Read dhopadhola Cakirok 13 Bible Online

Cakirok 13 - dhopadhola bible

Cakirok 13

¹Ameno Abram okadho yumalo wok Misir kodi cege gi kisi gimoro m'oyido nitie gine, to Loti kadho gine yupiny.

²Abram oyido oŋaŋ swa; nitie gi rombo, diegi, dhok, kiri gi feza gi zahabu.

³Kenyo go oeye kenyo aka okadho yo Bethel, i kabedo ma go oyido oger'iye wema pere i cakirok i dier Bethel gi Aya;

⁴kenyo go oyido oget'iye migam, aka olamo Rwoth kenyo.

⁵Loti bende oyido nitie gi rombo, diegi, dhok, gi peco pere won kodi ŋecin.

⁶Ameno lowo oyido kirom jario bedo kanyacel rupiri oyido jonitie g'ogwaŋe madit.

⁷Aka dhaw ocakere i dier jokwath dhok pa Abram kodi jokwath dhok pa Loti. I hongo no Jokanan kodi Joperiz oyido fodi jobedo i lowo no.

⁸Kenyo Abram owaco ri Loti ni, “Wabedo wade, aka kiripi ni cwo paran g'aperin jowodhaw.

⁹Riameno weyi wapokere. Yer adec ma lowo m'imito; aka an abino kadho racuc, to in ikadho racam.”

¹⁰Loti otiŋo waŋe malo to neno milelo Yordan nger m'oyido nitie gi pi kweth paka ndelo pa Rwoth, paka lowo ma Misir yo Zowar. Me oyido mafodi Rwoth k'oreyo Sodom gi Gomora.

¹¹Ameno Loti oyero milelo Yordan je rigo won, aka Loti okidho yuwok ceŋ; aka ameno apaka jario jopokere.

¹²Abram obedo i lowo ma Kanan, aka Loti i tindi madongo ma milelo aka ocoro wema pere kiri cegin gi Sodom.

¹³Onyo cwo ma Sodom oyido jokidakana, aka jotimo reco madongo kwoŋ Rwoth.

¹⁴Rumacen munyo Loti otieko pokirok gi go, Rwoth owaco ri Abram ni, “Tiŋi waŋin malo, aka iŋiy maber gi kam'initie iye i kisi thenge.

¹⁵Kole lowo m'ineno no je abino miyin gi nyikwayin

¹⁶Abino miyin nyikwayin madit pa fukefuke ma lowo; ŋey ka nyatoro nyalo kwano fukefuke ma lowo, nyikwayin bende nyalo kwanere.

¹⁷Ay, iwothi i lowo gipi, rupiri akidho miyin gikululu.”

¹⁸Ameno Abram okodo wema pere, aka obino to bedo cegin gi olwa pa Mamire i Hebron; aka kenyo ogeto ri Rwoth migam.