Read daasanach Kí Edhesiny 8 Bible Online

Kí Edhesiny 8 - daasanach bible

Kí Edhesiny 8

¹Aalé Eliny kat tiiyaká katlé ki tiiyaká sillieká, ur đo aadh ˈgas đúúw ríg gaa yie.

²Aalé gál ˈgasso-, urru-, tiiya-, aadh lulle Waag met ˈgieká yú arge. Gáál gaalí faˈd tiiya eiy taat shie.

³Aalé máá éíy taaka-, ˈgasso-, urru-, kedmit horki-, gaalí éru ki ˈdunmayoká gíl ká ˈguoká ká yimie, kúb suoryoká bala ki ˈdie. Mú gaalí eru guđoká shie, giri mu eru kinaal ubaa Waag visan gál Kiristoká lulle kúb suoryo-, horki-, kara guchiká met ijoká álle Waag ˈdú siidhoká.

⁴Eru érle ubaa Waag visan gál Kiristoká kedmít máá ˈgasso-, urruká hí gíl ka ˈgieká geer yé gáá ˈdie, Waag met gaa kie.

⁵Aalé máá ˈgasso-, urruká ˈduno bolomeká kúb suoryoká ˈdug gáá shuunne, kedmit gíl ka ˈgie kinaal ká fadhdhe, ˈduno les ˈdú okodie. ˈDuno bolome kinaal les ˈdú okoˈdeká ˈgeˈget đo shiiyye, yaaˈde, ir biirgime, les úba mootoonne.

⁶Aalé gál giri ˈgasso, urru-, tiiya-, faˈd tiiyaká ˈgieká tagano ˈdie, giri faˈd ˈdaraanká.

⁷Máá ˈgasso, urru-, erká faˈdle ˈdoy, đo ír waar ˈguoká ubaa ˈjiet fás hol ˈguoká les ˈdú okoˈde. Les met ˈdinnamlé seđeká mé ˈdíne tikiˈd ubaa ˈguorle ˈdunay, ísh nyuro-, hí gaa ˈgieká lúl úba ˈdunay.

⁸Aalé máá ˈgasso-, urru-, ki naamaká faˈdle ˈdoy, đo hé gúm guđoká ki ég-, ˈjiet hí gaa boloonne mare gaalí bás ki lay. Aalé bás met ˈdinnamlé seđeká mé ˈdíne tikiˈd fás yie,

⁹hé luogol-, bás gaa ijeká met ˈdinnamlé seđeká mé ˈdíne tikiˈd lúl hí kufe, héétí kadís met ˈdinnamlé seđeká mé ˈdíne tikiˈd lúl eiy baabaanne.

¹⁰Aalé máá ˈgasso-, urru-, ki seđeká faˈdle ˈdoy, đo hidhint guđo-, hát ˈjietka boloonneká úr gáá ˈjiiyye, warram ubaa haˈdam met ˈdinnamlé seđeká mé ˈdíne tikiˈd les gaa ˈdoyye.

¹¹Hidhint meenyle Heđeʼ. Warram ubaa haˈdam mé ˈdíne-, hidhint hí les gaa ˈdoyyeká bietle heđey, tá ˈdaa giri biet heđeyká, gál burnayká kufe.

¹²Aalé máá ˈgasso-, urru-, ki afurká faˈdle ˈdoy, đo aadh ubaa ˈgúíy tá hidhino met ˈdinnamlé seđeká met ˈdinnam taat Waag hí ˈdanne, met ˈdinnam Waag hí ˈdanne kinaal édhum ˈdabiyye. ˈDaa kinaallá ˈdugaka, kulich ubaa chúúre met ˈdinnam taat édhum ˈdabiyye.

¹³Aalé yú fuˈjieká kódích úr gaa đuđulan-, af ˈdérká ˈdéé ki hogodhoká yú af maale, kodich kieye, Hoba! Hoba! Hoba! Faˈd ˈdony gál ˈgasso-, urru-, seđéétí hí ál ˈjob gaa ˈdaraanallá, ebá gál les ˈdú ijoká ki ˈdéen! kodich hí yie.