Read daasanach Kí Edhesiny 22 Bible Online

Kí Edhesiny 22 - daasanach bible

Kí Edhesiny 22

¹Aalé máá ˈgasso-, urru kinaal ye wár bíé luolmitiká hí gaa ijo-, dhát-, ˈjiimiˈdat-, kara guchi-, Waaˈgiet-, ubaa Elinyiká gáá fafaanká ye ká argisie.

²War ˈjien ˈgíéríchle mé il ˈgar faanne. ˈGór luolmitiká war ˈdinnam hullaalle gáá ˈdie. ˈGuor wár tikiˈdeká af tomon tikiˈde a naama ki higisa, ˈguiyam lullé gaa higisa. ˈGuor kinaal neelle íín kidhdho he bibisia.

³Biiy hé geđi hé níínní ˈdortó gim gaa ijoká mán. Kara guchi-, Waaˈgiet-, ubaa Elinyiká ˈjien kinaallá he gaa yaalla, tá Waag gedelle hujich haí ki nanniyya.

⁴Mú gede lééllá mú innumle hai aargira, tá mú meenyle gáál met bala he ki ˈgee.

⁵Biiy hé geđi ma chuchurany, tá ˈdaa giri Máá Guđo Waag íín he gáál édhúmléká gaal hé geđ nyátáá édhúmle ubaa aadh édhúmle ma hegesen. Aalé gaal taalle bííyyo lesso he gaa mumura.

⁶Aalé máá ˈgasso-, urru-, kinaal geđi ye geey, kieye, ˈDeenyééllá he ˈdeeny ˈdúwa-, ˈduuwawká. Máá Guđo Waag gál he ˈdeem ka shigieká Waaglééllá hé máállé ˈgasso-, urruká ali gáá kaay, giri mu Waag gedelle hé ˈjobintéél yé gáá ˈdeˈdeenká aargisuoká, ye yie.

⁷Yíésu kieye, Bá dhaayyíe, yú ˈjobintééllá ha gáá ˈjeeme. Máá ˈdeeny Waag gáá yimie-, warˈgatééllá gaa ijóóllá el gaa veeroká ebá Waag hí ˈdú ˈjiiy! yie.

⁸Yáá Yuána lééllá he máá hééllá lulle maale-, tá he il ki argeká. Hééllá lulle yú maale-, tá yú il ki argeká, yú máá ˈgasso-, urru-, ye hééllá argisíéllá ˈgas met les gaa ˈdoy, giri yú mú memeyoká.

⁹Kor mu ye geey, kieye, Ha hééllá ekêny! Hát káána kúún ubaa gál kua nyaaram-, Waag hí ˈdeem ka shigichééllá ubaa gál warˈgatééllá ˈdeenyle iiy yie-, el gaa igiróóllá hí Waag gede lééllá, yú úba he Waag gédéchlé. Waag tákámle méesh, yie.

¹⁰Mu geđi ye geey, kieye, ˈDeeny Waag hí ko ká shigiche-, kuuní warˈgatééllá gaa veeˈdééllá ha káan, ˈdéé bárle hé ká ˈjobonte.

¹¹Máá hé ˈdeđewká gaa seseenká hí héllé ˈdeđew kinaallá gaa seeseen, máá gaa nyakarichká hí hátlé gaa nyakarich kinaal gaa yíéđuo. Máá hé ˈduuˈdúwaká ekemeyoká hí héllé ˈduuˈdúwa kinaallá eekemeyo, tá máá Waag hílléká hí taalle Waag máálle yeet, yie.

¹²Yíésu kieye, Bá dhaayyíe, yú ˈjobintééllá ha gáá ˈjeeme. Gálaat héllé eekemeyká eiyyo yú hol gaa nannaa. Gál hé midhabká eekemeyká hé shiicho ha yú shigia, gál hé ˈdeđewká eekemeyká íín he illo yú ká aargisia.

¹³Yú he Álfa ubaa Oméga, yú he Erkob ubaa Biiy El ˈDaˈd, yú he Mé Gáá Koon ubaa Biiy Ello.

¹⁴Gál gielolle ˈjieká ebá Waag hí ˈdú ˈjiiy![28] Gál kinaallá ˈduuw gálle ˈjien Waaˈgiet karafanolle ki higilo-, ˈgór luolmitiká saanolle kokuoká Waag haí shigicha.

¹⁵Tá gál gaa nyakarichká íín hé ˈjien kinaallá ma higiliny. Gál kinaallá he gál gilka he ním ˈguoká ubaa gál herginy gálle hol ma shúúnanká gaa seseenká, tá gál gálaat yegeská, héétí gál waagam hódhoká vivisatká ubaa ameeny gál ˈdeem hođomká giel-, gaa seseenká.

¹⁶Yáá Yíésu lééllá máá chia ˈgasso-, urruká ko ali ˈdú gáá kaay, giri mu ko fayamééllá shiguo-, itín hí gál Kiristo fayamééllá shigichoká. Yú he Hídh ˈbíl íl ˈDawuˈd. Yú he hidhint biiy hí ki bibiˈdo-, édhká, Yíésu hí yie.

¹⁷Aalé Hím Naasan Waaˈgiet ubaa ini Eliny hí egeetká Yíésu geey, kieye, Ka yímet! yie. Héétí máá hééllá maaloká hé úba Yíésu ka yímet yeet. Máá báre hí chees-, bíé luolmitiká fedoká hí ká yimet, hí bie hállééllá ˈjio.

¹⁸Ameeny máá ˈdeeny Waag gáá yimie-, warˈgatééllá gaa ijóóllá maaloká yú geeye, máá warˈgatééllá ˈdeenyle af ˈdú fafuoká, máá kinaallá hé gálaat ki ˈdeew-, warˈgatééllá gaa ijóóllá Waag il haí ká aargisicha.

¹⁹Tá máá ˈdeeny Waag gáá yimie-, warˈgatééllá gaa ijóóllá điidhoká, máá kinaallá Waag ˈgór luolmitiká kóonyle, ubaa ˈjien Waaˈgiet hilitle, ˈdéé hótle warˈgatééllá gaa iđóóllá Waag haí ká riata.

²⁰Máá ye kí edhesinyééllá kí edhesieká kieye, Iiy-hí, yú ˈjobintééllá ha gáá ˈjeeme, yie. Iiy-hí, he hí hat kinaallá yeet! Kó guđo Yíésu lééllo, ka yímet!

²¹Máá Guđo Yíésu hí lulkícho ˈdú ˈjeeˈjeen. Iiy-hí, he hí hát kinaallá yeet!