Read daasanach Kí Edhesiny 19 Bible Online

Kí Edhesiny 19 - daasanach bible

Kí Edhesiny 19

¹Hééllá lulle yú argeká, yú geđi hé hát nyésébích guđoká shalallé ˈdérká ki égká úr gaa maale, shalal kieye, Alelúyya! Waagkúnno he Rúbáchkúnno, ˈduuw ubaa fargogínt mú héllé,

²mú ˈdéé ki iđinyle he hé ˈdúwa-, tagléká! Waag hé ˈjien guđo-, babasidhe-, héllé gaa nyakarichká les ki ˈdeeneyallá ˈdéé ki iđiche, hé gedelle fásle halalle ká niiyye, shalal hí chie.

³Shalal geđi kieye, Alelúyya! ˈJien ˈdunayallá érle taalle bííyyo úrro he ki kekeme, chie.

⁴Tá karu giri tomonaam naama a afurká ubaa hé giri luogol-, afurká Waag karallé guchiká ˈdú iđoká metle abuunam les gaa ˈdane, Waag meey, kieye, Iiy-hí, he hí hát kinaallá yeet! Alelúyya! yie.

⁵Aalé kara guchííllá álle ˈdéé hót hí yé gáá ˈdiiyye, ˈdéé hót kieye, Ameeny it Waag gedellé-, hí gál ˈduuˈdúwaká yíekaʼ, hí gál aađaká yíekaʼ, hí mú kikiatóóllo, Waagkúnno meemeyyíe, chie.

⁶Aalé yú geđi hé hát nyésébích guđoká shalallé ˈdérká ki égká maale. Hé yú maalééllá yúkúrle hát yúkúr hele, shímle hát shím ˈgeˈgete. Shalallééllá kieye, Alelúyya! Máá Guđo Waag kúnnaa fargogínt lulle ˈgúóllá hé he lulle he gaa mumuro!

⁷ˈDaa giri kúlích Eliny hí gaa egeetká ali kí ˈdiiyye-, mu inillé egeetká tág ká ˈdiiyyeká, kí geyyuo, ger hí gáál gaa meet, kí mú ˈdúúw shuo.

⁸Ini Eliny hí egeetallá đafaraam ˈdabaan-, édh-, ˈjiimidat-, saas mán-, Waag hí shiicheká he faate, shalal hí chie. Đafaraam ini hí faatééllá hélle he Waag gállé he ekenyle ˈduuˈdúwaká.

⁹Aalé máá giri ˈgasso-, urruká ye geey, kieye, Hééllá warˈgát gaa véer: Gál Eliny hí gólóllé eenká kí vieká ebá Waag hí ˈdú ˈjiiy! yie. Mu geđi ye geey, kieye, Hééllá he ˈdeeny ˈdúwa-, Waaˈgietká, yie.

¹⁰Aalé yú đo mú ˈgas met les kurram gaa ˈdoy, giri mú memeyoká, kor mu đo ye geey, kieye, Ha hééllá ekêny! Yú he gedech, hát kúún ubaa nyaaram kua giri Yíésu ˈduuwle hogodho-, tá ki ˈgieká. Waag tákámle méémesh. ˈDeeny Hím Naasan Waaˈgiet hí gálaat shigichoká he Yíésu ˈduuwlé.

¹¹Aalé úr af hí furme, fárích édh-, ali yaalká yú arge. Farich Máá hí ˈdú ijoká meenyle Máá ˈdúwa-, Waag ˈDuuwle hogodhoká gaalí yeedhe. Mu yaalmit ˈdúwaká in gálaat ˈdéé ki iđimia, gál Waag hol ka kídhká beđita.

¹²Mú inle hát ˈjiet bólo. Mu huraam burnay-, kansimoká mé in ká ˈgaa. Mú meeny máá éíy taaka hí og mán-, máálle tákámle hí ógká Waag hí gaa veeˈde.

¹³Giel muí kaadhdheká fas hí bađisie, tá mú meenylé gaalí veveenká he ˈDeeny Waaˈgiet.

¹⁴Tá yuoy-, urru-, burnayye-, đafaraam ˈdabaan-, eegedh-, símis mánká faate-, fara eegedhká ˈdú iđoká mú el gaa igiˈda.

¹⁵Mú ageerle faaˈd órof-, alléká hí gáá fuoriche, giri kidh mú hol yegeská muí ki beđisatká. Mu gasar síbilká kidh af hai ki tataa.[26] Hát káána gálaat saano vinna ˈdú ˈdiđian-, ˈdúú gaa ˈduˈdúóllá, mu Waag fargogínt lulle ˈgayyoká idhollé guđoká hai kí yiimedhe, gál mú hol ka kídhká ha muí ˈdú ˈdiđima.

¹⁶Mú gielle ubaa mú gúbúsle meeny Waag hí gaa veeˈdeká he KÁNSÍCH KANSÍM LULLE MÉ KI YAALKÁ.

¹⁷Aalé yú máá ˈgasso-, urru-, tikiˈd-, aadh ˈdú yaalká arge, tá mu tere úr gaa seseennoká lulle af ˈdérká ki vie, kieye, Hol ˈdú sedhíe, gólól guđo-, Waag hí tág kí kokoyyóóllá álle mé náa,

¹⁸giri réf gál kaansúoká, réf yuoy ubaa gállé hí met ki ˈgieká, réf fara ubaa gállé hí ˈdú ijeká, gálaat lullé-, gál aađaká yíekaʼ, gál gédeká yíekaʼ, gál kaansúoká yíekaʼ, gál kansimano mánká yíekaʼ, refanolle hí kokonyoká.

¹⁹Aalé yú bíních giri kach ˈguoká ubaa les gállé kaansúoká ubaa gállé yuoyóká lúl hol ˈdú gáá yimieká arge, giri gaal Máá farich ˈdú ijo kinaal ubaa yuoyle hol yegeská.

²⁰Aalé bíních kach ˈguo kinaal ubaa bíních giri hol máá Waag hí ˈdeem ká shigicheká hol ka hoyká Máá farich ˈdú ijo kinaal hí ˈgiliˈgay. Bíních hol máá Waag hí ˈdeem ká shigicheká hol ka hoyyallá he máá giri hé gáál af ˈdaˈdabsuo-, bíních kach ˈgúóllá gaa aargireká eekemey-, gál binich gúíyle iiy yie-, gaalí ki gue-, tá binich yaalmitlé giri gaalí tág nieká memeyká ki nyiimiteká.[27] Aalé binich ubaa máállééllá hátlé luogolká Máá hí ˈgiliˈgayallá hí bás ˈjiete-, waar ˈjiet hí gaa boloonká hí gaa ijoká ki laalame.

²¹Tá gál Waag ka kídhatí lulle Máá farich ˈdú ijóóllá faaˈdlé órof-, hí af gáá fuoricheká hí chies. Aalé tére lulle gáál réfle konye, heyiyye.