Read dhopadhola Cakirok 30 Bible Online

Cakirok 30 - dhopadhola bible

Cakirok 30

¹To munyo Laker oneno ni k'onywolo ri Yakobo nyithindho, nyeko omako gi nyamin to waco ri Yakobo ni, “Miyan nyithindho, kosa alatho.”

²Yakobo omako nge gi Laker, aka owaco ni, “Lokere anitie i kabedo pa Were, m'opano kwoŋin olemo ma ici!”

³Kenyo Laker owaco ni, “Ŋeca paran Biliha ee nindi gi go ŋey wonywol ran nyathi; ŋey anyal bedo gi nyithindho luwo i go.”

⁴Ameno Laker omiyo Yakobo ŋeca pere Biliha paka cege to Yakobo nindo gine.

⁵Biliha ogamo iye aka onywolo ri Yakobo wode.

⁶Kenyo Laker waco ni, “Were otieko thumo ran banja, aka go bende otieko winjo dwondan to miyan wodan.” Riameno ocwoko nyinge ni Dan.

⁷Biliha ŋeca pa Laker doko ogamo iye to nywolo ri Yakobo wode mar'ario.

⁸Kenyo Laker waco ni, “Gi mawi ma meni, atieko lwenyo gi nyamin an, aka aloyo.” Ameno ocwoko nyinge ni Nafital.

⁹Munyo Leya oneno ni ocungo nywol, okwanyo ŋeca pere Zilipa to miyo Yakobo paka cege.

¹⁰Kenyo Zilipa onywolo ri Yakobo wode.

¹¹Aka Leya owaco ni, “Nga ajasilwany maber!” To cwoko nyinge ni Gad.

¹²Zilipa onywolo ri Yakobo wode mar'ario,

¹³aka Leya owaco ni, “Ajakisangala! Rupiri mon jolalwoŋan ni jakisangala” Ameno ocwoko nyinge ni Aser.

¹⁴I hongo ma keco ŋano Ruben okidho i ndelo to nwaŋo yath ma nywol gi yath ger, aka okelo ri min Leya. Laker owaco ri Leya ni, “Mondo miyan ye bende yath nywol gi yath ger ma wodin omiyin.”

¹⁵Leya odwoko ni, “Iparo ni obedo gimathin ni imayan cworan? Onyo imito mayan yath nywol gi yath ger ma wodan omiyan bende?” Laker owaco ni, “K'imiyan yath nywol gi yath ger ma wodin omiyin, Yakobo nyalo nindo kodin wor me.”

¹⁶Munyo Yakobo odwoko wok i ndelo othieno, Leya owok romo gi go, aka owaco ni, “Iripo nindo kodan wor me, rupiri atieko culo ro in kodi yath nywol gi yath ger ma wodan omiyan.” Ameno Yakobo onindo gi go wor no.

¹⁷Were owinjo kwayo pa Leya, aka ogamo iye to nywolo ri Yakobo wode mar'abic.

¹⁸Leya owaco ni, “Were otieko culan, rupiri amiyo cworan ŋeca paran.” To cwoko nyinge ni Isakar.

¹⁹Leya ogamo iye kendo to nywolo ri Yakobo wode mar'aucel.

²⁰Kenyo Leya owaco ni, “Were otieko miyan mic maber, aka cworan bino miyan dwoŋ; rupiri atieko nywolo rigo yac aucel.” Ameno ocwoko nyinge ni, Zebulun.

²¹Rumacen Leya onywolo nyare aka ocwoko nyinge ni Dina.

²²Kenyo Were opoyo Laker; aka Were owinjo kwayo pere to yawo iye.

²³Ogamo iye to nywolo wode, aka owaco ni, “Were okwanyo woko wickwot paran,

²⁴weyi doko womiyan wodan man.” To cwoko nyinge ni Yozefu.

²⁵Munyo Laker otieko nywolo Yozefu, Yakobo owaco ri Laban ni, “Sewila an, ŋey adoki peco paran won aka i piny paran.

²⁶Miyan mon paran gi nyithindho paran m'atieko tiyo rijo, akadhi kwoŋbedo iŋeyo tic m'atieko timo rin.”

²⁷Laban odwoko ni, “Yeyan awaci gime, atieko ŋeyo i menyirok ni Rwoth otieko miyan silwany kwoŋbedo in.

²⁸Waci cul perin, aka abino miyin.”

²⁹Yakobo odwoko ni, “In won iŋeyo paka atieko tiyo rin, kodi nger m'ogwaŋe perin jonyay'iye munyo akwayo jo.

³⁰Ma nok m'oyido initie gine munyo fodi akibino onyo pama jomedere gibe; aka Rwoth otieko miyin silwany i kamoro je m'atund'iye. To onyo pama hongo otundo ma bende aripo thielo ot paran.”

³¹Laban openjo Yakobo ni, “Aculin aŋo?” Yakobo odwoko ni, “Akimiti cul moro je, to k'inotim ran gime, abino doko pidho gi kuro ogwaŋe perin.

³²Yeyan awothi i dier mwendi perin konon, akwany rombo m'akol gi m'akor, gi kisi rombo macol, kodi diegi m'akol gi m'akor; aka meno ama bino bedo cul paran.

³³Yuwaŋe inyalo ŋeyo mayot k'oyido ajar'adieri. K'inobin kikaŋasa cul paran, k'anitie gi diel kosa rombo ma k'obedo akol kosa mar'akor kosa macol; ilaŋeyo ni akwalin.”

³⁴Laban odwoko ni, “Ayere. Watim paka iwaco.”

³⁵To ndelo no Laban okwanyo woko wot diegi gi diegi ma mon akor gi akol kodi matar, kodi nyithindhi rombo macol je to ketho jo i cingi wot go.

³⁶Aka ongoye woko bongi Yakobo gi mwendi pere boro ma romo woth ma ndelo adek. Yakobo okwayo mwendi pa Laban m'odoŋ.

³⁷Yakobo okwanyo jangi yen nger adek manyaboke pendi to cilo apoka ŋey jangi yen jowobedi makicin matar.

³⁸Okidho to ketho jangi yen no ruwaŋ mwendi i wer ma jomadh'iye pi. Oketho jo kenyo rupiri kenyo am'ogwaŋe oyido joring'iye ka jobino madho pi.

³⁹Ameno munyo mwendi joringo ruwaŋ jangi yen no, jonywolo nyithindhi gin makicin, akol kosa akor.

⁴⁰Aka Yakobo opoko nyithindhi rombo, aka omiyo jo ŋiyo mwendi pa Laban makicin matar gi macol, aka opoko jo kwoŋ apa Laban.

⁴¹Kisi ka mwendi matek joringo, Yakobo oyido ketho jangi yen makicin matar i wer pi ŋey joworingi i dier jangi yen no.

⁴²To go k'oketho jangi yen ruwaŋ mwendi ma moso. Ameno Laban obedo gi mwendi ma moso, aka Yakobo obedo gi ma cwe.

⁴³I nger me Yakobo olokere jalim kweth. Go oyido nitie gi mwendi kweth, ŋecin, ŋamin, punde.