Read daasanach Kí Edhesiny 2 Bible Online

Kí Edhesiny 2 - daasanach bible

Kí Edhesiny 2

¹Gál Kiristo ˈjien Efeso gaa ijoká máállé urru-, ˈgassoká ˈdeenyééllá ˈdú véer. Máá hidhino tiiya gíl ˈdaa naaniet ka ˈguo-, hé tiiya-, hórkí-, nyátáá tiiya hí ˈdú iđoká hurt gaa seseenká ˈdeenyle hééllá:

²Húgúmkícho ubaa símískícho, tá mé ki chirsankícho yáá óg. Héétí gál hé ˈdeđewká gaa sesemeká hát hí gáál héllé ˈdeđew kinaal mé ma yuyûnyká yáá óg. Gál gál alb fimiká hol ká hoy-, kor gál alb fimi-, muuniny kinaal, hát hí eiy naasate-, hí hođomle ka edhesicheká úba yáá óg.

³Itín ˈdaa meenychúka hát hí maanyjayyo-, tá hí mé ki chichirsato-, hí ma giinanyká yáá óg.

⁴Tá hé yú hí ˈdú ˈdeenteká hééllá: It gielmit hí er ˈgayyeká hayche.

⁵Ebá gielmit kinaal hát hí ˈdabiyyeká táb ˈdodhdhíe, Waag bala ˈdú náa, hé erkob hí nanniyyeká geđi naannáa. Har hát kinaal muuninyka, ˈdaab itín hí Waag bala ma ˈdú níinyká yú ha hí ˈdú gáá yiimedhe, hé kíchia horki-, nyátáá hí ˈdú iđoká ali ha yú gaa egee.

⁶Tá hé kíchia midhabká he giri itín gál Nikolaita héllé ˈdeđew-, he ekemeyoká hí nébká. Yú úba yáá gáál héllé kinaallá néb.

⁷Máá nee ˈguoká hí hé Hím Naasan Waaˈgiet hí gál Kiristo geđichóóllá maalo. Máá hé lesalloká ká adhatká ˈgór luolmiti-, ođo Waaˈgiet gaa yaalká saanolle ha yú shigia, hai kokoo.

⁸Gál Kiristo ˈjien Simirna gaa ijoká máállé urru-, ˈgassoká ˈdeenyééllá ˈdú véer. Máá Erkob ubaa Biiy El ˈDaˈd lé-, kufe-, kor geđi loolnodheká ˈdeenyle hééllá:

⁹Yú yáá manyjanykícho ubaa he mantkícho óg, tá it kamurayye. Gál hol gál Waaˈgiet yeget-, kor gál Waaˈgiet muuninyallá hé ˈdeđew-, ˈdaakíchoka huogodheká yáá óg. Gálallá he gál Satan.

¹⁰Manyjany ál ˈjob-, il hí gaa aargiˈdoká siermle haí ˈgíiny. Bá dhaayyíe, itín ˈbaal Sátan ál ˈjob ˈbíl hiiginká haí ki lalaanna, giri muí he af kí dhaˈgasanká. Ram tomon he il haí gaa aargiˈda. Aaléka, har úba káána kúfach kátaka, iiy yeen kíchia hí ye ká ˈgayyaká haí hâny, yú hé shiicho luolmitiká haí shigia.

¹¹Máá nee ˈguoká hí hé Hím Naasan Waaˈgiet hí gál Kiristo geđichóóllá maalo. Máá hé lesalloká ká adhatká hé kúfách ki naamaká hát hí kuoká mán.

¹²Gál Kiristo ˈjien Bergamon gaa ijoká máállé urru-, ˈgassoká ˈdeenyééllá ˈdú véer. Máá faaˈd órof-, ˈdinnam hullaalle gáá alléká ˈguoká ˈdeenyle hééllá:

¹³Itín hát ˈjien kara guchi-, Satanká hí gaa yaalká hí gaa iđaká yáá óg, tá it meenychú tág ki ˈgiiyya. Har úba máá chia ˈdúwa-, ˈdeenychú gálaat geđie-, Ántibas lé-, ˈjien Sátan hí gaa iđoká álle gaalí hurtkícho ki yieska, it iiy yeen hí ye iiy chieká ma đíiny.

¹⁴Tá yú yáá ˈdéé um naama-, hí ˈdú ˈdeenteká ˈguo. Itín hurtkícho hé gál gálaat he onisiny Balam oonisuoká hí gaa ijo. Bálam Bálak yaalmit gál Yisirayel ađaabano mé ki kokuoká onisie. Ađaabano kinaallá he suoryam gaalí waaˈgam hódhoká ki ˈgaˈgaleká kóonylé ubaa herginy gál hol ma shúúnanká hí hol ka ˈgieká.

¹⁵Hát tikiˈdééllá hurt kíchiallá hé gál he onisiny gál Nikolaita hí el gaa igiroká ki ˈgieká hí gaa ijo.

¹⁶Aaléka, he onisiny kinaallá hayyíe, Waag bala ˈdú náa. Har hát kinaal muuninyka, yú ál ˈjob haí gáá higila, faaˈd chia órof-, ye af gaa taalká ha kí ruuma, gál he onisinyééllá ki ˈgieká he yú ki ekemeye.

¹⁷Máá nee ˈguoká hí hé Hím Naasan Waaˈgiet hí gál Kiristo geđichóóllá maalo. Máá hé lesalloká ká adhatká mánna[4] kaany gaa iđoká ˈbaal ha yú shigia. Wár édh-, yú meeny kaanaká ˈdug gaa veere-, meenyle máá éíy taaka hí ogká mán-, máá hí lé-, hí ˈguoká tákámle hí ógká úba ha yú shigia.

¹⁸Gál Kiristo ˈjien Dhayatira gaa ijoká máállé urru-, ˈgassoká ˈdeenyééllá ˈdú véer. Iny Waaˈgiet in hí hát ˈjiet bólo-, ˈgas met hí hát gib boloonká ki égká ˈdeenyle hééllá:

¹⁹Yáá húgúm kíchia hí ˈgayya-, hát káána gielmít ubaa iiy yeen kíchia, héétí laat kíchia ubaa mé ki chirsan kíchia hí ˈgayyáállá óg. Húgúm kíchia midhab-, kaanallóóllá hát húgúm kíchia kissoká af yíé ˈdieká úba yáá óg.

²⁰Tá hé yú hí ˈdú ˈdeenteká hééllá: It min Yésebellé-, hol máá Waag hí ˈdeem ká shigichoká hol ka hoychééllá kar shiiche, min he onisiny hódhoká gedechú onisiche, giri gaal herginy gálle hol ma shúúnanká gaa seseen-, gaal suoryam gaalí waaˈgam hódhoká ki ˈgaˈgaloká kokuoká.

²¹Yáá min kár héllé gaa nyakarich kinaal haađicho-, ye makan ka ˈjeˈjeennoká shie, kor min hé hé kinaal điite.

²²Bá dhaayyíe, yú minnééllá kúlla-, hí les gaa igifichoká ha ˈdú iđimia. Tá gál ubaa min íín hé gaa nyakarich kinaal gaa seseenká ˈdaab min héllé kinaal ma hânyká manyjany guđoká úba ha yú ˈdú iđimia.

²³Héétí min umle[5] ha yú yeese, giri gál Kiristo lulle hát yú he Máá gálaat kasle ubaa gerle hélle eiy nannasatká kiimisatká. Tá itín lulkícho hé hí ekemeychóóllá hélle hollo yú hol ˈdú gáá nannaa.

²⁴Tá it hí Dhayatíra gaa iđa-, hí he onisiny hodho-, gaalí Sátan héllé geer geđiká yegetallá el ma gaa véérinyatíá ha yú hí geey, yáá hí ilsh éíy taakaká ma ˈdú iđiminy.

²⁵Tá, ˈdaab yú hol ma ka náanká, iiy yeen hí ye ká ˈgayyáállá tág chiˈdíe.

²⁶Máá hé lesalloká ká adhat-, hé yú fedoká ekemeyoká, máá kinaallá kansim giri kidh mé ki yaalká ha yú shigia.

²⁷Mu kidh gasar síbilká af hai ki tataa, kidh hát ibilaamka eiy hai babaa.[6] Hát tikiˈde yú ˈJaachú kansím gaa argééllá, mú kansím ha yú shigia.

²⁸Mú úba hidhint biiy hí kí bibiˈdoká ha yú shigia.[7]

²⁹Máá nee ˈguoká hí hé Hím Naasan Waaˈgiet hí gál Kiristo geđichóóllá maalo.