Read daasanach Kí Edhesiny 4 Bible Online

Kí Edhesiny 4 - daasanach bible

Kí Edhesiny 4

¹Hééllá lulle yú argeká, úr af hí furme yú arge. ˈDéé hót er yú maale-, faˈd shímle ki égká geđi ye geeyche, kieye, Úr ál yú ijóóllá mé ká naʼ. Hé yú ko geeyallá elle yaalmisano yé ká ˈdeˈdeenká ha yú ko ká aargisia, ˈdéé hót hí ye chie.

²Ál ˈjób kinaallá Hím Naasan Waaˈgiet kaschú eete, hol gaa sisite, in yú kara guchi-, úr gaa yaal-, máádhat hí ˈdú ijoká arge.

³Máá kara guchi kinaallá ˈdú ijeká bísle hát wár midhab-, búr ubaa ˈgileebká. Tá kara guchi kinaallá chala bis hí ˈgileeb-, ráshká hí buanne.

⁴Kara guchi kinaal karm éíy taaka guchiká tomonaam naama a afurro hí ki made. Karm kinaallá káru tomonaam naama a afurro hí ˈdú ije. Karu kinaallá gielo eegedhká he fadhdhe, shotam guguchi-, horkiká he met ká ˈgie.

⁵Kara guchi kinaal édhúm birgachle gogo-, yaarít ubaa ˈgeˈget fargogoká hí yé gáá ˈdie. Kára metle nyátáá tiiya-, gaalí ˈjiet gaa iđimuoká hí gaa boloyye. Nyátáá tiiya kinaallá he hím naasan tiiya-, Waaˈgietká.

⁶Kára metle úba bás dhát-, ˈjiimidatká hí ije. Kára ˈdinnamle lulle hé luogol-, afur-, bala ubaa sug in burnay-, biiy ki dhaˈgasanká ka ˈguoká hí ˈgie.

⁷Hé luogol kinaal hé erká hát luoch. Hé ki naamaká hát ány ˈguo yábká. Hé ki seđeká innumle hát innum máádhat. Tá hé ki afurká hát kódích kuol efeká.

⁸Hé luogol-, afurallá lulle kuol hí lelle, gónle ubaa kuolle lulle in biiy ki dhaˈgasanká hí kuˈd. Kulich ubaa chúúrélle hé árallá ˈdony ali ma kokony. Ár kieye, Máá Guđo Waag fargogínt lulle ˈguo-, kíssóótí ali ije-, káána ali ijo-, tá bár ka chiimetká úba ali ijoká he Máá ˈdúwa-, saas mán-, saas mán-, saas mánká! aar hí yie.

⁹Af giri hé luogol kinaal Máá kara guchiká ˈdú ijo-, taalle bííyyo ali ijoká ˈdúúw shiiguo-, mú memeyo-, tá mú gielmít hol ˈdú nannuoká,

¹⁰gál káru tomon naama a afurká Máá kara guchiká ˈdú ijo-, taalle bííyyo ali ijóóllá met les gaa ˈdarama, mú memeye. Gaal shotamlé hórkíká kara guchííllá met fafaa, áár ˈdarama, kieye,

¹¹Máá kínyaa Guđo Waag, kó ˈdúúw ˈgayyo. Guch ubaa ˈdúúw tá fargogínti, lullééllá hékú. Kuun he met lullé ká kuonne. He feditkú ˈdaalleka, he met lullé ka kuonnééllá hé biiy gaa ijo, gaalí yie.