Read dhopadhola Cakirok 27 Bible Online

Cakirok 27 - dhopadhola bible

Cakirok 27

¹Munyo Isaka oyido oti aka waŋe oyido neno ma riprip, olwoŋo wode makayo Esau ni, “Esau!” Esau odwoko ni, “An e!”

²Isaka owaco rigo ni, “Neni, ati, aka akuya ndelo paran ma tho.

³Onyo pama kwany gi dwar perin, kwot g'aserin perin, aka ikadhi i sa, i neki ran ogwaŋ

⁴aka itedi ran cemo mamit m'amaro, t'ikelo ran. K'atieko camo, abino miyin silwany paran macowe mafodi akitho.”

⁵Rebeka oyido winjo munyo Isaka luwo gi Esau. Ameno munyo Esau okadho dwar,

⁶owaco ri Yakobo ni, “Awinjo benin waco ri omin in Esau ni,

⁷‘Keli ran ogwaŋ itedi ran acami, aka amiyin silwany ruwaŋ Rwoth mafodi akitho.’

⁸Onyo riameno wodan, winji wac paran k'amiyin cik.

⁹Kadhi bongi mwendi, aka idimi nyithindhi diegi ario ma mbute, ŋey atedi jo aka atim cemo moro ma benin omaro swa.

¹⁰Aka ilatero ri benin to camo, ŋey womiyin silwany mafodi go k'otho.”

¹¹To Yakobo waco ri Rebeka min ni, “Neni, omin an Esau kwoŋe nitie yer, aka an kwoŋan foth.

¹²Miti baba lageyan to niaŋ ni awondo go, to kelo kwoŋan lam makiweno silwany.”

¹³Yokimere odwoko ni, “Weyi lam perin wopodhi kwoŋan wodan; nyaka winji wac paran aka kadhi ikeli ran diegi.”

¹⁴Ameno Yakobo okidho to kelo ri min diegi; aka min otedo nger cemo ma bamere omaro.

¹⁵Kenyo Rebeka okwanyo nangin maber loyo mapa Esau wode makayo m'oyido nitie i ot pere, aka oruko ri Yakobo ocoko pere.

¹⁶Oruko ri Yakobo pien pa nyithindhi diegi i cinge, kodi i ŋute kamafoth

¹⁷aka omiyo wode Yakobo cemo gi mugat m'oyido go otedo.

¹⁸Ameno Yakobo okidho bongi bamere aka owaco ni, “Baba!” Bamere odwoko ni, “Ey, ŋa kwoŋ wotan ma lwoŋan?”

¹⁹Yakobo odwoko ni, “Abedo Esau okayo perin. Atieko timo paka iwaco ran. Onyo bedi m'otire aka icami riŋo moro m'akelo rin, ŋey imiyan silwany.”

²⁰Isaka owaco ri wode ni, “Inwaŋo nedi piyo wodan?” Yakobo odwoko ni, “Rupiri Rwoth Were perin okonyan nwaŋo.”

²¹Kenyo Isaka owaco ri Yakobo ni, “Core cegin, ŋey amulin wodan aŋey k'adieri ibedo wodan Esau kosa be.”

²²Ameno Yakobo ocore cegin gi Isaka bamere m'ogeyo go aka owaco ni, “Dwonde obedo dwondi Yakobo, to cinge, obedo cingi Esau.”

²³Aka Isaka k'oniaŋ kwoŋ Yakobo rupiri cinge oyido nitie yer paka cingi omin go Esau; ameno omiyo go silwany.

²⁴Isaka openjo Yakobo ni, “Adieri ibedo wodan Esau?” Yakobo odwoko ni, “Me an.”

²⁵Kenyo Isaka owaco ri Yakobo ni, “Keli ran riŋo moro, ŋey acami riŋo pa wodan, t'amiyin silwany.” Ameno Yakobo okelo bonge, aka ocamo, to kelo rigo vini bende to madho.

²⁶Kenyo bamere owaco rigo ni, “Core cegin wodan icwiy lemban.”

²⁷Ameno ocore cegin to cwiyo lembi bamere, aka Isaka oŋweyo nangin pere, aka omiyo go silwany ka waco ama: Neni ŋwece wodan cale paka ŋwece ndelo ma Rwoth otieko miyo silwany!

²⁸Weyi Rwoth womiyin thoyo ma polo, kodi poŋo ma piny, kodi ŋano kweth gi vini.

²⁹Weyi ji jowobedi ŋecin perin aka nonin jowokule rin piny. Bedi rwoth pa wutmin in, aka weyi wot yokin jowokule rin piny. Lam ri kisi ŋata lamin, aka silwany ri kisi ŋata miyin silwany!

³⁰Tekin Isaka tieko miyo Yakobo silwany, munyo nyaka Yakobo oeye ruwaŋ bamere Isaka, Esau omin go odwoko wok i dwar pere.

³¹Go bende otedo cemo moro mamit to tero ri bamere. Aka owaco ri bamere ni, “Weyi baba woay, aka wocam riŋo pa wode, ŋey womiyan silwany.”

³²Bamere Isaka openjo ni, “In iŋa?” Esau odwoko ni, “An okayo perin Esau.”

³³Isaka ocako kirin gi derino, aka owaco ni, “Ŋa to, m'oneko ogwaŋ to kelo ran, acamo je mafodi ikibino aka atieko miyo go silwany? Ey, aka go labedo gi silwany.”

³⁴Munyo Esau owinjo wac ba bamere, oywaki, ywak madwoŋ swa gi gwayo, aka owaco ri bamere ni, “Miyan silwany, kiri an bende, a baba!”

³⁵To Isaka owaco rigo ni, “Omin in obino to wondan, aka otero woko silwany perin.”

³⁶Esau owaco ni, “Me madirio ma go diyan. Kendo ni ocwoki nyinge ni Yakobo.[15] Otero dwoŋ paran ma nywolirok paka okayo; aka neni, onyo otero woko silwany paran.” Kenyo go openjo ni, “Ingoye ran gi silwany moro je?”

³⁷Isaka odwoko ni, “Neni, atieko ketho go rwoth perin, kodi wutmin go je paka ŋecin pere. Amiyo go ŋano gi vini je. Onyo ongoye gim'anyalo timo rin wodan!”

³⁸Esau openjo bamere ni, “To initie nyaka gi silwany acel kende baba? Miyan silwany, kiri an bende, a baba.” Aka Esau otiŋo dwonde malo to ywak.

³⁹Kenyo Isaka bamere owaco rigo ni “Neni, ongoye thoyo ma polo rin, aka ongoye lowo maber rin.

⁴⁰Ibino kwo gi toŋ perin, aka ilabedo ŋeca p'omin in. To k'inotur t'igonyere ilaturo bieto pere wok i ŋutin.”

⁴¹To Esau dak omin go Yakobo rupiri bamere oyido omiyo Yakobo silwany. Obedo gi paro ni, “Hongo ma ywak tho pa baba cegin, kenyo alaneko Yakobo.”

⁴²To owaci ri Rebeka wac pa Esau, ameno odhiro t'ilwoŋo Yakobo aka owaco rigo ni, “Neni, omin in Esau cano nekin.

⁴³Onyo riameno, wodan winji dwondan, itimi gim'awaco. Ay iringi bongi Laban omin an i Haran,

⁴⁴aka bedi gi go ma hongo moro cuka nge p'omin in okwe;

⁴⁵cuka wiye owil gi gim'itimo rigo. Kenyo abino dhiro rin nyatoro dwokin. Raŋo akeŋ wotan je i ndelo acel?”

⁴⁶Kenyo Rebeka owaco ri Isaka ni, “Atwo aka aol gi mon pa Esau ma jopath. Ka Yakobo bende onywom mon Johiti me, anyalo bende tho.”