Read dhopadhola Cakirok 12 Bible Online

Cakirok 12 - dhopadhola bible

Cakirok 12

¹Onyo Rwoth owaco ri Abram ni, “Weyi piny perin gi wade perin kodi peco pa benin, aka ikadhi i lowo m'akidho nyuthin.

²Abino miyin nyikwayin kweth, aka jobino lokirok piny madwoŋ. Abino miyin silwany t'aloko nyingin madwoŋ, ŋey ibedi jasilwany.

³Abino miyo silwany jono ma jomiyin silwany; t'abino kwoŋo jono ma jokwoŋin. Aka wok kwoŋin piny je bino limo silwany.”

⁴Ameno Abram okadho paka Rwoth owaco rigo; aka okadho gi Loti. Abram oyido jaoro piero abirio g'abic munyo oeye Haran.

⁵Abram okadho gi cege Saray, Loti wod p'omin, lim pere je m'oyido jotieko coko kodi ŋecin pere; aka joay kadho i piny Kanan. Munyo jotundo i Kanan,

⁶Abram owotho i lowo no aka otundo i Kabedo Maleŋ i Sekem i tiendi yath maleŋ m'ilwoŋo ni More. I hongo no Jokanan oyido fodi jobedo i lowo no.

⁷Rwoth omenyere ri Abram aka owaco ni, “Ri nyikwayin, Abino miyo lowo me.” Ameno Abram ogeto kenyo ri Rwoth m'omenyere rigo migam.

⁸Rumacen okidho yupiny ma piny matendere yuwok ceŋ ma tindi madwoŋ Bethel aka ogero wema pere i dier Bethel yupodho ceŋ kodi Ay yuwok ceŋ. Kenyo go ogeto migam to lamo Rwoth.

⁹Aka Abram omedere ka kidho yupiny ma Kanan.

¹⁰Onyo kec oyido nitie i Kanan; aka oyido kec swa ma Abram oloro piny i Misir bedo kenyo ma hongo moro.

¹¹Munyo go cegin donjo Misir, owaco ri cege Saray ni, “Aŋeyo paka ibedo dhako maŋon swa anena;

¹²aka ka Jomisir jonenin jobino waco ni, ‘Me cege.’ Kenyo jobino nekan, to joweyin makwo.

¹³Waci nike ibedo nyamin an; kenyo ro in jokibino nekan aka to joteran maber.”

¹⁴Munyo joŋado kew to jodonjo i Misir, Jomisir joneno ni Saray oyido ŋon swa.

¹⁵Aka munyo jodhum pa Farawo joneno go, jopako go ri Farawo. Ameno oter go i cel pa kere pere.

¹⁶Aka ro Saray, Farawo otero Abram maber to miyo go rombo, diegi, dhok, punde, ŋecin, kodi ŋamia.

¹⁷To rupiri Farawo oyido otero Saray, Rwoth odhiro thoyamo madwoŋ kwoŋ Farawo kodi ji pere i cel pa kere.

¹⁸Kenyo Farawo olwoŋo Abram aka openjo go ni, “Me aŋo m'itimo ran? Raŋo ikiwaco ran nike go oyido obedo cegin?

¹⁹Raŋo iwaco nike go nyamin in t'atero go paka dhako paran? Onyo ee dhako perin, ter go aka kadhi!”

²⁰Aka Farawo omiyo cwo pere cik aka jotero Abram to joketho go woko ma Misir, kanyacel gi cege kodi kisi gim'oyido nitie gine.