Read dhopadhola Cakirok 22 Bible Online

Cakirok 22 - dhopadhola bible

Cakirok 22

¹Rumacen ma gigipiny me, Were otemo Abraham, aka olwoŋo go ni, “Abraham!” Abraham odwoko ni, “An e!”

²To Were waco rigo ni, “Kwany wodin, wodin acel g'acel Isaka m'imaro swa, aka ikadhi i piny Moria, t'imiyan go paka mic awaŋa wi got m'anowaci rin.”

³Ameno Abraham oay malo yawere odikin maŋic aka otoŋo yen ma mic, oketho bieto i wi punda pere, aka okwanyo Isaka gi ŋecin pere ario, to jocako woth kadho kama Were oyido owaco rigo.

⁴I ndelo mar'adek Abraham otiŋo waŋe malo aka oneno kanyago gi bor.

⁵Kenyo owaco ri ŋecin pere ni, “Doŋ win ka gi punda, aka an gi Isaka walakadho kaca lamo Were to wadwoko bongi win.”

⁶Abraham omiyo Isaka tiŋo yen ma waŋo mic, to go won tiŋo cuk mac gi pala i cinge. Ameno jario jonywako yo.

⁷Isaka owaco ni, “Baba!” Abraham odwoko ni, “An e wodan!” To Isaka penjo ni, “Aneno cuk mac gi yen, to nikune nyathi rombo ma mic awaŋa?”

⁸Abraham odwoko ni, “Were won bino miyo wan wodan.” Ameno jario jonywako yo kanyacel.

⁹Munyo jotundo kama Were oyido otieko waco rigo, Abraham ogeto migam kenyo, aka ocano i wiye yen; otweyo wode Isaka, to ketho i wi migam i wi yen.

¹⁰Kenyo Abraham okwanyo apala ni woneki wode.

¹¹To malaika pa Rwoth lwoŋo go wok i polo ni, “Abraham, Abraham!” To go dwoko ni, “An ee.”

¹²Malaika owaco ni, “Ikir'ikethi cingin kwoŋ jayac, kosa ikir'itim rigo gimoro je. Pama onyo aŋeyo ni ilworo Were, rupiri ikithwono go nyaka wodin acel.”

¹³Abraham otiŋo waŋe malo, aka oneno wod rombo m'omoko i dudi m'oyukino gi tunge yuŋey go. Aka Abraham okidho to kwanyo wod rombo to miyo paka mic awaŋa kapa wode.

¹⁴Ameno Abraham olwoŋo kenyo ni Rwoth bino miyo; aka kiri konon ji jowaco ni, “I wi got Rwoth bino miyo.”

¹⁵Malaika pa Rwoth kendo olwoŋo Abraham madirio wok i polo

¹⁶aka owaco rigo ni, “An won akwoŋere, aka Rwoth waco ni, rupiri itimo gime aka ikithwonan wodin acel g'acel,

¹⁷Abino miyin silwany adieri, aka nyikwayin jobino bedo madit paka micalin ma polo kodi kwoyo ma thengi nam. Nyikwayin jobino kikengila jokwor pajo.

¹⁸Piny je jobino kwayan amiy jo silwany paka atieko miyo nyikwayin, rupiri itieko winjo dwondan.”

¹⁹Abraham ogik bongi ŋecin pere, aka joay to jokidho Berseba kanyacel aka Abraham obedo kenyo.

²⁰Rumacen ma gigipiny me, owaci ri Abraham ni Milika oyido onywolo nyithindho aboro ri omin go Nahor.

²¹Uzi m'oyido obedo okayo, omin go Buzi, Kemuel ba Aram,

²²Kesedi, Hazo, Pilidas, Yidilafi, kodi Bethuel,

²³ba Rebeka. Milika onywolo cwo aboro me ri Nahor omin Abraham.

²⁴Reuma, malaya pa Nahor bende onywolo Teba, Gaham, Tahas, kodi Maka.