Read dhopadhola Cakirok 35 Bible Online

Cakirok 35 - dhopadhola bible

Cakirok 35

¹Were owaco ri Yakobo ni, “Ay malo ikadhi malo i Bethel, aka igeti kenyo migam ri Were m'omenyere rin munyo ikwale kwoŋ omin in Esau.”

²Ameno Yakobo owaco ri jopeco pere kodi jono je m'oyido nitie gi go ni, “Kethi win gicen werin pa jopath ma jonitie i dier win, aka wilokere maleŋ to wiwiro ruk mewin.

³Walaay ka to wakidho malo i Bethel, ŋey ageti kenyo migam ri Were m'odwokan i ndelo ma kidamba paran aka otieko bedo kodan kisi kam'atieko kidh'iye.”

⁴Ameno jomiyo Yakobo werin pa jopath je, kodi milom m'oyido ni ithi jo; aka Yakobo okano jo i tiendi olwa m'oyido nitie cegin gi Sekem.

⁵Aka munyo jowotho, lworo madwoŋ wok bongi Were opodho kwoŋ tindin madongo m'oyido cegin kenyo, ma jok'onyalo riemo wot Yakobo.

⁶Yakobo gi ji m'oyido go nitie gine jotundo i Luz (Bethel), manitie i piny Kanan,

⁷aka ogeto kenyo migam to lwoŋo kabedo no ni El Bethel,[25] rupiri kenyo Were oyido onyuthere rigo munyo oringo kwoŋ omin.

⁸Aka Debora ŋeca pa Rebeka otho kenyo t'iyiko go i tiendi olwa i Bethel; ameno olwoŋi kenyo ni Alon Bakuth.[26]

⁹Were omenyere ri Yakobo kendo munyo go owok Padanaram, aka omiyo go silwany.

¹⁰Aka Were owaco rigo ni, “Nyingin Yakobo; doko nyingin k'olwoŋ ni Yakobo, to Isiraili bino bedo nyingin.” Ameno nyinge ilwoŋo ni Isiraili.

¹¹Aka Were owaco rigo ni, “Abedo Were Majameni je. Nywol inyay; nonin lawok kwoŋin, aka ilabedo kwari kerin.

¹²Lowo m'amiyo Abraham gi Isaka alamiyin, aka abino miyo nyikwayin ma joluwin.”

¹³Kenyo Were okadho malo wok bongi Yakobo i kabedo ma Were oluw'iye gine.

¹⁴Aka Yakobo ogeto kenyo kama Were oluw'iye gine siro ma tele; aka okonjo i wiye vini gi mo.

¹⁵Ameno Yakobo olwoŋo kabedo ma Were oluw'iye gine ni Bethel.

¹⁶Kenyo jowotho wok Bethel, aka munyo fodi jonitie bor ye gi Efrath, ŋedi ocakere gi Laker to nywol bedo rigo matek.

¹⁷Munyo litho pere ma nywol omedere, dhako ma colo mon owaco rigo ni, “Ikir'ilwor, rupiri onyo ilabedo gi wodin.”

¹⁸Aka munyo cunye cot (rupiri go otho) ocwoko nyinge ni Benon[27] aka bamere ocwoko nyinge ni Benyamin.[28]

¹⁹Ameno Laker otho, aka oyiki go i yo ma kidho Efrath (meno Bethelehem)

²⁰Yakobo ogeto siro i wi kaliel pere; obedo siro ma kayik pa Laker, aka nitie kiri konon.

²¹Yakobo owotho, aka ogero wema pere kalo acurcur ma Eder.

²²Munyo Yakobo bedo i piny no, Ruben okidho to nindo gi Biliha, malaya pa bamere, aka Yakobo owinjo kwoŋe. Onyo wot Yakobo oyido jonitie apar g'ario.

²³Wot Leya; Ruben (kayo pa Yakobo), Simeo, Levi, Yuda, Isakar, kodi Zebulun.

²⁴Wot Laker; Yozefu kodi Benyamin.

²⁵Wot Biliha, ŋeca pa Laker; Dan gi Nafital.

²⁶Wot Zilipa, ŋeca pa Leya; Gad gi Aser. Me wot Yakobo m'onywol rigo gi Padanaram.

²⁷Yakobo obino bongi bamere i Mamire, cegin gi Hebron, kama Abraham gi Isaka oyido jotieko bed'iye.

²⁸Onyo Isaka oyido jaoro 180

²⁹aka oywe macowe to tho munyo oti swa; to wote, Esau gi Yakobo joyiko go.