Read dhopadhola Cakirok 2 Bible Online

Cakirok 2 - dhopadhola bible

Cakirok 2

¹Ameno polo gi piny gi kisi cwec je orumo.

²Aka i ndelo mar'abirio Were oyido otieko tic pere ma go otimo to ywomere.

³Ameno Were omiyo ndelo mar'abirio silwany to ketho ndelo no gicen paka ndelo manyakare; rupiri i ndelo no Were oywomere kwoŋ tic ma go oyido timo i cweyo piny.

⁴Aka ameno apaka polo gi piny ocwey. Munyo Rwoth Were ocweyo polo gi piny,

⁵dudi gi kodhi oyido fodi ongoye, rupiri Were oyido fodi k'odhiro koth; aka oyido ongoye ŋat'ofur lowo.

⁶To pi oyido nyule wok i pendi lowo to dhieko piny.

⁷Kenyo Rwoth Were okwanyo lowo moro wok piny to cweyo jacwo, to ywe i ume luya ma kwo to jacwo bedo gi kwo.

⁸Aka Were opidho ndelo i Eden, yuwok ceŋ; aka kenyo go oketho nyatoro ma go oyido ocweyo.

⁹Aka omiyo kisi nger yath twi maber anena aka ma cemo; yath ma kwo bende i dier ndelo kodi yath ma ŋeyo gimaber gi gimarac.

¹⁰Malawa oyido mol i Eden aka dhieko ndelo aka otiakere ka diŋwen.

¹¹Marapena oyido ilwoŋo ni Pison; mol thoko piny Havila.

¹²(Zahabu mangil nwaŋere kenyo kodi mo manitie gi kur kodi telin ma pilin.)

¹³Mar'ario ilwoŋo ni, Gihon; aka mol thoko piny Ethopiya.

¹⁴Mar'adek ilwoŋo ni Tigris; mol yuwok ceŋ ma Asiria, aka mar'aŋwen ilwoŋo ni Yufrete.

¹⁵Rwoth Were otero jacwo to ketho go i ndelo ma Eden furo gi kuro.

¹⁶Aka Were omiyo jacwo cik ni, “Inyalo camo yath moro je i ndelo,

¹⁷t'ikir'icam yath ma ŋeyo gimaber gi gimarac, rupiri i ndelo m'inocam'iye ilatho.”

¹⁸Kenyo Were owaco ni, “Kiber ni jacwo wobedi kende; abino cweyo rigo jakony ma ripo gi go.”

¹⁹Ameno okwanyo lowo wok piny to cweyo ogwaŋe je gi winyin je, aka okelo ri jacwo neno gima go nyalo timo gi jo; aka kisi gima jacwo ocwoko kisi cwec manitie gi kwo, meno obedo nyinge.

²⁰Ameno jacwo ocwoko nyingi ogwaŋe gi winyin je; to ngoye kwoŋ jo m'oyido ripo gi konyo go.

²¹Ameno Were omiyo jacwo nindo mapek, aka munyo go nindo, okwanyo kediŋete acel to umo kenyo gi riŋo.

²²Aka ocweyo dhako wok kwoŋ kedi ŋeti jacwo to kelo rigo.

²³Kenyo jacwo owaco ni, “Tingili me onyo coko ma cokin paran aka del paran won; ilalwoŋo go ni dhako rupiri okwany go wok kwoŋ jacwo.”

²⁴Meno am'omiyo jacwo weyo bamere gi min to riwere gi cege aka jolokere del acel.

²⁵Jacwo gi dhako je oyido jonitie kinyoro, to oyido jongoye gi wickwot.