Read dhopadhola Cakirok 32 Bible Online

Cakirok 32 - dhopadhola bible

Cakirok 32

¹Munyo Yakobo nitie i yo, jomalaika pa Were joromo gi go,

²aka munyo Yakobo oneno jo, owaco ni, “Me jolweny pa Were!” Ameno olwoŋo kabedo no ni Mahanayim.[20]

³Yakobo ooro jomikwenda yuwiye bongi omin go Esau iy'adec ma Seyir, i piny Edom.

⁴Owaco rijo ni, “Waci win ri jadwoŋ paran Esau ni ŋeca perin Yakobo waco ni, ‘Oyido ti abedo gi Laban kiri gunyo ni,

⁵aka anitie gi dhok, punde, rombo, diegi, gi ŋecin. Adhiro rin wac jadwoŋ paran ŋey anyal nwaŋo wor ruwaŋin.’ ”

⁶Jomikwenda jodwoko bongi Yakobo ka jowaco ni, “Wakidho bongi omin in Esau, aka go bino romo kodin gi cwo miya aŋwen.”

⁷Kenyo Yakobo obwok aka orembo; to tiako ji m'oyido go nitie gine i kitipin ario, mwendi, dhok, gi ŋamin

⁸ka paro ni, “Ka Esau obin i kitipa acel to reyo woko, m'odoŋ bino ringo.”

⁹Aka Yakobo okwayo ni, “A Were pa kwara Abraham gi Yakobo kodi Were pa baba Isaka, a Rwoth m'owaco ran ni, ‘Dok i piny perin bongi wade perin, aka abino timo rin bero.’

¹⁰Akiripi gi wor kodi genirok m'itieko nyuthan, ŋeca perin. Rupiri gi nyaka luth paran akalo malawa Yordan, aka onyo pama alokere kitipin ario.

¹¹Bothan, akwayin wok i cingi omin an, wok i cingi Esau, rupiri alworo go, rupiri go nyalo bino to neko wajoje, kiri mon gi nyithindho.

¹²T'iwaco ni, ‘Abino timo rin bero t'aloko nyikwayin mathoth paka kwoyo ma nam, ma kikwanere.’ ”

¹³Ameno onindo kenyo wor no, aka okwanyo wok kwoŋ lim pere mic ri omin go Esau.

¹⁴Diegi ma mon 200 wot diegi piero ario, rombo ma mon 200 gi wot rombo piero ario

¹⁵ŋamin m'inyedho piero adek gi nyithindho jo, nyikuse dhok piero aŋwen gi thwondhe apar, punde ma mon piero ario, gi ma wote apar.

¹⁶Gigipiny me go oketho i cingi ŋecin pere leko kisi nyatoro kende; aka owaco ri ŋecin pere ni, “Tel win yuwiyan, aka wi weyi thwolo i dier kisi dhok.”

¹⁷Aka owaco ri ŋeca m'otelo ni, “K'omin an Esau oromo kodin to penjin ni, ‘Ibedo apa ŋa? Ikidho kune? Aka ogwaŋe me apa ŋa?’

¹⁸Kenyo i wac ni, ‘Jobedo apa ŋeca perin Yakobo; mic ma go odhiro ri jadwoŋ pere Esau; aka kiri Yakobo won luwo wan cen.’ ”

¹⁹I nger owaco ri ŋeca mar'ario, mar'adek kodi ji ma joluwo dhok je ni, “Wiwaci gimoro acel ri Esau ka wiromo gi go,

²⁰aka wiwaci ni, ‘Kiri Yakobo je nitie cen mawan.’ ” Rupiri Yakobo oparo ni, “Nyalo bedo ni alakisangala go gi mic m'otelo yuwiyan, aka rumacen alaneno waŋe; kono go bino yeyan.”

²¹Ameno Yakobo odhiro mic yuwiye, aka go won odoŋ to nindo i kambi wor no.

²²Wor no won Yakobo oay to kwanyo mon pere ario, ŋecin pere ma mon ario, kodi nyithindho pere apar g'acel, aka jokalo malawa Yabok.

²³Munyo jotieko kalo, go ocewo gigipiny je m'oyido go nitie gine.

²⁴To Yakobo won odoŋ cen kende; aka jal moro obino to tweyo rabok gi go kiri munyo piny yawere.

²⁵Munyo jalo oneno ni kinyal redho go piny, ogeyo bambe, aka bat Yakobo omukere wok i kowino munyo go tweyo rabok gine.

²⁶Kenyo jalo owaco ni, “Weyan akadhi; rupiri piny oyawere.” Yakobo odwoko ni, “Ak'oweyin ikadhi, kwanyo woko k'imiyan silwany.”

²⁷Jalo openjo go ni, “Nyingin ŋa?” Go odwoko ni, “Ilwoŋan ni Yakobo.”

²⁸Kenyo jalo owaco ni, “Nyingin doko k'olwoŋ ni Yakobo, to Isiraili.[21] Rupiri itweyo rabok gi Were, t'iloyo.”

²⁹Yakobo openjo go ni, “Mondo akwayin wac ran nyingin.” To go dwoko ni, “Raŋo ipenjo nyingan?” Aka kenyo omiyo Yakobo silwany.

³⁰Ameno Yakobo owaco ni, “Atieko neno waŋ Were, to fodi akwo.” Go olwoŋo kenyo ni Peniel.[22]

³¹Ceŋ owok munyo Yakobo oyido kadho, aka go oyido komo ro bat mere.

³²Riameno Joisiraili kiri konon jokicam fuc ma kowino ma bat, rupiri kenyo ama jalo omuko.