Read dhopadhola Cakirok 24 Bible Online

Cakirok 24 - dhopadhola bible

Cakirok 24

¹Abraham oyido onyo oti, aka Rwoth oyido omiyo go silwany i kisi gima go otimo.

²To waco ri ŋeca pere ma jatel pa wadi, m'oyido dhumo kisi gima go nitie gine ni, “Kethi cingin i ŋangan[11]

³aka amitin ikwoŋere i nyingi Rwoth, Were ma i polo gi piny ni ikibino nwaŋo ri wodan dhako wok kwoŋ nyir pa Jokanan ka,

⁴to nike ibino kidho i piny paran, bongi wade paran, t'inwaŋo ri Isaka dhako.”

⁵To ŋeca no penjo ni, “To ka nyako okwer dwoko kodan ka, anoteri wodin i piny ma cango iwok'iye?”

⁶Abraham odwoko ni, “Neni ni ikidwoko wodan kenyo.

⁷Rwoth, Were ma i polo, okwanyan wok peco pa baba, i piny m'anywol'iye, aka oluwo to cikan ni go bino miyo nyikwayan lowo me. Go bino dhiro malaika pere yuwiyin, ŋey inwaŋ ri wodan dhako koro.

⁸To k'inen nyako okwer dwoko kodin, ilagonyere kwoŋ kwoŋirok paran; to kende ikir'idwoki wodan koro.”

⁹Ameno ŋeca no oketho cinge i ŋangi Abraham jadwoŋ pere to kwoŋere timo gima Abraham oyido okwayo.

¹⁰Kenyo ŋeca no okwanyo ŋamin pa jadwoŋ pere apar, aka otiŋo mic nger gi nger wok bongi jadwoŋ pere to ay kadho Mesopotamia i tindi madwoŋ m'oyido Nahor bed'iye.

¹¹Munyo go otundo, omiyo ŋamin guro congi gin piny dho waŋ pi woko ma tindi madwoŋ. Oyido obedo i hongo m'othieno, hongo ma mon jobin'iye kulo.

¹²Kenyo go okwayo ni, “Rwoth, Were pa jadwoŋ paran Abraham, miyan loyo konon aka ikuri cikirok perin rigo.

¹³Neni, anitie ka i waŋ pi kama nyir ma tindi madwoŋ jolabino kul'iye.

¹⁴Weyi nyako m'anowaci rigo ni, ‘Mondo lwogi ye agwata perin ŋey amadhi pi.’ Aka ka go owaci ni: Madhi, aka alamiyo ŋamin perin bende jowomadhi, go ama wobedi nyako m'iyero ri ŋeca perin Isaka. I nger me abino ŋeyo ni ikuro cikirok perin ri jadwoŋ paran.”

¹⁵Mafodi go k'ocowo kwayo, Rebeka m'oyido nyar Bethuel wod pa Milika m'onywolo ri Nahor omin Abraham obino i waŋ pi g'agwata i goke.

¹⁶Rebeka oyido obedo nyako ma dhiaŋ onaŋo waŋe, aka go oyido nyako mambula. Oloro i waŋ pi, to twomo pi iy'agwata pere to wok.

¹⁷Kenyo ŋeca no oyombere kidho romo gi go, aka owaco ni, “Mondo miye pi amadhi wok iy'agwata perin.”

¹⁸Rebeka odwoko ni, “Madhi jadwoŋ.” Aka oluŋo piny agwata pere wok i goke to mako ri ŋeca no kareno go madho.

¹⁹Munyo ŋeca no otieko madho pi, Rebeka owaco ni, “Alatwomo ri ŋamin perin bende jowomadhi cuka orom jo.”

²⁰Ameno go okonjo pi piyo i wer to doko ŋweco i waŋ pi twomo pi man, aka oyweko pi cuka oromo ŋamin je.

²¹Jalo oneno go liŋ, munyo mito neno k'adieri Rwoth oyido omiyo go loyo.

²²Munyo ŋamin jotieko madho pi, jalo okwanyo peta ma welo kweth ma zahabu to ketho i um Rebeka, to doko kwanyo pogo ario ma zahabu to ruko i cingi go.

²³Aka openjo go ni, “Mondo wac ran, ibedo nyar ŋa? Kisika nitie i ot pa benin riwan ma nindo wor me?”

²⁴Rebeka odwoko ni, “Abedo nyar Bethuel wod pa Milika m'onywolo ri Nahor.

²⁵Wanitie gi cemo pa ŋamia ma romo kodi kanindo.”

²⁶Kenyo jalo oguro conge to lamo Rwoth.

²⁷Owaco ni, “Rwoth, Were pa jadwoŋ paran Abraham wopak m'okuro cikirok pere iy'adieri ri jadwoŋ paran. Rwoth otelan tirtir i ot pa wade pa jadwoŋ paran.”

²⁸Rebeka oŋweco kiri i ot pa min, aka owaco rigo gigipiny me.

²⁹Rebeka oyido nitie gi omin go m'ilwoŋo ni Laban; aka Laban oŋweco kiri i waŋ pi romo gi jalo.

³⁰Laban oyido otieko neno peta, gi pogo i cingi nyamin, to winjo wac ma jalo owaco ri Rebeka. Ameno Laban okidho bongi jalo, aka oneno go munyo ocungo cegin gi ŋamin i waŋ pi

³¹Laban owaco rigo ni, “Biye wakadhi peco, ŋata Were omiyo silwany. Raŋo icungo ka? Kole atieko yiko rin kisika i ot paran kodi kabedo ri ŋamin.”

³²Ameno jalo odonjo i ot, aka Laban ogonyo ŋamin to miyo jo cemo kodi kanindo; aka omiyo ŋeca pa Abraham pi ma lwoko tiende kodi tiendi cwo m'oyido jonitie gi go.

³³Kenyo okeli cemo, aka ŋeca pa Abraham owaco ni, “Ak'ocem cuka anowaci gim'okelan.” Laban odwoko ni, “Medere iluw.”

³⁴Jalo owaco ni, “Abedo ŋeca pa Abraham.

³⁵Rwoth otieko miyo jadwoŋ paran silwany m'oasere, aka olokere nyatoro madwoŋ; omiyo go rombo gi dhok, feza gi zahabu, ŋecin ma mon gi ma cwo, kodi ŋamin gi punde.

³⁶Sara, cipa jadwoŋ paran onywolo rigo nyathi majayac i tiyo pere, aka jadwoŋ paran omiyo go lim pere je.

³⁷Jadwoŋ paran omiyan kwoŋirok munyo waco ni, ‘Ikir'inwaŋ ri wodan dhako kwoŋ nyir ma piny Kanan ka.

³⁸T'ikidhi i ot pa baba, bongi wade paran, t'inwaŋo ri wodan dhako.’

³⁹T'apenjo go ni, to ka nyako okwer dwoko kodan?

⁴⁰Go odwoko ni, ‘Rwoth Were ma winjo noknok bino dhiro malaika pere yuwiyin to miyin loyo. Ibino nwaŋo ri wodan dhako wok bongi wade paran, i ot pa baba.

⁴¹Nitie nyaka nger acel m'ibino gonyirok'iye kwoŋ kwoŋirok me; meno ka wade pere jokwero go dwoko kodin.’

⁴²Konon munyo atundo i waŋ pi, akwayo Rwoth, Were pa jadwoŋ paran ni, ‘Mondo konyan i gim'atimo.

⁴³Neni, acungo ka i waŋ pi; weyi nyako m'obin kulo, alawaco rigo ni womiye pi amadhi wok iy'agwata pere.

⁴⁴Ka go owaci ni madhi, to doko yweko ri ŋamin paran bende, weyi go wobedi dhako ma Rwoth oyero ri wod pa jadwoŋ paran.’

⁴⁵Mafodi akicowo kwayo paran i cunyan, neni to Rebeka bino g'agwata pere i goke to loro i waŋ pi twomo pi. Awaco rigo ni, ‘Mondo miye pi amadhi.’

⁴⁶To go luŋo agwata pere wok i goke to waco ni, ‘Madhi, aka alamiyo ŋamin perin bende.’ Ameno amadho, aka to miyo ŋamin bende.

⁴⁷Kenyo apenjo go ni, ‘Ibedo nyar ŋa?’ To go dwokan ni, ‘Abedo nyar Bethuel, wod pa Nahor ma Milika onywolo rigo.’ Ameno aketho peta i ume, gi pogo i cinge.

⁴⁸Kenyo aguro congan t'alamo Rwoth. Apako Rwoth, Were pa jadwoŋ paran Abraham, m'otelan tirtir nwaŋo nyar wat pa jadwoŋ paran ri wode.

⁴⁹Onyo pama, ka wilanyutho wor g'adieri ri jadwoŋ paran, wac win ran; ka k'obedo ameno, bende wac win ran anen gir'atima.”

⁵⁰Laban gi Bethuel jodwoko ni, “Gime owok bongi Rwoth; wakinyali luwo kodin marac kosa maber.

⁵¹Rebeka ee, kadhi gi go; aka weyi go wobedi cipa wod pa jadwoŋ perin, paka Rwoth otieko waco.”

⁵²Munyo ŋeca pa Abraham owinjo wac pajo, okule piny to lamo Rwoth.

⁵³Kenyo go owodho thiwino ma feza gi zahabu kodi nangin to miyo Rebeka. Go bende omiyo omin Rebeka gi min mic ma welo.

⁵⁴Kenyo ŋeca pa Abraham gi cwo pere jocemo to jomedho, aka jonindo kenyo. Munyo jocewi, go owaco ni, “Weyi win adoki bongi jadwoŋ paran.”

⁵⁵To omin Rebeka gi min jowaco ni, “Weyi nyako kutho wodoŋ gi wan ma hongo moro ma romo ndelo apar, to nyaka go kadho.”

⁵⁶To go waco rijo ni, “Wikiri wigalan, k'inen Rwoth otieko miyan loyo i woth paran; weyi win adoki bongi jadwoŋ paran.”

⁵⁷Jodwoko ni, “Weyi walwoŋ nyako wapenji go.”

⁵⁸Aka jolwoŋo Rebeka to jopenjo ni, “Ilakadho gi jame?” Rebeka odwoko ni, “Alakadho.”

⁵⁹Ameno josewila Rebeka gi ŋeca pere, to jokadho gi ŋeca pa Abraham kodi cwo pere.

⁶⁰Aka jomiyo Rebeka silwany i wac me, “Nyamin wan, bedi min ji ganin ma gana apar, aka weyi nyikwayin jowomaki tindin madongo pa jokwor pajo!”

⁶¹Kenyo Rebeka gi ŋecin manyir pere joyikere, aka joidho ŋamin ŋey jowokadhi gi ŋeca pa Abraham aka jocako woth.

⁶²I hongo no Isaka oyido owok Berlahayroi (jwom pa ŋata kwo ma nenan) aka oyido bedo yupiny.

⁶³Isaka okidho kiwaya i ndelo othieno, aka otiŋo waŋe malo to neno ŋamin jobino.

⁶⁴Aka Rebeka otiŋo waŋe malo, aka munyo oneno Isaka, oloro i wi ŋamia

⁶⁵aka openjo ŋeca pa Abraham ni, “Meno jal mene no ma wotho i ndelo bino romo gi wan?” Ŋeca no odwoko ni, “Meno jadwoŋ paran.” Ameno Rebeka okwanyo kitambala pere to umo gine waŋe.

⁶⁶Ŋeca no owaco ri Isaka gima go oyido otimo je.

⁶⁷Kenyo Isaka otero Rebeka bedo cege i wema m'oyido Sara min bed'iye. Isaka oyido omaro Rebeka, aka rembo ma tho pa min go ogik cen.