Read daasanach Kí Edhesiny 3 Bible Online

Kí Edhesiny 3 - daasanach bible

Kí Edhesiny 3

¹Gál Kiristo ˈjien Sartis gaa ijoká máállé urru-, ˈgassoká ˈdeenyééllá ˈdú véer. Máá giri hím naasan tiiya-, Waaˈgietká ubaa hidhino tiiya ˈguoká ˈdeenyle hééllá: Yú yáá húgúmkícho óg. Itín kerka meeny gál luogolká hí ˈgayya, kor it kuyye.

²In eiy ˈdeeyyíe, iiy yeen kíchia hí kí ˈgisatééllá hátlé el met hí ma ˈgínnallá hirayyíe. ˈDaakíchoka hé yú argeká, hújích hí nanniyyóóllá innum Waaˈgietka hé tagle muuniny.

³Aaléka, hé hí maalle-, hí iiy chieká táb ˈdodhdhíe, hé kinaallá ki kuongʼoˈdíe. Hé kíchia ˈdeđewallá gíl sug ki hayyíe, Waag makan famíe. Tá har hí in eiy ma ˈdeđinyka, onnóo, yú hát máá buraa léká ká yiimedhe, it aadh ˈgás yú gáá yiimetká muog.

⁴Tá gál kíchia ˈbaal Sártis gaa ijóótíá đafaraamle hé ma muˈgâny.[8] Gál kinaallá ˈdaa giri ki ˈdúwaká in đafaraam eegedh-, yú fadhdhééllá úba faadhdha, nyí hol ˈgar seseenne.

⁵Máá hé lesalloká ká adhatká hát gaal ííníílláka đafaraam eegedhká hai faadhdha. Yáá máállá meenyle warˈgat luolmitiká ma gaa hogoliny, ˈJaachú ubaa gállé ˈgasso-, urruká metle mu hát mááchúká ha yú gaa hogodho.

⁶Máá nee ˈguoká hí hé Hím Naasan Waaˈgiet hí gál Kiristo geđichóóllá maalo.

⁷Gál Kiristo-, ˈjien Filaˈdelfia gaa ijoká máállé urru-, ˈgassoká ˈdeenyééllá ˈdú véer. Máá giri saas mán-, ˈdúwa-, kúlfí ˈDawuˈd[9] gíl ka ˈguo-, hé af fufuroká máá níínní hí af gaa kokuo-, mán-, héétí hé af gaa kokuoká máá níínní hí af fufuro-, mánká ˈdeenyle hééllá:

⁸Húgúmkícho yáá óg. Bá dhaayyíe, yáá hí kar af kí fure. Kár kinaallá hé máá níínní hí af gaa kokuoká mán. Hát hí fargogint guđoká mánká yáá óg, tá it ˈdeenychú chirate, meenychú ma đíin.

⁹Bá dhaayyíe, gál ˈbíl ˈdiiyiminy Satanká hođomlé-, hol gál Waaˈgiet yeget-, kor gál Waaˈgiet muuninyallá héllé yú ki ekemeyoká onnóo. Gáál ha yú ká egee, gaal metkícho les kurram hai gaa ˈdarama, gaal hát yú hí gielká hai kiimita.

¹⁰Aalé ˈdaa giri ˈdeeny chia kieye, mé ki chirtíe, chieká hí chirateká, aaléka af giri manyjany les gáá ˈdeen-, gál les ˈdú ijoká lulle he il hí aargiˈdoká, hé kinaal ha yú hí ká riidha.

¹¹Yú ál ˈjóbo gáá yiimedhe. Hé hí ˈgayyaká tág chiˈdíe, giri hé shiicho Waag hí shigichoká máá níínní hí ka riatká mánká.

¹²Máá hé lesalloká ká adhatká Waagchú ˈbílle aarlé hí guogoyoká áár tikiˈd ha yú hođia. Mu hé geđi ˈbíl kinaallá yé ma gaa ˈdeeminy. Tá mú Waagchú meenyle ubaa Waagchú ˈjienle meenyle ha yú gaa verene. ˈJienééllá he Yerúsalem kaana-, Waagchú gáá chiimet-, úr gáá leletoká. Héétí meeny chia kaanaká úba ha yú mú gaa verene.

¹³Máá nee ˈguoká hí hé Hím Naasan Waaˈgiet hí gál Kiristo geđichóóllá maalo.

¹⁴Gál Kiristo ˈjien Lauˈdikew gaa ijoká máállé urru-, ˈgassoká ˈdeenyééllá ˈdú véer. Máá He Hí Hát Kinaallá Yeet lé-, ˈdúwa-, fayam Waaˈgiet ˈduuwle hogodho-, tá Waag hé ka kuonneká mé ki yaalká ˈdeenyle hééllá:

¹⁵Yáá húgúmkícho óg. It hát bíé abunaká muuninyal! Ubaa hí bíé kulaká muuninyal! Kalat hí bíé kulaká muuninyka, hí bíé abunaká onnônyka.

¹⁶Aaléka, ˈdaa giri taalle hí tiidh niginiká ˈgayya-, hí ma kulnany-, muuninyka, hí ma aabunanyká, af ha yú hí gáá leesia.

¹⁷Itín hí kieye, Nyáá nyí kaamurayye, nyíín nyí gál kaamúre, nyáá hé níínní nyí ˈdabiyyeká mán, hí hol cheedhe. Itín yaalmit ˈdeew-, éésh mán-, hí ki iđoká it muog. Itín hát hí gál he mán-, in mán-, hí búr iđaká muogká.

¹⁸Aaléka, hatallá ˈdée, hórkí ˈjiet hí ˈgeesiche-, óshor mánká ye gaa hidhdhíe, giri hí gál kaamúreká chegetoká.[10] Đafaraam eegedhká ye gaa hidhdhíe, giri hí fafaat-, hí búr ma iđiny-, kern hí ma ˈgiˈginká.[11] Sáláb ˈgór ˈgayyoká úba ye gaa hidhdhíe, giri sáláb kinaal hí in gaa liliat-, hí biiy gaa aargiˈdaká.[12]

¹⁹Gál yú gielká in yú ki lolodhmo, yú af tataa. Aaléka ˈgaađamíe, ye bala ˈdú gáá náa!

²⁰Bá dhaayyíe, yáá ˈbíl af yaal, ˈbíl máálle veveen. Máá ye af maalo-, ye ˈbíl af kí eewká ˈbílle ha yú higila, ˈgarro nyí hol golmosoto.

²¹Hát káána yú he lulle ká adhdhe-, káána ˈJaachú karallé guchiká nyí ˈdú iđáállá, máá hé lesalloká ká adhatká ˈduuw máálle nyí hol kara chia guchiká ˈgar yíéđianká úba ha yú shigia.

²²Máá nee ˈguoká hé Hím Naasan Waaˈgiet hí gál Kiristo geđichóóllá maalo.