Read dhopadhola Cakirok 16 Bible Online

Cakirok 16 - dhopadhola bible

Cakirok 16

¹Onyo Saray, cipa Abram oyido k'onywol nyithindho. To oyido nitie gi ŋeca ma Jamisir m'ilwoŋo ni Hagar.

²Aka Saray owaco ri Abram ni, “Neni pama, Rwoth ocieran nywol. Raŋo ikibedi gi ŋeca paran? Nyalo bedo ni anyalo limo nyithindho luwo i go.” Aka Abram oyere gi gima Saray owaco.

³Ameno rumacen ma Abram bedo i Kanan ma oro apar, Saray, cipa Abram okwanyo Hagar Jamisir ŋeca pere, aka omiyo Abram paka cege.

⁴Abram onindo gi Hagar, aka ogamo iye. Munyo Hagar oniaŋ nike yac, ocako noro to cayo Saray.

⁵Aka Saray owaco ri Abram ni, “Obedo komo perin ka Hagar cayan. An won aŋat'amiyin ŋeca paran; aka cuka go niaŋ ni ogamo iye, oŋiyan gi cay. Weyi Rwoth wothum banja i dier an kodin!”

⁶To Abram owaco ri Saray ni, “Neni, ŋeca perin nitie i meni perin, tim gi go gim'imito.” Kenyo Saray otero Hagar gi gero to Hagar ringo.

⁷Malaika pa Rwoth onwaŋo Hagar cegin gi waŋ pi ma mol i thim i yo ma kidho Sur.

⁸Aka owaco ni, “Hagar ŋeca pa Saray, iwok yukune aka ikidho kune?” Hagar odwoko ni, “Aringo kwoŋ dhakodwoŋ paran.”

⁹Malaika pa Rwoth owaco rigo ni, “Gik bongi dhakodwoŋ perin, aka ibedi ŋeca pere.

¹⁰Abino miyin nyikwayin kweth m'ongoye ŋata bino nyalo kwano jo.

¹¹Neni, ikidho nywolo wodin, aka ilacwoko nyinge ni Isimayil;[5] rupiri Rwoth owinjo ywak perin i teko.

¹²To wodin bino bedo paka punda madudi. Go bino gwenyirok gi kisi nyatoro, aka kisi nyatoro bino gwenyirok gi go. Go bino bedo bor gi wade pere.”

¹³Ameno Hagar olwoŋo Rwoth m'oluwo gi go ni, “Were ma Neno.” Ato go owaco ni, “Adieri aneno Were aka fodi doko akwo rumacen ma neno go!”

¹⁴Riameno waŋ pi no olwoŋi ni Berlahayroi[6] manitie i dier Kades gi Bered.

¹⁵Hagar onywolo ri Abram wode, aka Abram ocwoko nyinge ni Isimayil.

¹⁶Abram oyido jaoro piero aboro g'aucel i hongo no.