí ko geđi gaa mamaloká mán.

²³Tá nyátáá édhúmle hé geđi ko ma gaa bolominy. Gál hol shugunatká afle hé geđi máá hí ko gaa mamaloká mán. Gál kua shokodaam hol gaa mamadieká hé les gállé kaamúreká yie, tá kidh lulle hé gilka he ním kuallá hí nyimisate.

²⁴Gál Waag hí ˈdeem ká shigicheká ubaa gál Waag hí gálle hosoteká fásle ubaa gál éíy taaka les ˈdú ije-, Bábilon hí chieská lulle fásle hé Waag hí Bábilonallá gaa argiyye, máá ˈgasso-, urru kinaal hí yie.