Read dhopadhola Cakirok 21 Bible Online

Cakirok 21 - dhopadhola bible

Cakirok 21

¹Rwoth owendo ri Sara paka oyido otieko waco, aka otimo ri Sara gima go oyido ociko.

²Sara ogamo iye, aka onywolo ri Abraham wode i tiyo pere i hongo ma Were oyido otieko waco rigo.

³Aka Abraham ocwoko rigo nyinge ni Isaka.

⁴Munyo Isaka otieko ndelo aboro, Abraham othumo go paka Were oyido omiyo go or.

⁵Abraham oyido jaoro miya acel munyo onywol Isaka.

⁶Sara owaco ni, “Were otimo ran gi kisangala gi nyero. Kisi ŋat'owinji kwoŋe bino nyeran.”

⁷To Sara doko medo waco ni, “Ŋa m'oyido d'onyal waco ri Abraham ni Sara nyalo pidho nyithindho? Kucel onyo anywolo rigo wode i tiyo pere.”

⁸Aka munyo Isaka oweyo dhoth, Abraham otimo kalima madwoŋ swa.

⁹Ndelo acel, Sara oneno wod pa Hagar Jamisir tuko gi wode Isaka.

¹⁰Ameno Sara waco ri Abraham ni, “Riemi woko ŋeca me gi wode, rupiri wod pa dhako me kiripi lunjo adec ma lim perin ma wodan ripo lunjo.”

¹¹Gime oramo cuny Abraham rupiri Isimayil bende oyido obedo wode.

¹²To Were waco ri Abraham ni, “Ikir'irembi ri Isimayil kodi ŋeca perin Hagar, to tim gimoro je ma Sara waco rin; rupiri obedo luwo bongi Isaka, m'ibino limo nyikwayin m'atieko ciko.

¹³Aka abino bende miyo wod pa Hagar nyithindho, ŋey bende jowolokere nono rupiri go bende obedo wodin.”

¹⁴Abraham oay malo yawere odikin maŋic to miyo Hagar cemo gi pien m'opoŋ'iye pi, to riemo go woko. Hagar okadho to lera i thim ma Berseba.

¹⁵Munyo pi orumo, oweyo wode i tiendi dudi moro

¹⁶aka okidho to bedo piny kama romo mita miya acel bor gi wode. To waco ni, “Akinyali neno ka nyathi paran tho.” Munyo go fodi obedo kenyo, nyathi ocako ywak.

¹⁷Were owinjo dwondi nyathi, aka malaika pa Were olwoŋo Hagar wok i polo to penjo go ni, “Aŋo ma ramo cunyin Hagar? Ikir'ibedi gi lworo, rupiri Were otieko winjo dwondi nyathi kama go ywak'iye.

¹⁸Ay malo, itiŋ nyathi i cingin; rupiri abino loko go nono madwoŋ.”

¹⁹Kenyo Were oyawo waŋe aka oneno waŋ pi; okidho to poŋo pi i pien, aka omiyo nyathi to madho.

²⁰Were oyido nitie gi nyathi no munyo dongo, aka obedo i thim ma Paran to bedo jadwar swa.

²¹Yokimere onwaŋo rigo dhako ma Jamisir.

²²I hongo no Abimelek gi Fikol jamituka jolweny pere jowaco ri Abraham ni, “Were nikodin i gim'itimo je

²³Riameno kwoŋere ka ruwaŋ Were nike ikibino wondan, nyithindho paran, kosa nyikwayan. To paka atiyo kodin gi genirok, apaka bende ibino tiyo kodan gi piny m'ibed'iye.”

²⁴Abraham odwoko ni, “Akwoŋere.”

²⁵Munyo Abraham ogeŋisa ri Abimelek kwoŋ waŋ pi ma ŋecin pa Abimelek oyido jomayo go,

²⁶Abimelek owaco ni, “Akuya ŋat'otimo gime. Oyido fodi ikiwaco ran, aka fodi oyido akiwinjo kwoŋe tundo konon.”

²⁷Kenyo Abraham okwanyo rombo gi megikwe to miyo Abimelek, aka jario jotimo cikirok.

²⁸Abraham okwanyo rombo abirio ma mon kwoŋ rombo pere to ketho gicen.

²⁹Abimelek openjo go ni, “Rombo abirio ma mon me jonyutho aŋo?”

³⁰Abraham odwoko ni, “Jol rombo abirio ma mon me wok i cingan, k'iyeyo ni aŋat'akunyo waŋ pi me.”

³¹Aka kabedo no olwoŋi ni Berseba,[10] rupiri kenyo ama jotim'iye cikirok.

³²Munyo jotieko timo cikirok, Abimelek gi Fikol jamituka jolweny pere jodok i piny Filistia.

³³Abraham opidho yath m'ilwoŋo ni tamarisk i Berseba, aka olamo Rwoth Were ma cil gi cil kenyo.

³⁴Abraham obedo i piny Filistia ma hongo malac.