Read dhopadhola Cakirok 25 Bible Online

Cakirok 25 - dhopadhola bible

Cakirok 25

¹Abraham onywomo dhako man ma nyinge oyido Ketura.

²Ketura onywolo rigo Zimiran, Yoksan, Medan, Midian, Isibak, kodi Suwa.

³Yoksan oyido obedo ba Seba kodi Dedan. Wot Dedan oyido jobedo Asurim Letusim, kodi Leumim.

⁴Wot Midian oyido jobedo Efa, Efer, Hanok, Abida, kodi Elida. Me je oyido jobedo wot Ketura.

⁵Abraham omiyo Isaka gigipiny pere je m'oyido go nitie gine.

⁶To mafodi Abraham k'otho, omiyo wot go ma mon pere man jonywolo rigo mic, to riemo jo woko bongi wode Isaka kidho yuwok ceŋ ma piny Kanan.

⁷Abraham ocowo oro 175.

⁸Go oywe macowe to tho i tiyo, aka oriwere gi ji pere.

⁹Wot go Isaka gi Isimayil joyiko go i ŋungu ma Makipela, i ndelo m'oyido obedo apa Efron wod pa Zohar Jahiti, yuwok ceŋ ma Mamire.

¹⁰Me oyido obedo ndelo ma Abraham onyewo wok bongi Johiti. Kenyo oyiki Abraham gi cege Sara.

¹¹Munyo Abraham otieko tho, Were omiyo wode Isaka silwany. Isaka oyido bedo Berlahayroi.

¹²Me nyikway Isimayil, wod Abraham ma Hagar ŋeca pa Sara ma Jamisir onywolo.

¹³Me nyingi wot Isimayil i nywolirok pajo; Nebayoth, Kedar, Adibel, Mibisam,

¹⁴Misima, Duma, Masa,

¹⁵Hadad, Tema, Yetur, Nafis, kodi Kedema.

¹⁶Me a kwari nonin apar g'ario, aka nyingi gin ocwoki ri loka gi kambi pajo.

¹⁷Isimayil oyido jaoro 137 munyo go tho

¹⁸Nyikway Isimayil oyido jobedo iy'adec ma dier Havila kodi Sur, yuwok ceŋ ma Misir yuthenge ma Asiria. Jo oyido jobedo bor gi nyikway Abraham man.

¹⁹Me a nyikway Isaka, wod pa Abraham.

²⁰Isaka oyido jaoro piero aŋwen munyo nywomo Rebeka nyar Bethuel Jaramean ma wok Mesopotamia. Rebeka oyido obedo nyamin Laban

²¹Rupiri Rebeka oyido kinywol, Isaka okwayo rigo Rwoth. Rwoth owinjo kwayo pa Isaka, aka Rebeka ogamo iye.

²²Nyithindho oyido jolwenyo i iy go, aka go owaco ni, “Raŋo gima cale ama timere ran?” Ameno go okidho penjo Rwoth.

²³Aka Rwoth odwoko go ni, “Nonin ario nitie i iyin, aka j'ario m'ilanywolo jolatiakere. Acel labedo matek loyo nyawote, aka m'open wok bino bedo ŋeca pa mathin.”

²⁴Hongo pere otundo ma nywol, neni go onywolo rut.

²⁵M'open wok oyido obokere, aka delkwoŋe gipi oyido cale kanzu ma yer, aka ocwoki nyinge ni Esau.

²⁶Rumacen omin bende owok, aka cinge oyido omako fundi Esau; ameno ocwoki nyinge ni Yakobo. Isaka oyido jaoro piero aucel munyo inywolo jo.

²⁷Munyo yac me jodongo, Esau oyido nitie gi ndijo ma dwar, jacwo ma sa, aka Yakobo oyido obedo jacwo ma liŋ, aka bedo i wema.

²⁸Isaka oyido omaro Esau rupiri oyido camo riŋo ma dwar pere, aka Rebeka oyido maro Yakobo.

²⁹Ndelo acel, Yakobo oyido tedo bijanjalo, aka Esau owok dwar kec oyido neko.

³⁰Esau owaco ri Yakobo ni, “Weyi acami ye kado m'obokere no, rupiri kec asa nekan.” (Meno am'omiyo ilwoŋo go ni Edom; dwoŋ mere ni obokere).

³¹Yakobo odwoko ni, “Kutho tana an dwoŋ perin ma nywolirok.”

³²Esau owaco ni, “Acegin tho; onyo dwoŋ nywolirok paran kony mere aŋo?”

³³Yakobo owaco rigo ni, “Kutho kwoŋere ran.” Ameno Esau okwoŋere to tana dwoŋ ma nywolirok pere ri Yakobo.

³⁴Kenyo Yakobo omiyo Esau mugat gi kado moro. Go ocemo to medho, to ay kadho yo pere. Ameno won apaka Esau ocayo dwoŋ ma nywolirok pere.