Read dhopadhola Cakirok 34 Bible Online

Cakirok 34 - dhopadhola bible

Cakirok 34

¹Ndelo acel, Dina nyar Leya m'onywolo ri Yakobo okidho wendo ri mon mar'adec.

²Munyo Sekem wod pa Hamor Jahivi m'oyido obedo rwoth mar'adec oneno go, otero go to riyo go nindo gine.

³Aka cuny Sekem oywayo go bongi Dina nyar Yakobo; omito go aka oweco gine.

⁴Ameno Sekem oluwo gi bamere Hamor ka waco ni, “Nywom ran nyako me wobedi dhako paran.”

⁵Yakobo owinjo ni Sekem oriyo nyare Dina nindo gine; to wote oyido jonitie i sa gi dhok pere, ameno go obedo moth cuka jodwoko.

⁶Ba Sekem Hamor okidho bongi Yakobo luwo gine.

⁷Wot Yakobo jodwoko wok i sa munyo jowinjo kwoŋe; aka jobwok to nge mako jo swa, rupiri Sekem oyido okelo amien i Isiraili munyo go onindo gi nyar Yakobo. Kole nger gino oyido kiripi timirok.

⁸Hamor ba Sekem owaco ri Yakobo gi wote ni, “Cuny wodan Sekem oywayo go bongi nyarin; mondo yey jowonywomere.

⁹Nywomere win gi wan; miy wan win nyir mewin, aka witer nyir mawan.

¹⁰Wilabedo gi wan; aka wilabedo kama wimito je, wilatimo mitan, to wibedo gi lim iye.”

¹¹Sekem owaco ri ba Dina gi wutmin go ni, “Weyi anwaŋ wor ruwaŋin, aka gim'inowaci je ran abino miyo.

¹²Waci ran mic m'imito, aka ikethi nywom malo paka imito; alamiyin gimoro je ma inokway, nyaka miyan nyako wobedi dhako paran.”

¹³Rupiri Sekem oyido okelo wickwot ri nyamin jo Dina, wot Yakobo jodwoko go gi bamere Hamor gi banirok.

¹⁴Jowaco rigo ni, “Wakinyali weyo nyamin wan to nywomere gi ŋata k'othumere, rupiri meno bino bedo giwickwot riwan.

¹⁵Nyaka i gimoro acel ama wanyalo yerok kodin, nike wilalokere paka wan aka kisi jacwo je wothumere.

¹⁶Nyaka wabino miyo win nyir mawan, aka wan bende to watero nyir mewin, to wabedo gi win, to walokere ji acel.

¹⁷To ka wik'owinji wan to withumere, onyo walakwanyo nyar wan to wakadho.”

¹⁸Wac pajo osiemo Hamor gi wode Sekem.

¹⁹Aka jayac k'ogalo gi timo gino, rupiri oyido omito nyar Yakobo. Onyo go am'oyido nitie gi dwoŋ swa i peco pajo gipi.

²⁰Ameno Hamor gi wode Sekem jokidho i waŋkac ma tindi madwoŋ pajo, aka joluwo gi ji ka jowaco ni,

²¹“Cwo me jobedo merin mawan; weyi win jowobedi i lowo me gi wan, aka jowotimi mitan i iye; rupiri panen, lowo lac ma romo jo. Weyi wanywom nyir pajo, aka bende wamiy jo nyir mawan.

²²To nyaka i gime kende ama cwo me jolayere bedo gi wan, to walokere ji acel; nike kisi jacwo i dier wan wothumere paka jo.

²³Kere dhok pajo, lim pajo g'ogwaŋe pajo k'obedi mawan! Nyaka weyi wayere gi jo, to jobedo kanyacel gi wan.”

²⁴Aka ji je m'oyido jokidho i waŋkac ma tindi madwoŋ jowinjo Hamor gi wode Sekem aka kisi jacwo othumere.

²⁵I ndelo mar'adek, munyo cwo fodi jonitie gi adhola, ario kwoŋ cwo pa Yakobo, Simeo gi Levi, wutmin Dina jokwanyo abor aka jobino i tindi madwoŋ ma k'oŋeyere to joneko cwo je.

²⁶Joneko Hamor gi wode Sekem aka jokwanyo nyamin jo Dina wok i ot pa Sekem to jokadho gine.

²⁷Kenyo wot Yakobo jobino kwoŋ cwo m'oneki, aka jonyaga tindi madwoŋ ma culo kwor ma wickwot pa nyamin jo.

²⁸Jotero mwendi pajo, dhok, gi punde pajo, kodi kisi gimoro m'oyido nitie i tindi madwoŋ kodi i ndelin

²⁹lim pajo, nyithindho pajo je kodi mon pajo, kisi gim'oyido nitie i udi jomako.

³⁰Kenyo Yakobo owaco ri Simeo gi Levi ni, “Wikelo teko kwoŋan gi miyo ji ma piny me jowodakan; Jokanan gi Joperiz. Anigi cwo manok, aka ka jocokere to jomonjan, jolareyan gi peco paran.”

³¹To jodwoko go ni, “Go nyalo tero nyamin wan paka malaya?”