Read dhopadhola Cakirok 14 Bible Online

Cakirok 14 - dhopadhola bible

Cakirok 14

¹Kerin aŋwen, Amirafel ma Babilon, Ariok kere ma Elasar, Kedorilaomer ma Elam, kodi Tidal ma Goyim

²jokidho lweny gi kerin abic man; Bera ma Sodom, Birisa ma Gomora, Sinab ma Adima, Semeberi ma Zeboyim, kodi kere ma Bela (meno Zowar).

³Kerin abic me oyido joriwere i milelo ma Sidim (nam ma cumbi).

⁴Jo oyido jonitie i dhum pa Kedorilaomer ma oro apar g'ario, to i oro mar'apar g'adek jokwero dhum pere gi mbaka.

⁵I oro mar'apar g'aŋwen Kedorilaomer obino gi kerin m'oyido nitie gine aka jokengila Refayim ma Asiteroth Karnayim, Zuzim ma Ham, Joemim ma Save Kiriathayim,

⁶kodi Johori i gote ma Edom, aka joriemo jo tundo kiri Elparan.

⁷Kenyo jowire aka jobino Kades to jomako piny pa Joamalek kodi apa Joamor m'oyido jobedo i Hazazon Tamar.

⁸Kenyo kerin ma Sodom, Gomora, Adima, Zeboyim, kodi Bela jowok aka joriwere ri lweny i milelo ma Sidim aka jolwenyo

⁹gi kerin ma Elam, Goyim, Babilon, kodi Elasar; kerin abic gi kerin aŋwen.

¹⁰Milelo oyido opoŋ buce, aka munyo kerin ma Sodom gi Gomora jotemo ringo wok i lweny, jopodh'iye; to kerin adek ma jodoŋ joringo wi gote.

¹¹Kerin aŋwen jokwanyo kisi gimoro i Sodom gi Gomora, kiri gi cemo to jokadho yo pajo.

¹²Loti wod p'omin Abram m'oyido bedo Sodom bende okadhi gine kiri gi lim pere.

¹³To jacwo m'oyido okwale okidho to waco ri Abram Jayuda m'oyido bedo cegin gi yen pa Mamire Jamoor. Mare gi wutmin go Esikol gi Aner oyido joriwere gi Abram.

¹⁴Munyo Abram owinjo ni omaki wod p'omin paka jajiera lweny, olwoŋo kanyacel cwo ma jolweny i kambi pere, joje 318 aka joriemo kerin aŋwen kiri Dan.

¹⁵Kenyo go opoko cwo pere i kitipin, aka omonjo jakwor wor to kengila jo. Oriemo jo kiri Hoba, yumalo ma Damasiko

¹⁶aka odwoko gi gigipiny je m'oyido onyaga. Go bende odwoko gi wod p'omin gi lim pere, kanyacel gi mon kodi ji man.

¹⁷Munyo Abram odwoko wok kikengila Kedorilaomer kodi kerin m'oyido nitie gi go, kere ma Sodom owok romo gi go i milelo ma Save (ma bende ilwoŋo ni milelo pa kere).

¹⁸Aka Melikizedek, m'oyido kere ma Salem aka bende jacway ri Were Madwoŋ Maloyo okelo mugat gi vini ri Abram,

¹⁹omiyo go silwany, aka owaco ni, “Weyi Were Madwoŋ Maloyo, m'ocweyo polo gi piny womiy Abram silwany

²⁰Weyi Were Madwoŋ Maloyo m'omiyin loyo kwoŋ jokwor perin wopak!” Aka Abram omiyo Melikizedek acel wiy apar ma kisi gima jonyaga.

²¹Kere ma Sodom owaco ri Abram ni, “Doŋ gi gigipiny, to miyan ji paran je.”

²²Abram odwoko ni, “Akwoŋere ruwaŋ Were Madwoŋ Maloyo, Jacwec ma polo gi piny,

²³nike akibino kwanyo uzi kosa thol ngato kosa gimoro perin je nyaka iwaci ni, ‘Aŋat'amiyo Abram bedo m'oŋaŋ’

²⁴Akibino kwanyo gimoro je, kwanyo woko gima cwo paran jocamo. To weyi Aner, Esikol, kodi Mamire jowokwany pok pajo.”