Read daasanach Kí Edhesiny 6 Bible Online

Kí Edhesiny 6 - daasanach bible

Kí Edhesiny 6

¹Aalé Eliny kat tiiyaká katlé erkobká silmieká yú arge. Hé giri luogol-, afurká he tikiˈd ˈdéé hodhe, yú a maale. He ˈgoonyle yérle hát ˈgeˈgete, he kieye, Káde! yie.

²Yú fuˈjieká fárích édhká arge. Farich máá hí ˈdú ijeká ˈbadá ˈgaa, mú Waag hí shóte guchiká shiiche, mu đo hát máá oos ka aađaatká ká sedhe.

³Aalé Eliny kat tiiyaká katlé ki naamaká sillieká hé luogol-, ki naamaká yú a maale, he kieye, Káde! yie.

⁴In aalé fárích éíy taaka-, búrká yé ká ˈdie. Máá hí ˈdú ijeká Waag hí fargogínt shiiche, giri naanná les gaa egew-, gál les ˈdú ijoká hol beđisatká. Mú đo Waag hí faaˈd órofká shiiche.

⁵Aalé Eliny kat tiiyaká katlé ki seđeká sillieká hé luogol ki seđeká yú a maale, he kieye, Káde! yie. Yú fuˈjieká fárích óngʼorká ká yiimie. Farich máá hí ˈdú ijeká hé gaalí ˈguom ilshamle ki dhaˈgasanká gíl ká ˈgaa.

⁶In hé luogol-, afurká hurtle yú ˈdéé hót gaa maale, ˈdéé hót kieye, Sííndí murmurté hí tikiˈdeká bírelle hújích kulich hí tikiˈdeká hai yeedhe. Tá rub murmurté hí seđeká úba bírelle hújích kulich hí tikiˈdeká hai yeedhe. Héétí salab ubaa ˈduu vinna haí ˈdeenêny, ˈdéé hót hí chie.

⁷Aalé Eliny kat tiiyaká katlé ki afurká sillieká hé luogol ki afurká yú a maale, he kieye, Káde! yie.

⁸Yú fuˈjieká, fárích ikarká arge. Máá hí ˈdú ijoká meenyle Kúfach. Tá mú Ál Kufachietká hí el gaa igira. Gálallá in Waag hí fargogínt shiiche, giri gál les gaa ijo-, met hí afurká mé tikiˈd faaˈd órofká ubaa már, tá basham ubaa bine kach ˈguo-, lesietká ki yegeská.

⁹Aalé Eliny kat tiiyaká katlé ki chenká sillieká kúb suoryoká gimle gál ˈdaa ˈdeeny Waaˈgiet ubaa ˈdéé ˈdiiyiminyle ˈdugaka gaalí yieská sidhamle yú gaa arge.

¹⁰Gaal af ˈdérká ˈdéé ki hodhe, kieye, Máá Guđo Waag saas mán-, ˈdúwa-, les he gaa mumuróóllo, kuun amáre gál les ˈdú ijoká ˈdéé ki iđimicha, fáskínyo halalle ká nanniyya? yie.

¹¹Gálallá đo Waag hí gielo eegedhká eiy taat shiiche, Waag hí geeyche, giri gaal á níínni mare yíéđian-, ˈdaab gáál nyaaramlé-, Kiristo-, les gaa ijo-, hát gaal íínka gede Waaˈgietallá ˈdáblé gaalí gaa yegeská úba gaalí ma gaa yíésinyká.

¹²Aalé Eliny kat tiiyaká katlé ki leká silmieká yú arge. Les đo súm mootoonne. Aadh súm ongʼoroyye, óngʼórle hát ís ongʼoˈdeká. ˈGuiy alulle búr yie, burle hát fás.

¹³Héétí hidhino hát urgúaka wááních fargogoká ká ˈdoyka kinnach um urgano gáá okoˈdmootallá úba urgano gáá ookodmoˈde.

¹⁴Ur hát warˈgat gaalí mamarokáka, ali gaa guure. Gumano ubaa korm lulle alble gaa bame.

¹⁵Aalé les gállé kansúoká, gállé guguđoká, gállé yuoy met ki ˈgieká, gállé kaamúreká, gállé farguoginsam ˈguoká, héétí les gállé aađaká yíekaʼ, gállé gédeká yíekaʼ lúl ligisham gerle ubaa gumano nyataabanolle gim ki erey.

¹⁶Gaal gumano ubaa nyataabano vie, kieye, Nyí ˈdú ˈdannáa! Nyí innum Máá kara guchiká ˈdú ijoká ubaa Élíny idholle nyí met gaa shuolsía!

¹⁷Kúlích gáál idholle ka chiimetoká hé ali kí ˈdiiyye! Mááya idhóóllá met ki ˈdeˈdeenká ura? gaalí yie.