Read daasanach Kí Edhesiny 9 Bible Online

Kí Edhesiny 9 - daasanach bible

Kí Edhesiny 9

¹Aalé máá ˈgasso-, urru-, ki chenká faˈdle ˈdoy, đo yú hidhint úr gáá ˈjiiyye-, les ˈdoyyeká arge. Hidhint gaalí ˈguoˈd gaa ˈdér-, el mé mánká kúlfílle afle shie.

²Hidhint ˈguoˈd gaa ˈdér-, el mé mán kinaal af fuˈde. Eer hát ér ˈjiet guđoká ki égká ˈguoˈd af gáá kie, eer aadh ubaa biiy buˈd hoy, ongʼorosie.

³Aalé ér kinaal ˈgamutaach hí yé gáá ˈdie, ˈgamutaach les ˈdu gáá guure. ˈGámútááchallá fargogínt Waag hí shiiche, giri af heđle hát af heđ genyamká.

⁴ˈGamutaach Waag hí geeyche, giri iish ubaa ˈguor tá he lullé ˈgileeb les gáá ˈdeˈdeenká ma ˈdeđeneny-, gál giri gúíy Waaˈgiet met bala ka mánká tákámle gon bólo aargisuoká.

⁵Aalé ˈgamutaach đo Waag hí mé fuˈde, giri gáál ma yegesiny-, kor gáál ˈguiyam chen gaa maanyjasuoká. Manyjasiny ˈgamutaach hí gáál il ká aargisuoká kulle hát hé geeny he máádhat koey.

⁶Bár kinaallá gálaat kúfách kufunanká hol gaa ˈgeˈgedhe, kor gaal hé ál níínní kúfach ki aargiroká mán. Gaal af kinaal súm kúfacho he fede, kor kufach gáál afo he ˈgiˈgita.

⁷ˈGámútáách kinaallá hát fara gaalí ˈgulo oosoká fieká. ˈGamutaach hé met ka ˈgieká hát shotam horkiká. Innumle hát innum gálaat,

⁸metle dhúrle hát met gál ˈdiet, kachle hát kach lua.

⁹Hé hát ˈberam sibilaamká he balo ká ˈgie, tá kuol ˈdonyle yúkúrle hát fara burnay-, muulamlé ruuká ˈguo-, ruruanká yúkúrlé.

¹⁰Waasle hát waas genyam hirís ˈgayyoká. ˈGamutaach fargogintlé he gálaat ˈguiyam chen gaa maanyjasuoká waaslé kinaallá he ká ˈgaa.

¹¹ˈGamutaach kánsíchlé hí mé ki yaalká he ˈguoˈd gaa ˈdér-, el mé mánká máállé ˈgassoká. Mú meenyle af Heberewka he Ábadon, af Hellenka mú meenyle Abólyon.[13]

¹²Aaléka, hóbá erkobká hé ˈgite. Bá dhaayyíe, hóbá éíy naamaká geđ igiˈde.

¹³Aalé máá ˈgasso-, urru-, ki leká faˈdle ˈdoy. Yú đo kúb suoryo-, horki-, Waag met gaa yaalká gaaslé afurká ˈdéé hót gaa maale.

¹⁴ˈDéé hót kinaal máá ˈgasso-, urru-, ki le-, faˈd ˈgieká geeyche, kieye, Gál ˈgasso-, afur-, urru-, Waag hí wár gaa guđo-, Yufiretiká álle ki moycheká ká hash, chie.

¹⁵Aaléka, gál ˈgasso-, afur-, urru-, Waag hí aadh ˈgaséél, kúlíchal, ˈguiyáál, tá wáral taak ki koyyeká gaalí ká hay, giri gál les gaa ijo-, met hí seđeká mé tikiˈd yegeská.

¹⁶Gál ˈgasso kinaal gállé yuoyó-, fára ˈdú ijoká túóylé yú maaleká shíí shíí burnayká.

¹⁷Fara ubaa gál hí ˈdú ijeká yaalmisanollé yú argeká hééllá: Gál fára ˈdú ijeká ˈbermlé sibilaamká bís tikiˈd hí búr, tikiˈd ˈgiléeb, tikiˈd ráar. Fára metle hát met lua, afle ˈjiet ubaa éér tá waar ˈjiet hí gaa boloonnoká hí yé gáá ˈdeˈdeme.

¹⁸Hé seđe-, ˈjiete, éér, tá waar ˈjiet hí gaa boloonneká fára af ger yiem gáá ˈdeˈdemééllá gál les gaa ije-, met hí seđeká mé tikiˈd yies.

¹⁹Faráállá farguoginsamle af ubaa waaso he ká ˈgie, waasle hát chaara, hé af gálaat ki kokuoká ˈgie.

²⁰Gál hé seđééllá hí ma yíésiny-, les ˈdug kí ˈgitééllá hé héllé ˈdeđewká ma hâny, Waag bala ma ˈdú níiny. Gaal hátle aryáán ubaa waagam hódho-, gaalí hórkí, sibilaam ííkarská, gib raagarká, héétí waar ubaa ˈguor tág gaa nie-, hé argo ubaa mamalo mán-, hol ma gaa seseminyallá he vivita.

²¹Gaal hé úba gálaat oosle ubaa gilka he nímle, tá herginy gálle hol ma shúúnanká, héétí buraa má hâny, Waag bala ma ˈdú níiny.