Read dhopadhola Cakirok 28 Bible Online

Cakirok 28 - dhopadhola bible

Cakirok 28

¹Kenyo Isaka olwoŋo Yakobo to miyo go silwany, aka ociko go teltel ni, “Ikir'inywom dhako Jakanan.

²Ay ikadhi Mesopotamia, i ot pa Bethuel ba yokin, aka inywom acel kwoŋ nyir pa nerin Laban omin yokin.

³Were Majameni je womiyin silwany aka womiyin nyithindho kweth, ŋey ibedi ba piny kweth.

⁴Weyi go womiyin gi nyikwayin silwany paka omiyo Abraham, ŋey widoŋ gi lowo m'ibed'iye ma Were omiyo Abraham!”

⁵Ameno to Isaka oro Yakobo kadho. Aka Yakobo okidho Mesopotamia bongi Laban wod pa Bethuel Jaramean, omin Rebeka yok Yakobo gi Esau.

⁶Onyo Esau oneno ni Isaka oyido otieko miyo Yakobo silwany to dhiro go Mesopotamia rango dhako kenyo, aka ni munyo miyo go silwany ociko go teltel ni, “Ikir'inywom acel kwoŋ mon ma Kanan.”

⁷Yakobo oyido owinjo bamere gi min to kidho Mesopotamia.

⁸Ameno munyo Esau oneno ni mon ma Kanan jokisangala Isaka bamere,

⁹okidho bongi Isimayil wod pa Abraham to nywomo nyare m'ilwoŋo ni Mahalath, m'oyido obedo nyamin Nebayoth.

¹⁰Yakobo oeye Berseba, to kidho yu Haran.

¹¹Aka otundo i kabedo moro to bedo kenyo wor no rupiri waŋceŋ oyido otieko podho. Okwanyo tele acel kanyago to theno gine wiye to nindo.

¹²Aka oleko kenyo nike oyido nitie madala m'ocom wok piny, to wiye tundo kiri i polo; aka oneno jomalaika pa Were ka joidho aka doko jolor'iye.

¹³Go oneno Rwoth ocungo i wiye to waco ni, “An Rwoth, Were pa Abraham benin, aka Were pa Isaka; alamiyin gi nyikwayin lowo m'inind'iye me.

¹⁴Nyikwayin jobino cale fukefuke ma piny. Jobino nyay i thenge gi thenge aka luwo kwoŋ jo abino miyo piny je silwany.

¹⁵Neni, anitie kodin, aka abino kurin kisi kam'inokidh'iye, t'adwokin i lowo me; rupiri akibino weyin cuka anotiek timo gim'atieko waco rin.”

¹⁶Kenyo Yakobo ocew wok i nindo pere aka owaco ni, “Adieri Rwoth nitie ka, aka oyido akuya.”

¹⁷Lworo omako go to waco ni, “Kole ka miyo jo lworo! Me k'obedo giman kwanyo woko Ot pa Were, aka me waŋkac ma polo.”

¹⁸Ameno Yakobo oay con odikin, aka okwanyo tele m'oyido go otheno gine wiye, to jengo paka siro aka okonjo mo i wiye.

¹⁹Go olwoŋo kenyo ni Bethel.[16] To nyingi tindi madwoŋ oyido ilwoŋo ni Luz.

²⁰Kenyo Yakobo otimo cikirok ka waco ni, “Ka Rwoth obedi kodan, to kuran i yo paran m'akidh'iye, to miyan cemo gi nanga aruka,

²¹ŋey doko adwoki i ot pa baba i siem, nyaka Rwoth bino bedo Were paran

²²aka tele me, m'aketho paka siro me, bino bedo Ot pa Were; aka kwoŋ kisi gim'inomiyan je, abino miyin acel wiy apar.”