Read dhopadhola Cakirok 3 Bible Online

Cakirok 3 - dhopadhola bible

Cakirok 3

¹Onyo thwol am'oyido obedo ogwaŋ mariek swa kwoŋ ogwaŋe madudi je ma Were oyido ocweyo. Openjo dhako ni, “Were bende adieri owaco ni wikiri wicam olemo ma yen ma ndelo?”

²Aka dhako odwoko ni, “Wanyalo camo olemo ma yath moro je i ndelo,

³kwanyo woko yath manitie i dier ndelo. Were owaco ni wakiri wacam olemo ma yath no kosa kada geyo; ka wanotim, wabino tho.”

⁴To thwol waco ri dhako ni, “Wi k'otho.

⁵Kole Were oŋeyo ni ka winocam waŋ win bino yawere, aka wibino cale Were, ma wiŋeyo bero gi raco.”

⁶Ameno dhako oneno nger ma yath no oyido ber'iye, kodi nger mar'olemo mere oyido ber acama; aka oparo nger ma ber'iye lokirok mariek. Kenyo go okwanyo olemo to camo, aka omiyo cwore bende ni wocam.

⁷Tekin jotieko camo ama, waŋ gin oyawere aka joniaŋ ni oyido jonitie kinyoro; aka jokwoyo boke makuyu kanyacel to joumere gine.

⁸Othieno no jowinjo mayindo pa Rwoth Were wotho i ndelo, aka jopondo kwoŋ yen.

⁹To Rwoth Were lwoŋo jacwo, “Initie kune?”

¹⁰Go odwoko ni, “Awinjo mayindo perin i ndelo, aka lworo omakan rupiri anitie kinyoro t'apondo.”

¹¹Were openjo go ni, “Ŋa m'owaco rin nike initie kinyoro? Icamo yath m'amiyin cik ni ikir'icam?”

¹²Jacwo odwoko ni, “Dhako m'imiyan me am'omiyan t'acamo.”

¹³Kenyo Rwoth Were openjo dhako ni, “Me aŋo m'itimo?” Dhako odwoko ni, “Thwol am'owondan t'acamo.”

¹⁴Kenyo Rwoth Were owaco ri thwol ni, “Rupiri itimo gime, Akwoŋin kwoŋ ogwaŋe je; aka kwoŋ ogwaŋe madudi je wok pama ibino mol gi iyin, aka ilacamo fukefuke i kwo perin je.

¹⁵Abino ketho kwor i dier in gi dhako, aka i dier nyithindhin gi nyithindho pere. Nyithindho pa dhako jobino ŋinyo wiyin, aka ibino toŋo fundi jo.”

¹⁶Aka ri dhako owaco ni, “Abino medo litho perin i ŋedi, aka i litho ibino nywolo nyithindho. Aka kucel ibino bedo g'awanya ri cworin, aka go bino dhumin.”

¹⁷Aka ri jacwo owaco ni, “Rupiri iwinjo dwondi dhako perin, t'icamo olemo ma yath m'amiyin cik ni ikir'icam kwoŋe, akwoŋo lowo ro in. I kwok perin ibino cemo i kwo perin je.

¹⁸Lowo bino nywolo kudhin gi doy, aka ibino camo ranyak madudi.

¹⁹I kwok perin ibino camo mugat cuka inogiki i lowo; rupiri ocweyin wok i lowo, aka doko ibino lokere lowo.”

²⁰Adam ocwoko nyingi dhako pere ni Eva rupiri go obedo yok ji je.

²¹Aka Rwoth Were okwoyo ri Adam gi cege nangin wok kwoŋ pien ogwaŋ to ruko jo.

²²Kenyo Rwoth Were owaco ni, “Neni, jacwo onyo olokere acel kwoŋ wan, m'oŋeyo bero gi raco. Go nyalo camo wok kwoŋ yath ma kwo to kwo cil gi cil.”

²³Riameno Rwoth Were oriemo go wok i ndelo Eden to miyo go furo lowo m'ocwey gine go.

²⁴Were oriemo woko jacwo, aka yuwok ceŋ ma ndelo oketho cwec ma jobwombi gin m'ilwoŋo ni kerubim, kodi abor maliel mac m'oŋiyo kisi thenge. Me ma geŋo nyatoro moro je kwoŋ corok cegin gi yath ma miyo kwo.